Sápmi |

Dovddus fitnodatalmmái Peter Vesterbacka ovddidišgoahtá Jiekŋameara ruovdegeainnu – toga sáhttá girddihit Roavvenjárggas Girkonjárgii jo viđa jagi geažes

Jiekŋameara ruovdegeainnu hálidit jođálmahttit Ásia ja Eurohpá gaskasaš gávpegeainnu. Vesterbacka jáhkká sin gávdnat sápmelaččaiguin buorre čovdosa áššái háleštemiin.

Peter Vesterbacka, entreprenör och tunnelbyggare
Fitnodatalmmái Peter Vesterbacka lea dovddus stuorra investeremiin. Govva: Derrick Frilund / Yle

Angry Birds -mobiilaspealus ja Tallinna-tunnelas dovddus fitnodatalmmái Peter Vesterbacka jođihišgoahtá Jiekŋameara ruovdegeainnu plánema.

Vesterbacka fitnodat Finest Bay Area Development Oy vuolláičálii duorastaga Roavvenjárggas áigumušsoahpamuša norgalaš Sør-Varanger Utvikling -fitnodagain Jiekŋameara ruovdegeainnu plánemis ja ollašuhttimis. Soahpamuša mielde oassebealit čatnasit dutkat ruovdegeainnu ollašuhttinvejolašvuođaid ja dan viiddit váikkuhusaid birrasii, servodahkii ja ekonomiijai. Dárkkuhussan lea plánet dakkár ollašuhttinmálle, mii váldá vuhtii buot oassebeliid. Áigumuššan lea ásahit prošeaktafitnodagaid sihke Supmii ja Norgii.

Fitnodagat hálidit ruovdegeaidnooktavuođa Suomas Norgga Girkonjárgga hámmanii, daningo dat jođálmahtášii Ásia ja Eurohpá gaskasaš gávpegeainnu, nu gohčoduvvon Davvenuortamearrajohtolaga (su. Koillisväylä) ollašuvvama.

Peter Vesterbacka dadjá, ahte ruovdegeaidnu Roavvenjárggas Norgga Girkonjárgii huksejuvvošii priváhta ruhtademiin, man áigot háhkat olgoriikkain. Ruovdegeainnu leat árvalan máksit sullii golbma miljárdda euro.

Peter Vesterbacka allekirjoittaa aiesopimuksen Jäämeren radan suunnittelusta ja toteutuksesta Arctic Business Forumissa Rovaniemellä 9. toukokuuta.
Peter Vesterbacka vuolláičálii áigumušsoahpamuša Jiekŋameara ruovdegeainnu plánemis ja ollašuhttimis Arctic Business Forum -dáhpáhusas Roavvenjárggas 9.5.2019. Govva: Juha Mäntykenttä / Yle

Maiddái turismajohtolat, erenoamáš jođánis toga, viđa jagi geažes

Vesterbacka jáhkká, ahte togaoktavuohta Roavvenjárggas Girkonjárgii sáhtášii leat vejolaš jo viđa siste, muhto maŋimustá vuollái logi jagi geažes. Jearaldat lea erenoamáš jođánis oktavuođas.

– Mii hálidit dahkat das jođánis oktavuođa seammaláhkai go Tallinna-tunnelas. Jiekŋameara ruovdegeaidnu plánejuvvo togaide, mat johtet 350 kilomehtera diimmus dahje jođánabbot. Dárkkuhus lea bálvalit dainna maiddái turismma.

Árat čielggademiin leat gávnnahan, ahte Jiekŋameara ruovdegeaidnu ii livčče ruđalaččat gánnahahtti. Vesterbacka oaivvilda, ahte čielggademiin eai leat váldán doarvái vuhtii turismma mearkkašumi.

– Gálvvuid fievrredeapmi ii eisige leat dat áidna ášši. Ovdamearkka dihte Tallinna-tunnelas gálvvuid fievrredeami oassi lea sullii 20 proseantta ja loahppa lea olmmošjohtolat. Maiddái Jiekŋameara ruovdegeainnus olmmošjohtolagas boahtá leat mearkkašahtti rolla, erenoamážit go Roavvenjárgii seivot boahttevuođas njuolggogirdimat Ásias.

– Jiekŋameara ruovdegeaidnu seasttášii 20 gálvofievrredanbeaivvi Ásia ja Eurohpá gaskkas. Máilbmi lea gidden fuopmášumis dál deikka, ja dan dihte dál lea buorre áigi doaibmagoahtit, Peter Vesterbacka joatká.

Vesterbacka lasiha, oassi Jiekŋameara ruovdegeainnus sáhtášii johtit eatnama siste dahje áimmus.

"Sápmelaččaiguin beassat buorre loahppabohtosii ságastallamiin áššis"

Peter Vesterbacka diehtá, ahte earret eará sápmelaččat leat vuostálastán Jiekŋameara ruovdegeainnu. Su mielas áššis galgá ságastallat.

– Dát áššit čoavdašuvvet hállamiin. Mun lean sihkkar, ahte mii beassat buorre loahppabohtosii, go háleštit áššis.

Jiekŋameara ruovdegeainnus áigot ordnet álbmotdilálašvuođaid oktii mánus. Dasa lassin áigot háleštit iešguđetlágan oassebeliiguin áššis.

– Daningo mii eat leat báikkálaččat, mis eai ovttaláhkai leat makkárge ovdagáttut ášši hárrái. Dan dihte mii sáhttit ságastallat buohkaiguin das, maid áigut bargat.

– Dát lea mearkkašahtti álgu. Mii ovdánit dáinna áššiin seamma prinsihpaiguin go Tallinna tunnelprošeavttas. Mii dutkat vuđolaččat earálágan molssaeavttuid ovttas buot doaibmiiguin. Ovttasbargu lea jo jođus dievas fárttain, dadjá Peter Vesterbacka.

Tallinna-tunnela roahkkadis ovddideaddji

Peter Vesterbacka lea dovddus almmái maiddái Tallinna-tunnela ovddideamis. Son ii bala njuikemis fárrui stuorra prošeavttaide.

– Golbma jagi dassái olbmot boagustedje mu tunnelplánaide ja dadje, ahte dat ii leat moge realisttalaš. Dál golmma jagi maŋŋá mis álgá leat ruhtadeapmi čoahkis, birasváikkuhusaid árvvoštallan lea álggahuvvon ja fargga beassat bovret.

Vesterbacka dadjá, ahte vuosttas toga girddiha Tallinna ja Helssega gaskasaš tunnelas juovlamánus 2024. Tallinna-tunnela haddin leat árvalan 15 miljárdda euro, nu ahte dat máksá sullii viđa geardde Jiekŋameara ruovdegeainnu veardde.

Tallinna tunnel lea oassi Kiinná silkegeaidnoplánain. Daid bokte kiinnálaš fitnodagaid buktagiid lea álki doalvut máilbmái.

Maiddái Lappi lihttu mearridii gieskat joatkit Jiekŋameara ruovdegeainnu plánema davimus Suoma ođđa eanangoddeláva válmmaštallama oktavuođas.

Varrasamosat: Sápmi

Váldoođđasat

Varrasamosat

Muualla Yle.fi:ssä