Sápmi |

Dološ ođđajagimáidnasa mielde riggu, jus bihtá ealliin ođđajagiruohta

Dološ máidnasa mielde dat, guhte bihtá ealliin, fidne gollebumbbá alcces. Jovnna Biehtár Guttorm ii goittotge ieš goassige duostan geahččalit.

Veteránaid girkobeaivi 2012
Jovnna Biehtár Guttorm (gaskamuš, gudnemearka oažžumen) ii ieš goittotge duosttan geahččalit bihtágo son ealliin. Govva: Sámmol Lukkari / Yle Sápmi

Jovnna Biehtár Guttorm, Áhguoikkas eret, muitalii jagis 1980 máidnasa, man mielde njealjis galge mannat sierra luoddaearuide čuožžut ođđajagiruohta, jus háliidedje riggut.

Go rikkes sápmelaččat dovdagohte, ahte lea sin áigi vádjolit, de čihke sii meahccái bumbbá, masa bidje iežaset golliid ja silbbaid, amaset earát árbet daid.

– Ođđajagiruohtta go bođii, de gii háliidii fidnet daid golliid ja silbbaid, de njealjis galge mannat čuožžut, juohke luotta guvlui okta geahččat. Das go ledje čuožžumin, de dat eallit boahtigohte ja de man luoddaráigge dat bohte, nu dat gii doppe lei, gárttai álgit daid vuostá soahtat ja heaibut, muitalii Jovnna Biehtár.

– Ja go vuittii dan ealli de iđii nubbi ja gievrrat aht‘ gievrrat ealli boahtá. Ja dat golmmás, geat skihpárin ledje, eai dieđe maidege, dat čužžot, go okta lea doppe dáistaleamen.

Olmmoš, guhte gárttai heaibut ealliiguin, ii sáhttán šat vuolgit go juo lei álgán. Maŋimuš ealli lei stuorimus ja gievrramus, ammal jo lei guovža, árvalii Jovnna Biehtár.

– Dat gal fertii leat guovža ja dan de botnjat, gánskehan de birgii. Gohan de lei fidnet guovžža váibat vai addá vuollái, nu dehan de fuobmái, ahte dat ruhtagirstu lea su gieđas ja buot eallit leat mannan.

– Golleboahkánat, solljut ja buot árvodiŋggat álge oidnot, ja de dihte, ahte diet almmái lea heibon ja dat lea ožžon dan gollegirsttu, mii lei čihkkojuvvon, dat lei dakkár gufihtarhommá.

Dat golmmás, geat ledje skihpárin, eai diehtán velge maidige, ja sii eai fidnen golliid eaige silbbaid.

– Ja leahan dat viehka ilgat go dat nuppit čužžot golmmás ja okta lei heibon doppe ja dáistalan dain ealliiguin ja vuoitán, ja de lea rikkis go lea árvobumbá gieđas. Easkka maŋŋá fuomášedje earát, ahte diet dat lei gii heaibbui, ja de vulge ja jurddešedje, ahte dat lei dušši hommá.

Návccahis gánddaid ii gánnehan oba geahččalitge

Luoddaearuide eai goittotge vuolgán buohkat, geat háliidedje dan árvobumbbá. Návccahis albmát eai oba geahččalange, go dihte, ahte eai biđe ealliin.

– In mun jáhke, ahte dohko vulggii áibbas návccahis gánda, dat galggai leat gievra ja galggai jáhkkit, ahte son gal bihtá ja galggai muđuige leat roahkkat, ahte ii viehkal go oaidná vuoncá boahtimin.

Jovnna Biehtár ii iešge livčče mannan luoddaerrui.

– Dat lei ilgadis hommá, mun in gal vuolggašii čuožžut dohko bumbbá dihte.

Ášši doaimmahii Heikki Armas Lukkari jagis 1980. Guldal máidnasa Yle Areenas.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä