Sápmi |

"Duodji lea dat maid mii duddjot justa dál" – Duojár Anniina Turunen duddjui earenomáš silkeliinni, mas lea maiddái politihkalaš muitalus

Duojár Anniina Turunen ráhkkanii Duodji dreamers -čájáhussii ruovttugilistis Anáris. "Mii leat ain dás" čuožžu su silkeliinnis, mainna son háliida čájehit, ahte duodji eallá ain.

Anniina Turunen valmistautuu Duodji Dreamers -näyttelyyn.
"Lean nu lihkolaš", rábmo Anniina Turunen dálán, go válddii gárvves silkeliinnis eret gággesmuorain. Govva: Sara Wesslin / Yle

Sámeguovllu oahpahusguovddáža visti Anára márkanis lea guorus geasseluomuid áigge, muhto gođđinlanjas gulat gákkesmuoraid litna jiena.

Duojár ja sámeduoji oahpaheaddji Anniina Turunen lea dáppe válmmaštallamen su silkeliinni Duodji Dreamers -čájáhussii.

Duoji sajádaga suokkardalli Duodji Dreamers -čájáhus rahppojuvvo boahtte vahkus Riddu Riđđu -festiválas.

Logi nuorra duojára suokkardit čájáhusas duoji sajádaga ođđamállet servodagas. Turunen lea okta dáin duojáriin ja son válljii gođđit silkeliinni.

– Silkeliidni, lea dábálaččat giissá siste. Mun gávdnen Sámi Dáiddamágasiinnas, Kárášjogas lei Mattias Baer duddjon giissá ja dat lei dat mu duodji, man vuođul mun duddjon juoidá dohko. Dán giissás ledje čáppa čoarvehearvvat ja mun bidjen dan dasa liidnái maiddái, muitala Anniina Turunen liinnis birra.

Video: Mii leat ain dás by Anniina Turunen
Video

Mii leat ain dás -teaksta muitala duoji sajádagas

Dán erenomaš liidnái Turunen lea gođđán teavstta "Mii leat ain dás", mainna son háliida čálmmustahtit sápmelaččaid sajádaga servošis.

– Dalle go duodji oidno, dat lea juo buorre. Háliidin čájehit, ahte duodji eallá ja duodji lea ain dás. Mii leat ain dás. Duodji sáhttá leat vaikko dákkár, smiehtada Turunen.

Anniina Turunen teki ensin prototyypit näyttelyhuivistaan.
Duojár Anniina Turunen duddjui vuos liinnis prototyyppa nappo vuosttas veršuvnnat. Govva: Sara Wesslin / Yle

Turusii buot dehálamos oassi duojis lea dat, ahte dat šaddá duojára mielas ja gieđain.

– Mun háliidan čájehit, ahte dákkár liinni ii dárbbaš oastit. Dat lea made in Sápmi, Sámis duddjon, iige leat boahtán Ásias. Dat lea šaddan mu oaivvis ja gieđain, čilge Turunen.

Duojárin son lea maiddái suokkardallan dán prošeavtta áigge, ahte mo duojis šaddá ieš sámi duodji?

– Dán lean maiddái smiehttan, ahte leago dat silkeliidni duodji? Lean dutkan mu pro gradus silkeliinni. Lean dutkan ja gođđán liinni ja dalle fuomášin dien, ahte dat ieš liidni ii leat duodji, muhto dasto go das leat riesaldagat, dalle go giinu lea riessan dan - dalle dat lea duodji, muitala Turunen.

Duodji Dreamers -čájáhus rahppojuvvo Riddu Riđus, Gallogiettis dán vahkus

Anniina Turunen čuohppá vel liinni eret gákkesmuorain ja lebbesta gárvves silkeliinni hárduid ala. Liidni juo measta šealgá pasteallaivnniin. "Mii leat ain dás"-dajahus lodnjá fiidnát liinnis.

– Mun lean nu lihkolaš, illuda Anniina Turunen.

– Ain lea bargu, de álggán riessut, dadjá son.

Video: Anniina Turunen valmistautuu Duodji Dreamers -näyttelyyn.
Video

Logi sámi duojára duojit leat oaidninláhkai Duodji dreamers -čájáhusas gaskavahku suoidnemánu 11. beaivvi. Čájáhusa rahpandoalut álget diibmu 18.

Duojárat, Anniina Turunen, Laila Mari Brandsfjell, Lisa Lyngman Gælok, Merethe Kuhmunen, Milana Sapelnikova, Niká Pittja, Ove Stødle, Patric Jonsson, Sandra Márjá West ja Sara Inga Utsi Bongo leat válljen ovtta buktaga Sámi Dáiddamágasiinnas, Kárášjogas, gáldun ođđa buktagii maid sii ieža duddjojit.

Oassin čájáhusas lea sihke buvtta, mii lei ođđa duoji ideagáldun, ja iežas dahkan ođđa buvtta. Duojáriin leat iešguđetlágán vuogit lahkonit bistevašvuođa duddjomis. Sii ovddastit ođđa duojárbuolvva ja bohtet iešguđet guovlluin Sámis.

Varrasamosat: Sápmi

Váldoođđasat

Varrasamosat

Muualla Yle.fi:ssä