Sápmi |

Duopmostuolut leat čájehan doarjaga eamiálbmotrivttiide USA:s

USA alimus riekti lea cealkán, ahte Oklahoma nuortaoassi gullá eamiálbmogiidda, ja Kolumbia biireriekti lea fas mearridan giddet Dakota Access -oljobohcci birasárvvoštallama áigái.

olju öljy dakota
Birassuodjaleaddjit ja Standing Rock Sioux -álbmot leat dáistalan máŋggaid jagiid Dakota Access -oljobohcci vuostá. Govva: Ewa-Mari Hedman / NRK Sápmi

Eamiálbmogiid rievttit leat USA:s ožžon mannan vahkus nana doarjaga duopmostuoluin.

Ovttastuvvon stáhtáid alimus riekti lea meroštallan, ahte Oklahoma oassestáhta nuortaoassi lea eamiálbmogiid guovlu. Geavadis dát mearkkašan aŋkke dan, ahte oassestáhta alaguoddit eai sáhte áššáškuhttit guovllu eamiálbmogiidda gullevaš olbmuid rihkkosiin, muhto áššiid ferte gieđahallat lihttostáhta duopmostuoluin.

Mearrádusa duohken lea eamiálbmotčerdii gullevaš albmá oaivil das, ahte oassestáhta eiseváldiin ii leamaš vuoigatvuohta áššáškuhttit su muscogee-čeardda guovllus dahkkon rihkkosis. Duopmu addui jagis 1997.

Alimus rievtti mearrádus lea imaštahttán Oklahomas ja maiddái lihttostáhta dásis. Mearrádusa ballet dagahit váttisvuođaid oassestáhta láhkagohcimii ja riektevuogádahkii.

Oklahoma oassestáhta ja guovllu vihtta eamiálbmotčeardda almmustahtte mannan vahkus oktasaš cealkámuša, man mielde oassebealit áigot bargat soahpamuša vuoigatvuođalaš doaibmaválddi juohkimis. Soahpamuš ovdanbuktojuvvo farggamusat lihttostáhta hálddahussii.

Kolumbia biireriekti lea fas mearridan Dakota Access -oljobohcci giddejuvvot birasárvvoštallama áigái. Duopmár James E. Boasberg mielde oljobohcci ii deavdde birasstándardaid.

Dát lea stuorra vuoitu birassuodjaleaddjiide ja Standing Rock Sioux -álbmogii, geat leat dáistalan máŋggaid jagiid Ovttastuvvon stáhtaid eiseváldiid vuostá suodjalandihte reserváhta čázádagaid.

Oljobohcci huksemis vástideaddji fitnodat Energy Transfer Partners lea almmuhan, ahte dat ohcá vugiid garvit giddema.

Eamiálbmogat vuostálaste oljobohcci huksema

Jagis 2017 válmmaštuvvan 1 900 kilomehtera guhkkosaš Dakota Access -oljobohcci johtá Missourijoga vuole Standing Rock -reserváhta davábealde, gos guovllu sioux-álbmot váldá geavahančázi jogas.

Eamiálbmogat vuostálaste oljobohcci huksema ja dolle miellačájáhusaid jagiid 2016 ja 2017 áigge. Maiddái sápmelaččat oassálaste proteasttaide.

Inger Biret Kvernmo Gaup ja Aslak Holmberg
Earet eará Inger Biret Kvernmo Gaup ja Áslat Holmberg vulggiiga Sámis 2016 smávva joavkkuin čájehit doarjaga báikkálaš sioux-čearddaide sin dáistaleamis oljobohcci vuostá. Govva: Adam Alexander Johansson

Varrasamosat: Sápmi

Váldoođđasat

Varrasamosat

Muualla Yle.fi:ssä