Sápmi |

Diggi geahčada golleroggama váikkuhusa Avviljoga čázádagas – sivvan lea Sámedikki váidda

Báikái leat bovdejuvvon biraslobi ohcci, Sámedikki ovddasteaddjit ja Avvil bálgosa ovddasteaddjit.

Korkeimman hallinto-oikeuden presidentti Kari Kuusiniemi
Alimus hálddahusreivtti jođiha presideanta, son lea Kari Kuusiniemi Govva: Sini Järnström/ Yle

Alimus hálddahusriekti galleda hárve Sámis. Dál dat ordne mašiidnagollerogganbáikki geahčadeami Avviljoga oalgejogas Palsinojas maŋŋebárgga 8.9 ja gaskavahko 9.9.

Geahčadeami oaivilin lea čielggadit golleroggama váikkuhusa guovllu čázádahkii ja dan mo dat čuohcá sámeealáhusaide.

Geahčadeami oktavuođas ii vuos addojuvvo duopmu

Geahčadeapmi ii leat dikki njálmmálaš gieđahallan, muhto báikki geahčadeapmi geavahuvvo vuođđun ášši loahpalaš gieđahallamis.

Riekti geahččala fidnet ollislaš gova mašiidnagolleroggama váikkuhusas, dadjá alimus hálddahusrievtti presideanta Kari Kuusiniemi.

– Sámediggi deattuha váidinlohpeohcamušas ja váidagis, ahte dán guovllus dáhpáhuvvá mašiidnagolleroggan viidábutge. Mis leat čoggon juo ollu áššegirjjit, ja buot materiála ja geahčadeami vuođul addit de loahpalaš mearrádusa áššis.

Kuusiniemi mielde diggi dahká birassuodjalanlága paragráfa 49 vuođul oktasašváikkuhusaid árvvoštallama.

– Dáid čielggademiid vuođul diggi čoavdá dán ovtta ášši ja dat gal maiddái stivre mearrádusaid maiddái eará sullasaš áššiin.

Davvi-Suoma guovlluhálddahusdoaimmahat (AVI) mieđihii biraslobi golleroggamii mašiinnaiguin Palsinojas. Mearrádus addojuvvui 6.7.2018. Dan mearrádusas AVI attii maid čáhcedoallolobi oali sirdimii Palsinojas ja dan unnit oalgeádjagis. Lohpeguovllu viidodat lea 18,9 hektára, mas gollerogganfitnodat oažžu bargat.

Sámediggi lea váidán sámeguovllu mašiidnagollerogganlobiin, nu maiddái Palsinoja doaimmain

Sámediggi lea guoddalan Palsinoja mašiidnagolleroggamii addojuvvon lobiin vuos Vaasa hálddahusriektái ja dasto Alimus hálddahusriektái jagis 2018. Váidaga Sámediggi ákkastallá earret earáid dainna, ahte guovlu lea Avvila bálgosa deaŧalaš guohtoneanan ja guottetbáiki.

Vaasa hálddahusrievtti mearrádus ii duhtadan Sámedikki ja danin Sámediggi váiddii Alimus hálddahusriektái.

Alimus hálddahusrievtti beales Palsinoja geahčadeamis leat mielde presideanta Kari Kuusiniemi, vuoigatvuođaráđđeolbmot Kari Tornikoski, Tuomas Kuokkanen, Jaakko Autio ja Pekka Aalto, birasáššedovdiráđđeolbmot Jukka Horppila ja Seppo Rekolainen sihke vuoigatvuođačálli Päivi Korkeakoski.

Riekti lea bovden geahčadanbáikái Sámedikki ovddasteddjiid, biraslobi ohcci sihke sierra eiseválddiid ja bálgosa ovddasteddjiid. Palsinoja golgá Avviljohkii ja dat lea Avvil bálgosa rájáid siste.

Sámedikkis dán geahčadeapmái oassálastet nubbi várreságadoalli Leo Aikio, ealáhusčálli Sarita Kämäräinen, sadjásaš láhkačálli Kalle Varis ja sadjásaš birasčálli Tiina Lovisa Solbär.

Varrasamosat: Sápmi

Váldoođđasat

Varrasamosat

Muualla Yle.fi:ssä