Sápmi |

Duodjeoahppit duddjojedje buktagiid vuovdimassii Sámemusea Siidii – "Mávssolaš, oahpaheaddji ovttasbargu"

Sámi oahpahusguovddáža duodjeoahppiid ja Sámemusea Siidda ovttasbargoprošeavttaid atnet mávssolažžan buohkaide. Duodjeoahppi Katja Magga atná duddjodettiinis erenoamáš stuorra árvvus materiála.

Katja Magga
Duodjeoahppi Katja Magga dutkkadii skuvlaoappáidis ja -vieljaidis dujiid Siida Shopis. Govva: Saara-Maria Salonen / Yle

Sámemusea Siidda duodjebuvddas, Siida Shopis, Anáris leat dál vuovdinláhkai Sámi oahpahusguovddáža duodjeoahppiid unihkka buktagat.

Sámemusea Siida ja duodjeoahppit leat jo muhtun jagiid bargan ovttasbargoprošeavttaid, main oahppit plánejit ja duddjojit buktagiid vuovdimassii museai. Dán jagáš prošeakta lea dál gárvvis.

Báikkálašvuohta, kvalitehta ja eakti materiálat

Siidda ja duodjeoahppiid ovttasbargoprošektii oassálaste dán jagi Sámi oahpahusguovddáža nuppi jagi oahppit sihke garra materiálaid ja čikŋageađge- ja -metállalinjáin.

Oahppit galge čavčča áigge plánet golbma molssaeavttu buktagiin dahje iešguđetlágan variašuvnnaid ovtta buktagis ja de ovdanbuktit daid museagávppi vástuolbmui. Dan maŋŋá oahppit besse duddjogoahtit. Loahpalaš bohtosat, gárvves duojit čájehuvvohedje Siida Shop -bargovehkii ja áššehasaide dán vahkus.

Okta ovttabargoprošektii oassálastán duodjeoahppiin lea Pauli Jaatinen. Son lea duđavaš prošektii.

– Dát leamaš hirbmat buorre prošeakta, lean giitevaš dán vejolašvuođas. Dat lea oahpahan olu ja addán buorre vásáhusaid bargoeallimis, gulahallamis áššehasain ja nu ain.

Pauli Jaatinen
Duodjeoahppi Pauli Jaatinen duddjui Siida Shopii earret eará vuoktadoalana. Govva: Saara-Maria Salonen / Yle

Museagávppi beales prošeavttas lea vástidan Satu Airola. Son atná dákkár ovttasbarggu mávssolažžan.

– Dál go lean ieš oaidnán guokte ovttasbargoprošeavtta duodjeoahppiiguin de sáhtán dadjat, ahte dat lea hui mávssolaš sihke oahppiide ja midjiide. Mii leat ožžon vuovdimassii buktagiid, mat eai leat goassige ovdal leamašan mis.

– Midjiide buvddas dehálaš áššit leat buktagiid báikkálašvuohta, kvalitehta ja eakti materiálat. Mii leat dán prošeavttas gidden fuopmášumi maiddái dasa, ahte juohke buktagis livčče muitalus. Oahppit leat váldán dan bures vuostá, Airola giitala.

Katja Magga atná árvvus materiálaid

Duodjeoahppi Katja Magga duddjui ovttasbargoprošeavttas čiŋaid bohccosisttis. Son atná duddjodettiinis erenoamáš stuorra árvvus materiála.

– Mun lean duddjon Diehppi-nammasaš beallje- ja čeabetčiŋaid bohccosisttis. Daid geavaheaddji beassá dovdat dihpiid geahpasvuođa ja ostejuvvon sistti hája. Mun jurddašin, ahte go dál leat bivnnuhat sihke stuorra beallječiŋat ja diehpit, de moderniseren árbevirolaš sistti dákkár čikŋan.

– Nuppi, Siida-čiŋa lean duddjon bohccogaccas. Mun lean álggu rájes leamaš beroštuvvan duddjot gaccain. Dat lea hástaleaddji, muhto vuogas ja fiinna materiála. Bohccogaccas leat čáppa bárut oaidnimis. Dain sáhttá govahallat, mo boazu lea johtán duoddaris, das sáhttá oaidnit beaški buollašiid ja ijahis ija beaivváža. Gacca bárusteaddji hearvva sáhttá oaidnit dego časttasin duoddaris, Magga govvida.

Katja Magga
Duodjeoahppi Katja Magga. Govva: Saara-Maria Salonen / Yle

Oahppiid duojit leat vuovdimassii Siida Shopis gitta skábmamánu loahpa rádjai. Pauli Jaatinen sávvá olbmuid gávdnat sin dujiid.

– Doaivvu miel áššehasat gávdnet min buktagiid. Dat leat unihkka duojit, maid ii vealttakeahttá šat maŋŋelappos fidne. Ja dathan leat dieđus boahtteáiggi duodjemeaštáriid vuosttas duojit, ammahan daid árvu dušše loktana, Jaatinen čaibmá.

Varrasamosat: Sápmi

Váldoođđasat

Varrasamosat