Sápmi |

Duodjeávdnasiin lea koronaáigge buorre johtu neahttagávppiid bokte – olbmuin lea gal áigi duddjot, muhto eai jur doalut maidda čiŋadit

Go ráját leat gitta, eai olbmot leat beassan rájá rastá gávppašit duodjeávdnasiid. Neahttagávpi leamašan okta čoavddus dasa.

Marjaana Aikio Sajoksen pihalla
Duodji Shop -gávpi lea Anáris kulturguovddáš Sajosis. Go Sajos leamaš gitta, leat olbmot diŋgon eanet diŋggaid neahttagávppis, Marjaana Aikio muitala. Govva: Kirsti Länsman / Yle

InKa Duodji -buvddas Kárášjogas lea leamašan jaskat. Fitnodatdoalli Inga Porsanger mielde olbmot eai leat dál dárbbašan oastit gáktediŋggaid ja eará ávdnasiid, go eai leat doalut. Dasa lassin oassi su kundariin bohtet dábálaččat Suoma bealde.

– Eai leat festiválat, eai konsearttat, eaige mahkkige gos mu gálvu geavahuvvo. Mus leat maid Suoma bealde hui buorit kundarat ja dat eai beasa deika, šuohkiha Porsanger.

Čiŋat-gávppi eaiggát, guovdageidnolaš Berit Anne Hætta Eira lea maid álggahan neahttagávppi, vai beassá bálvalit kundariiddes vaikko ráját leatge gitta.

– Eai olbmot dál vánddar ja go rájit gitta maid, ii leat nu mo lea leamaš ovdal. Suoma bealde leat hui olu leamaš mus kundarat, muitala Hætta Eira.

Guldal Berit Anne Hætta Eira jearahallama dás. Jietna: Inger-Elle Suoninen / Yle

Porsanger: "Ledjen jo ráhkkanan koronai smávvát"

Inga Porsanger gearggai álggahit neahttagávppi veháš ovdal koronapandemiija álgima. Son muitala, ahte son jo gamustis dovddai, ahte juoga erenomáš boahtá dáhpáhuvvat.

– Rivgut várra logašedje, ahte mun lean skitsofrena ja sápmelaččat fas, ahte mun lean diehtti. Jagis 2018 gullagohten iežan jurdagiin, ahte ferten vuovdit dan buvdda. De heite dat ságat go vuvden ja huksejin ođđa buvdda.

– Jagis 2019 gullagohten "doama, doama" go ledjen ruovttusiiddu ráhkadeamen. In diehtán masa ledjen doapmamin, muhto mun ledjen jo ráhkkanan koronai smávvát, muitala Porsanger.

Dán áigge su gálvojohttin dáhpáhuvváge eanáš neahtas, jus háliida buvddas fitnat de galgá sierra šiehttat suinna áiggi.

– Eanaš oassi gálvvuin manná dan bokte ja dat gal lea munnje álki. Doppe ostet mus doppe ávdnasiid, minstariid, gárvves dujiid ja visot, mii mus doppe lea, lohká Inga Porsanger.

Guldal Inga Porsanger jearahallama dás. Jietna: Xia Torikka / Yle

Suoma bealde stuorra beroštupmi duodjekurssaide

Koronadilli lea váikkuhan maiddái Suoma bealde Sámi Duodji -searvvi doibmii máŋggaláhkai. Olbmot leat šaddan diŋgot Sámi Duoji neahttagávppis gáktediŋggaid ja eará ávdnasiid, dalle go Duodji Shop Sámekulturguovddáš Sajosis lea leamaš gitta.

– Báikki nalde olbmot eai leat fitnan nu ollu koronaáigge dieđusge, muhto oassi lea goit gávdnan neahttagávppi, ahte dien bokte leat diŋgomat, Sámi Duodji -searvvi ságadoalli Marjaana Aikio muitala.

Suoma bealde eai beasa dál maiddái fitnat Norgga bealde gávppašeamen duodjeávdnasiid.

Sámi Duodji -searvvi ságadoalli Marjaana Aikio muitala, makkár doaimmat Sámi Duodji -searvvis leamaš koronaáigge. Jietna: Inger-Elle Suoninen / Yle

Vaikko doalut eai dál jur leatge, leat máŋgasat movttáskan duddjot dál, go gártá dahje beassá leat ruovttus eanet go gánske ovdal. Sámi Duodji -searvi lea ordnen dál johtti duodjebussiin kurssaid iešguđet sajiin.

Koronaráddjehusaid dihtii kursii leat bastán váldit dušše vihtta olbmo oahpaheaddji lassin. Beroštupmi kurssaide gal livččii.

– Olbmot leat háliidan eanet kurssaid go mii bastit ordnet, Aikio lohká.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä