Sápmi |

Deanu soahpamuš dagahii ruđalaš dáhpagiid Ohcejoga gildii – dál gielda gáibida stáhtas veahkki

Mannan geasi fápmui boahtán Deanu soahpamuš doalvvui Ohcejoga gieldalaččain dietnasa. Ohcejoga gielda bovdii ealáhusministtára báikki ala.

Elinkeinoministeri Mika Lintilä Utsjoella 10.1.2018.
Ealáhusminister Mika Lintilä galledii Ohcejogas gaskavahku 10.1.2018. Govva: Vesa Toppari / Yle

Skábman dan illá vuohttá, muhto mannan geasi visot rievddai Ohcejogas. Johka mii ovdal biepmai gieldalaččaid, oaččui ođđa Deanu soahpamuša ja dat rievdadii olles gielddas eallima ja ekonomiija.

Gielda dáhttui veahkkin ealáhusministara ja sus ruđalaš veahkki vai gielda beassá ovddos guvlui, muitala gielddahoavda Vuokko Tieva-Niittyvuopio.

– Ruđa dás dárbbašat. Gal mii das vuolgit, ahte stáhta ferte boahtit veahkkin ruđalaš doarjagiin. Sin váttisvuođaid áddejit, muhto makkár vástádusaid sii ožžot, dan oidnet maŋŋá, muitala Tieva-Niittyvuopio.

Vuokko Tieva-Niittyvuopio
Govva: Anneli Lappalainen / Yle

Deanu soahpamuš ii dagahan nu stuorra servvodatnuppástusa, ahte stáhta automáhtalaččat geigešii ruđa

Deanu soahpamušas ovdamearkka dihte bivdojándoriid geahpededje ja báikkálaččaid rivttiid gáržžidedje ja dat čuozai viidát.

Go stuorra máilmmis fabrihkkat gopmánit dahje stuorra bargoaddit celket bargiid eret, stáhta láve máŋgii veahkehit muhto dál ministtar ii lohpit njuolga ruđa.

– Mun in dieđe leago Ohcejoga gielddas nu stuorra servvodatnuppástupmi. Vaikko fitnodatdoalliin dienas lea unnon, de lassin gáibiduvvo sturron bargguhisvuohta de dalle servvodatnuppástupmi lea dáhpáhuvvan.

Muhto dáppehan lassánii bargguhisvuohta?

– Lea lassánan, muhto ii nu olu go diekkár stuorát dáhpáhusain. Gieldda boađus lea goit vel plussa bealde, čilge ealáhusministtar Mika Lintilä.

Ohcet ráđi ja ruđa vai fitnodatdoallit gávdnet ođđa vugiid birget

Fitnodatdoalliid dietnasat leat unnon beliin, eaige sii leat bálkkáhan seamma olu bargiid go ovdal, dat čielgá fitnodatdoalliid iežaset eahpevirggálaš čielggadeamis.

Dál gielda háliidivčče, ahte fitnodagat besset ovddos guvlui ođđa dilis. Gielda ii oza dihto supmi stáhtas, baicce máŋggalágán veahkki, dego sierralágan doarjagiid fitnodatdoalliide (su. yritystuki) ja vaikkoba ruđa mainna bastet plánet mo gielda ealásgivčče.

– Dál mii ohcat ráđi mo dás ovddos guvlui, ahte mo báikkálaš fitnodatdoallit ovdánit ja basttešedje investeret turismii mii vuođđuduvašii birra jagát doaimmaide.

– Galggašii doarjut gieldda ealáhusdoaimmaid, Ohcejohkii sáhtášii cegget strategiijaprošeavtta mainna gielda ovttas fitnodatdoalliin ozašii ođđa vugiid birget, muitala Tieva-Niittyvuopio.

Varrasamosat: Sápmi

Váldoođđasat

Varrasamosat

Muualla Yle.fi:ssä