Sápmi |

Detnui vuvde vuosttas minuhtaid áigge 3 500 fanaslobi – dutki árvala luossabivddu beassat Deanus johtui easkka suoidnemánus dulvvi dihtii

Olgobáikegoddelaččaide vuovdigohte fanaslobiid vuossárgga.

Luke dutki Panu Orell
Luondduriggodatguovddáža dutki Panu Orell árvala, ahte soaitá leat guliide buorre, jus dulvedilli váttásmahttá guolásteami. Govva: Vesa Toppari / Yle

Vuossárgga vuovdigohte fanaslobiid olgobáikegoddelaš guolásteaddjiide. EBI-guovddáža guolledoalloráđđejeaddji Kare Koivisto muitala, ahte vuosttas minuhta áigge vuvde 1 800 fanaslobi ja njealje minuhtas badjel 3 500 lobi.

Oktiibuot Suomas ja Norggas lea vuovdimassii 22 000 bivdojándora.

Dál Suoma beale Deanu lohpegávppis lea álgogeassái dušše muhtin lohpi šat vuovdimassii, loahppageassái goit vel logiid mielde. Bivnnuhamos áigi leage mihcamáraid maŋŋá golbma vahku ovddosguvlui.

Lobiid vuvdet golmma oasis amas lohpegávpi gillát das, go menddo máŋgasat vigget oktanaga oastit lobi. Danin olgobáikegoddelaččaid gáddelobit bohtet vuovdimassii easkka gaskavahku 20.5. ja olgobáikegoddelaš giddodateaiggádiid lobiid sáhttá várregoahtit bearjadaga 22.5.

Dulvi váikkuha sihke guollebivdui ja dutkanbargui

Luondduriggodatguovddáža dutki Panu Orell árvala, ahte Deanu luossabivdu beassá albmaláhkai johtui easkka suoidnemánus, go geassun lea maŋŋonan juo mottiin vahkuin. Guovllus lea ain oalle olu muohta. Deanu ja oalgejogaid dulvviid jáhkket leat alimus muttus geassemánus ja bistit gitta mánu lohppii.

– Guolásteapmi lea váttis, jus lea valjis čáhci. Eandalit buođđun lea beanta veadjemeahttun dalle. Einnostus lea dál dakkár, ahte johka ii coago ovdal geassemánu loahpa. Gal dás geassemánnu manná oalle čáhcemearis, dadjá Orell.

Guhkes giđđa ja dulvi váikkuha maiddái guliid lohkamii. Orell árvala, ahte dán jagi eai beasa cegget Vuolle-Buolbmátjoga skádjaseasana vel miessemánus. Dat dárkkuha dan, ahte oassi goargŋu luosain báhcá logakeahttá.

– Dalle galgá duhtat dasa, mii lea fidnemis ja figgat de ovddit dieđuid vuođul rehkenastit dan oasi bajis, mii báhcá logakeahttá.

Orell árvala, ahte soaitá leat guliide buorre, jus dulvedilli váttásmahttá guolásteami.

– Mađi unnit guolásteapmi, de dađi stuorát oassi luosain beassá gođđanguovlluide lassánit.

Báikki olbmuid luossabivdu álgá Deanus 1.6. ja nu gohčoduvvon turistabivdu 10.6.

Ásllaga Á-studios lei vuossárgga 18.5. sáhka guolásteamis. Guldal ságaid dás. Jietna: Aslak Paltto / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä