Sápmi |

Duodjedutki: "Nuoraide gákti sáhttá leat hui hearkkes ášši"

Dutki Seija Risten Somby lea dutkan duoji mearkkašumi konfimašuvnnain Kárášjogas ja Ohcejogas. Somby oaidná ahte gávttiin čiŋadeapmi lea nuoraide dehálaš, muhto gáktái guoskamiin sáhttá maid loavkašuhttit nuora.

Seija Risten Somby
Dutki Seija Risten Somby Govva: Yle

Seija Risten Somby dutká nákkosgirjebarggustis konfirmašuvnnaid Kárášjogas ja Ohcejogas ja duoji mearkkašumi dain. Guovtti dutkanguovllus dutki oaidná ollu erohusaid.

Váldoerohus lea jahkodagas goas konfirmašuvnnat leat. Kárášjogas dat leat giđđadálvet ja Ohcejogas mihcamáraid áigge álgogease. Dat váikkuha Somby mielas muhtun árbevieruid jávkamii.

– Suomabealde dálvegárvvuid duddjon, geavaheapmi ja oppalohkái daid dovdan lea unnit go Kárášjogas, gos dat nuorat besset vásihit daid dálvegárvvuid áibbas geavadis. Jahkásaš konfirmašuvnnat dihto láhkai ođasmahttet ja ealáskahttet čiŋadandujiid.

Kárášjogas gáktegeavaheapmi kontrollerejuvvon

Kárášjogas konfirmašuvdna lea dehálaš čájehanbáiki nuoraide ja bearrašiidda, čilge Somby.

– Konfirmašuvdna lea seremoniija, masa láktasa gákti. Dat lea veháš dego scena ala dainna gávttiin ja sis leat gárvvoheaddjit, geat eai máhte dan ieža dahkat.

Kárášjogas konfirmánttat hálidit čiŋadit árbevirolaš alit láđđegávttiin.

– Kárášjogas girku sadji lea báikin kontrollerejuvvon ja das lea guovddáš sajádat. Doppe olbmot dadjet, ahte girkui galgá coggat álo álit gávtti ja nie dat doalaha dan.

Kárášjoga duddjonárbevierus lea Somby mielas maid positiivvalaš váikkuhus Suoma duddjonkultuvrii.

– Mun oainnán, ahte Kárášjoga konfirmašuvnna čiŋadeapmi doarju Gáregasnjárgga nuoraid čiŋadeami, go duojárat ja váhnemat fitnet geahččáme Kárášjogas juohke jagi, mii doppe lea ja buktet dan. Dat lea dehálaš min Suoma bealde duodjekultuvrra doarjumis ja ovdanahttimis.

Guoskan sáhttá loavkašuhttit

Nuorat hálidit gárvodit gávttiin, muhto daningo sii leat easkka hukseme identitehtaset, sáhttá gárvvuid kommenteret loavkašuhttit.

– Mun oainnán gávtti oassin rupmaša, dan sáhttá oaidnit nubbi liikin, nu ahte gákti lea dego mun. Jus don guoskkat nuorra olbmo gáktái, don sáhtát guoskkahit dan nuora liikái ja identitehtii. Ja sáhtát bávččagahttit dan identitehta.

Goittotge Somby mielas lea dehálaš, ahte nuoraid galgá maid bagadallat gáktegeavaheamis.

– Nuorat eai iehčanassii ráhkat iežaset duodjekultuvrra, muhto dat dáhpáhuvvá ságastallamiin ovddit buolvvaiguin, muitala dutki Seija Risten Somby Sámi dutkanbeivviid oktavuođas lágduvvon logaldallamis Anáris.

Varrasamosat: Sápmi

Váldoođđasat

Varrasamosat

Muualla Yle.fi:ssä