Sápmi |

Deanus rehkenastet luosaid ođđa vugiin – Rusttegiid ceggegohtet dán vahkus

Vuosttas rusttega bidjet Detnui, Vuolle-Buolbmátjoga njálmmi buohta ja dat rehkenastigoahtá luosaid jo dán vahku rájes.

Skádjaseasan jogas.
Skádjaseasan jogas. Govva: Panu Orell / LUKE

Luondduriggodatguovddáš (LUKE) ceggegoahtá maŋŋebárgga skádjaseasana (su. kaikuluotain) Detnui, namalassii Vuolle-Buolbmátjoga njálmmi buohta. Vuolle-Buolbmátjoga seassanbáiki lea moadde kilomehtera Njuorggámis davás.

Dutki Panu Orell muitala, ahte skádjaseasan galgá jo dán vahku rájes čoaggigoahtit dieđuid das, man olu luosat gorkŋot Detnui.

Skádjaseasaniid eai sáhte bidjat gosa beare, dadjá Panu Orell. Báiki galgá leat dakkár, gokko johka čiekŋu dássidit, iige leat jorričáhci. Sis ledje sávvan skádjaseasana Deanu njálbmái, muhto doppe johka lea menddo govdat seassama várás.

– Dát báiki lea vuolimus vejolaš seassanbáiki. Detnui lea váttis bidjat skádjaseasaniid, dasgo johka lea menddo govdat, iige sáttobodni doala rusttegiid ceaggut, čilge Orell.

Vuolle-Deanus skádjaseasana dollet jogas aŋkke borgemánu loahpa rádjái, vejolaččat juobe čakčamánu beallemuddui..

Seassanrusttet áicá luosa juobe 50-60 mehtera duohken

LUKE lea bidjan seammalágan rusttega maiddái Anárjohkii. Kárášjoga skádjaseasaniin fas dutket Norgga beale eiseválddit.

Skádjaseasanat buvttadit videogova, man mielde luosaid sáhttá rehkenastit. Seassanrusttegiiguin sáhttá áicat stuorra guliid, dego luosaid juobe 50-60 mehtera duohken.

Skádjaseasan báiki lea dakkár sajis, gokko johka čiekŋu dássidit, iige dakko leat jorričáhci.
Skádjaseasan báiki lea dakkár sajis, gokko johka čiekŋu dássidit, iige dakko leat jorričáhci. Govva: Panu Orell / LUKE

Dutki Panu Orell muitala, ahte Duortnos- ja Simojogas skádjaseasan leamašan ánus jo logi jagi. Simojohkii luossa lea jo goargŋugoahtán, muitaledje mannan vahkus ođđasiin.

Deanu luossanáliid leat rehkenastán jo 20 jagi ovdamearka dihte čáhcevuloškámeraiguin, mat govvejit videogova ja buokčamiin oalgejogain. Deanu luosaid dutket maiddái čuopmačájánasaid ja jearahallanskoviid vehkiin.

Skádjaseasana leat báikkálaččat gáibidan dan dihte, vai ožžot luohtehahtti dieđu luosaid mearis. Stáhta lea juolludan Luondduriggodatguovddážii ruđa dutkama várás.

Varrasamosat: Sápmi

Váldoođđasat

Varrasamosat

Muualla Yle.fi:ssä