Sápmi

Duodjeoahppi illuda – "Viimmatge oažžu gazzat duodjeoahpu eatnigillii"

Nilla-Ola Pieski álggii ráves olmmožin duodjeskuvlii. Ii fal dušše duodji geasuhan muhto maiddái dat, ahte oahpahus lea oalát sámegillii, su iežas eatnigillii.

Video: Nilla-Ola Pieski

Nilla-Ola Pieski lea geargan bargat šibitdoallin ja snihkkárin, muhto dál rávesolmmožin ozai Sámi oahpahusguovddáža duodjeohppui.

Muhto ii dušše duoji dihte hálidan oahpu gazzat.

– Dieđusge okta válljenkritera lei, go oahpahus lea sámegillii. Munnje nu álki ja lunddolaš go iežas eatnigillii fitne oahpahusa, muitala Nilla-Ola Pieski. 

Bajásšattai duodjebearrašis

Imašbat dat, ahte duodji lea áli geasuhan go fanas- ja reahkadujiid guoras lea rávásmuvvan.

Nilla-Ola Pieski gazzá sámi oahpahusguovddážis duodjeoahppu.
Govva: Kirsti Länsman / Yle Sápmi

– Bearaš gos áhččerohkki lei duojár, mun lean das bajásšaddán, dat lea leamašan juohkebeaivválaš dat duodji. Veahá stuorát duojit ja unnit duojit. Álo leamaš gal ruovttus.

Mii duojis lea dakkár, mii geasuha?

– Dat lea go beassá gieđaiguin bargat, dat lea somá go lea hárjánan bargat gieđain. Dat lea hui lunddolaš aŋkke munnje.

Dievva ideat ja hálida dinet dujiin

Pieski gazzá oahpu Anáris, Sámi oahpahusguovddážis. Dát lea vuosttas geardi go garradujiid skuvlejupmi oahpahuvvo sámegillii.

Duoji ja duddjoma vuođđun leat sámiid kultuvra ja duodjeárbevierut, mat heivehuvvojit otná beaivvi dárbbuide.

Nilla-Ola Pieski
Govva: Kirsti Länsman / Yle Sápmi
Boahttevuođa plánat leat oalle čielgasat Nilla-Ola Pieskii.

– Juogaláhkai iskat dujiin bargat beaivválaččat. Sáhtášii dinet dainna muhtunláhkai. Diekkár ulbmilat mus leat. Áigi čájeha, mii livčče dat duodji.

– Lea gal olu dakkár ideat oaivvis, maid sáhtášii bargat. Muhto vuos oahppat ja oahpahallat dáppe, smiehtada Pieski.

Varrasamosat: Sápmi

Váldoođđasat

Varrasamosat

Muualla Yle.fi:ssä