Sápmi |

Duorastat eahkedis beasat vásihit Ivgobađas earenomáš dáidaga – Lásságámmis skádjá dikta ja musihkka

Gullanláhkai lea earet eará Annukka Hirvasvuopio-Laiti áibbas ođđa lávlla, mii vuođđuduvvá Inger-Mari Aikio diktii.

Vuostegulgii-nammasaš girječállideaivvadeamis lea vuordimis sihke Inger-Mari Aikio ja Annukka Hirvasvuopio-Laiti iežaset dáiddalaš ovdanbuktimat ja Áillohačča dáidaga oasit.
Vuostegulgii-nammasaš girječállideaivvadeamis lea vuordimis sihke Inger-Mari Aikio ja Annukka Hirvasvuopio-Laiti iežaska dáiddalaš ovdanbuktimat ja Áillohačča dáidaga oasit. Govva: Antti Kalttopää

Odne duorastaga 4.7.2019 lea erenoamáš dilálašvuohta Ivgobađas, Omasvuonas, go Áillohaš-rohki huksehan viesus, Lásságámmis, sáhttá gullat divttaid ja musihka skádjamin čábbát.

Girječálli Inger-Mari Aikio ja musihkkár Annukka Hirvasvuopio-Laiti guoimmuheaba odne divttaiguin ja musihkain rájáid rasttildeaddji Väyläfestivála girječállideaivvadeamis.

Vuostegulgii-nammasaš girječállideaivvadeamis lea vuordimis sihke Inger-Mari Aikio ja Annukka Hirvasvuopio-Laiti iežaska dáiddalaš ovdanbuktimat ja Áillohačča dáidaga oasit.

– Jáhkán ahte mun logan sihke iežan boares ja ođđa divttaid, ja dasto muitalan iežan hommáid ja divttaid birra maiddái. Logan maiddái Áillohačča divttaid, go dat lea Áillohačča Lásságámmi. Lágideaddjit sávve, ahte mun logašin maiddái daid, muitala Inger-Mari Aikio.

Hirvasvuopio-Laitis lea fállun guldaleaddjiide juoidá áibbas ođđa.

– Mus lea ovdamearkka dihte okta áibbas ođđa lávlla. Dat lea IMA dikta, masa mu ustit, suopmelaš musihkkár Maija Kaunismaa, lea ráhkadan šuoŋa. Dat lea dieđusge hui somá, go IMA ii leat oba gullange vel dan, ahte šaddá gal speanta, govvida Hirvasvuopio-Laiti.

Aikio lea plánen mo sudno dáiddaduodji ovdána ja makkár divttaid son lohká. Hirvasvuopio-Laiti lávlu gaskkas.

"Dat energiija mii dan viesus lea, dat lea hui fámolaš" – Lásságámmi lea erenoamáš báiki

Lásságámmi lea jo ovddežis oahpis Inger-Mari Aikioi, guhte lea fitnan doppe moddii eará prošeavttaid olis. Annukka Hirvasvuopio-Laitii dát lea vuosttas geardi, go son fitná Lásságámmis. Aikio mielas Lásságámmi heive bures dákkár dilálašvuođaide.

– Dat lea duođaid das mearragáttis, de dat mearra lea dego okta seaidni dan viesus. Dat energiija mii dan viesus lea, dat lea hui fámolaš, čilge Inger-Mari Aikio.

Áillohaš váikkuhan sudno dáidagii – Livččego Aikio oba diktačálli Áillohačča haga?

Áillohaš lea váikkuhan sihke Aikio ja Hirvasvuopio-Laiti dáidagii, nugo maiddái máŋgga eará sámedáiddára bargui.

Áillohaččas lea hirbmat stuorra mearkkašupmi Aikio diktačálli eallimis, go son lea juo nuorran sádden iežas divttaid Áillohažžii.

Dál son smiehtadage ahte livččiigo son diktačálli, jus Áillohaš ii livčče beroštan vástidit sutnje.

– Son vástidii ja lei merkon iežas fiinna giehtačállagiin, ahte gokko ritma ii orron doaibmamin ja gokko fertešii ođđasis smiehttat dieid. Son maiddái rávvii, jus ledjen dego gollan sániiguin govven ášši, muittaša Aikio.

– Mun muittán, ahte ledjen nu beahttašuvvan, ahte manin son ii sáhte dadjat njuolga, ahte mii das lea endorii daid divttain. Gal mun maŋŋá áddejin, ahte dat lei buoremus, maid son sáhtii munnje dahkat. Dat lei stuorra skeaŋka munnje, muittaša Aikio.

– Áillohaš lea leamašan hui stuorra inspirašuvdna várra buot sámedáiddáriidda, beroškeahttá das man suorggi dáiddárat dat leat, jurdila Hirvasvuopio-Laiti.

Dán áigge Hirvasvuopio-Laiti ii leat geargan nu olu bargat musihkain, muhto lihkká Áillohaš lea su bargguin mielde.

– Mun lean bargan dainna iežan nákkosgirjjiin maŋimuš jagiid. Dan mu nákkosgirjji dutkanmateriálas leat guokte Áillohačča skearru, ahte dieđusge doppe Lásságámmis mun muhtun cealkagiiguin muitalan dan iežan barggu birra ja mo Áillohaš dasa laktása.

Väyläfestivála nohká odne duorastaga 4.7.2019 Vuostegulgii-girječállideaivvadeapmái Lásságámmis, Ivgobađas. Girječállideaivvadeapmi álgá Norgga áiggis dii. 17:30. Sisabeassan lea nuvttá.

Väyläfestivála prográmma gávnnat dáppe.

Inger-Mari Aikio ja Annukka Hirvasvuopio-Laiti leigga mielde Yle Sámi Johtti radio -sáddagis 4.7. Guldal dás sudno jearahallama. Jietna: Yle Areena.

Varrasamosat: Sápmi

Váldoođđasat

Varrasamosat

Muualla Yle.fi:ssä