Sápmi |

Deanus lei fuones luossajahki – dittit eai mannu sivas gorgŋon johkii

Deanus ja Anárjogas ledje mannan gease maid valjis ruoššaluosat.

Mies kalastaa.
Detnui gorgŋo jagi 2019 sullii 21 000 luosa. Govva: Pasi Peiponen / Yle

Detnui gorgŋo mannan gease unnán luosat, čájehit Luondduriggodatguovddáš Luke dutkamušat.

Luondduriggodatguovddáš čuovvu luosaid goargŋuma skádjaseasaniiguin. Deanus Buolbmát buohta ja Anárjogas Gáregasjot njálmmis skádjaseasanat govvejedje johkabotni dál nuppi gease.

Skádjaseasaniid dieđuid mielde Detnui gorgŋo mannan gease sullii 21 000 luosa, go ovddit gease luosat ledje badjel 32 500. Anárjohkiiges gorgŋo mannan gease váile 1 600 luosa, mii lea dušše bealli ovddit geasi mearis.

Eanemus luosat dihttojedje Deanus geassemánu 10. beaivvi ja borgemánu álggu gaskkas. Anárjogas luosat ledje jođus maŋŋelabbos go dábálaččat, eanemus borgemánus ja čakčamánu álggus.

Luondduriggodatguovddáš Luke árvalus Detnui gorgŋon luosaid mearis Buolbmát buohta jagiid 2018–2019.
Luondduriggodatguovddáš Luke árvalus Detnui gorgŋon luosaid mearis Buolbmát buohta jagiid 2018–2019. Govva: Luke
Luondduriggodatguovddáš Luke árvalus Anárjohkii gorgŋon luosaid mearis Gáregasjot njálmmis jagiid 2018–2019.
Luondduriggodatguovddáš Luke árvalus Anárjohkii gorgŋon luosaid mearis Gáregasjot njálmmis jagiid 2018–2019. Govva: Luke

Dutkit eai dieđe siva

Deanu ja Anárjoga heajos luossameari čilge dat, go erenoamážit unna, ovtta jagi mearas eallán luosat váilo.

Eanemus Detnui gorgŋot dábálaččat dittit, muhto mannan gease dat ledje mannu sivas erenoamáš unnán.

– Buot luosain dušše 35 proseantta ledje vuollái 65 sentimehter guhku luosat, go diibmá daid oassi lei lagabui 65 proseantta. Muhto maiddái stuorát luosat ledje dán jagi unnit go ovdal, čilge Luke dutki Panu Orell.

Dutkit eai dieđe, manin dittit váilo. Sii árvalit, ahte veajehat eai mannu sivas ceavzán mearramátkkis.

Guktuid jogain vuot valjis ruoššaluosat

Deanus ja Anárjogas ledje mannan gease valjis maid ruoššaluosat.

Luondduriggodatguovddáža dutkamušaid mielde Deanus vudje goit duháhat ja Anárjogas maid čuođit ruoššaluosat.

Kutuvalmiita ja elävänä mätänemään alkaneita kyttyrälohia Näätämöjoesta Norjasta Kolttakönkään alapuolelta 14.8.2019.
Dát ruoššaluosat goddojedje Njávdánjogas geasset 2019. Govva: Tapani Leisti / Yle

Deanu ja eará Barentsmerrii luoiti jogaid ruoššaluosat bohtet guollegilvimiin, maid leat dolin dahkan Ruošša bealde Guoládagas. Álgoálggus ruoššaluossa leamaš Jaskesábi davviosiid šládja.

Varrasamosat: Sápmi

Váldoođđasat

Varrasamosat

Muualla Yle.fi:ssä