Sápmi |

Duodjebusse johtá vejolaččat juo guovvamánus – Leader dohkkehan Sámi Duoji fidnoevttohusa

Duodjebusse ulbmilin lea fállat duddjonbáikki dohko, gos dat ii muđui gávdno.

Čuoldin
Fidnu ulbmilin lea sirdit árbevirolaš duddjondáidduid sohkabuolvvas nubbái. Govva: Kirsti Helena Länsman / Yle

Sámi Duodji -searvi lea álggaheamen Duodjebusse-fidnu. Searvi lea ožžon Anára gielddas 20 000 euro loana fidnu álggaheami várás ja ohcan dasa Leader-ruhtadeami, man Leader lea dohkkehan.

Go vel eiseválddit leat dárkkistan ja dohkkehan fidnu evttohusa, sáhttá doaibma álgit.

– Mii vuordit dan ruđa, dan maŋŋá beassat johtui áššiin, lohká Sámi duoji vuosttaš várreságadoalli Marja Näkkäläjärvi-Jomppanen doaimma álggaheami birra.

Duodjebusse galggašii johtit Anára, Ohcejoga ja Vuohču guovlluin.

Johtui guovvamánus

Sámi Duojis ii leat eará doaibmasadji, go duodjegávpi sámekulturguovddáš Sajosis. Duddjomii oaivvilduvvon doaibmalanjat Anára boares skuvllas ásahuvvojedje jagi 2017 guovlohálddahusa beales geavahangildosii sisáibmodili dihte. Dan maŋŋá searvi lea aktiivvalaččat ohcan ođđa doaibmalanjaid, muhto ii leat vuos gávdnan maidege geavahussii.

Ovdalgo go beassá goarrut, de ferte vuos ostet gápmasiid.
Duodji geasuha ja dasa geahččala Sámi Duodji vástidit, jusmat dat oaččošii lasi dujiid vuovdemassii duodjebussedoaimma bokte. Govva: Vesa Toppari / Yle

Ná duodjebusse vástidivčče doaibmasaji váilumii, Näkkäläjärvi-Jomppanen čilge.

Searvvi ulbmilin lea, ahte Duodjebusse jođášii juo guovvamánus.

Busse jođášii dáiguin ruđaiguin guovvamánu álggus gitta jagi lohppii. Doibmii lea dárkkuhus bálkkáhit ovtta bargi 11 mánotbadjái 50% soahpamušain.

Duddjondáidduid sirdima doarjjan

Dán johtti duddjonrávvehaga ulbmiljoavkkut leat ruhtaohcamuša mielde earenoamážit nuorat ja sii, geat leat fárren ruovttoluotta davás. Doaimma olis ordnejuvvošedje maid duodjekurssaid ja bargobájiid. Dát doaimmat livčče ovdamearkka dihte Ohcejogas, Čeavetjávrris, Avvilis, Áŋŋelis, Lismmás dahje Njeallimis. Doaibma ii guoskka oarjjeguovllu goittotge dáid plánaid vuođul.

Fidnu ulbmilin lea dieđusge árbevirolaš duddjondáidduid sirdin sohkabuolvvas nubbái, muhto maiddái oažžut eambo duojáriid ja dan bokte eambo maid dujiid vuovdimassii, dasgo duodji geasuha eanet ah eanet.

Dát iskkadeapmi doalvut rávvejeddjiid ja bargobiergasiid gilážiidda muitala maid doaibmavuogi ovddidanvejolašvuođain.

Varrasamosat: Sápmi

Váldoođđasat

Varrasamosat

Muualla Yle.fi:ssä