Sápmi |

Duojár fakegávttis: Ovddasvástádus lea organisašuvnnas ja sii gal dihtet, man mielas sápmelaččat leat

Ii jahkige nu, ahte Suoma bealde ii leat jođus ságastallan fakegávttiid geavaheamis. Dálges suopmelaš Miss World -čábbodatgilvvohallama oassálasti Carola Miller lea govas gáktelagan biktasis – ja ságastallan lea vuot buollán. Duojára mielas ovddasvástádus lea missorganisašuvnnas, ii ovttaskas gilvvohallis.

Video: Bigga-Helena Magga

Guokte jagi dassái čierastalli Tanja Poutiainen čierastii maŋimuš gilvvus Levis ja ávvudii dan gáktelágan biktasis. Sápmelaččat reagerejedje garrasit áššái ja Poutiainen ánui ášši ándagassii maŋŋelabbos.

Seamma čuvla goit iđistii dál Miss World -gilvvu Suoma ovddasteaddji Carola Miller badjelii.

Duojár Bigga-Helena Magga atná unohassan, ahte ná geavvá nu dávjá. Son goit ii láitte gilvvohalli, muhto organisašuvnna doaimma duohkin.

– Mu mielas missorganisašuvdna hoigá ovddasvástádusa áššis dan nuorra nieidda ala. Mun lean aivve sihkkar, ahte Finnartist-organisašuvdna diehtá gáktelágan biktasa geavaheamis.

– Mu mielas lea organisašuvnna ovddasvástádus rávvet ja bagadit daid nuorra gilvvohalliid, ahte mii lea dohkkálaš ja mii ii, mii lea álbmotbivttas ja mii ii leat, oaivvilda Bigga-Helena Magga.

"Manin ii cokka alcces gulli álbmotbiktasa?"

Duojár Bigga-Helena Magga imaštallá, manin missgilvvuin oba lea álbmotbivttasoassi. Magga mielas gilvvohallit sáhtášedje coggat sidjiide gulli biktasiid.

– Imaštallan mun gal dange, ahte missgilvvohallamiin lea dakkár oassi, go álbmotbivttasoassi. Dat lea vehá munnje eahpečielggas, manin dat lea, muhto juos dainna lea ulbmilin buktit ovdan missgilvvohalli iežas duogáža, de dallehan son galggašii coggat dan álbmotbiktasa, mii sutnje gullá, Magga imaštallá.

"Galggašedje ovttasbargat sápmelaččaiguin"

Bigga-Helena Magga sávvá Finnartist-fitnodaga rávvet missiid váldit sápmelaččaide oktavuođa, jus geardde jagis nubbái háliidit geavahit sámegávtti.

– Unnimus maid sii sáhttet dahkat lea rávvet váldit oktavuođa sápmelaččaide, ahte livččii albma bivttas. Vai sii dihtet, man guovllu biktasa sii leat bidjame, ja ahte dat riekta gárvoduvvon ja das leat visot oasit mat dasa gullet, Magga dadjá.

Varrasamosat: Sápmi

Váldoođđasat

Varrasamosat

Muualla Yle.fi:ssä