Sápmi |

Duortnosjohkaleahkái leat sirdásan Deanu turisttat – "Oktage almmái dajai 31 jagi suhkan Deanu alde, muhto ii áigon šat"

Duortnosjohkaleagis leamaš olu turisttat dán geasi, vaikko luossa ii leat gorgŋon nu bures. Stuorra olmmošmearri ii goittotge leat sirdásan Deanus Duortnosjohkii bivdit.

Torniojoki Aavasaksalta
Govva: Yle / Heidi Hannukainen

Dán jagi fitnodatdoallit Deanuleagis leat leamaš heađis, go turisttat orrot jávkan Deanu alde. Ođđa, garrasabbot ráddjejuvvon bivdu ja galbma geassi lea balddihan turisttaid eará sajiide.

Mannan vahkus deaivvaimet Ohcejohkalaš fitnodatdoalli Uula Tapiola, gii árvalii turisttaid mannan Duortnosjoga ala bivdit, dál go Detnui ii oaččo šat nu álkit lobiid. Fitnodatdoallit Duortnosjohkaleagis nannejit dán árvalusa.

"Ođđa muođut dáppe"

Lappean Loma -fitnodatdoalli Jari Marjala Kolaris lohká, ahte Duortnosjoga alde gal oidnojit muhtun ođđa olbmot, geat leat ovdal johtán Deanus bivdimin.

Luosat eai leat gorgŋon nu bures iige luossa leat goddon nu bures go mannan jagi Duortnosjogas.

– Ođđa muođut leat ihtán deike Duortnosjohkaleahkái, ja dainna ládje áššehasmearit leat lassánan, Marjala muitala.

Marjala lea sosiála medias oaidnán, ahte bivdojoavkkut leat sirdásan Deanus Duortnosjohkii oahpahallat bivdit ođđa jogas.

"Galhan sii leat behtton"

Lempeän Suvanto -fitnodatdoalli Tarmo Koivumaa Pellos lohká, ahte áššehasat leamaš olu dán geasi ja olbmot orron duđavažžan, vaikko guollesálaš ii leatge dán jagi leamaš áktánas mannan jagi ektui.

Su fitnodagas maid oidno čielgasit, ahte Deanu turisttat leat sirdásan Duortnosjogas bivdit.

– Lea dat misge oidnon čielgasit, ahte eanet ja eanet olbmot leat fitnan duos ovdal jonssohiid, jonssotvahkus ja mannan vahkus, Koivumaa dadjá.

– Oktage almmái dajai, ahte 31 jagi suhkan Deanu alde, muhto ii áigon šat mannat dohko. Lea nu váttis dat hommá doppe, divrras ja ráddjejuvvon. Áiggui sirdásit Duortnosjogas bivdit.

Luossabivdit geat ovdal láven guolástit Deanu alde leat behtton Deanu ođđa guolástannjuolggadusaide.

– Eaihan dat sihkkarit rápmon leat dan, ahte ráddjehusat ja visot hehttejit ja galhan sii leat leamaš behtton dieđusge, Koivumaa dadjá.

Čáhkket eambboge turisttat

Tarmo Koivumaa oainnášii mielastis vel eambboge luossaturisttaid Duortnosjohkaleagis. Su mielas maiddái turisttaide ordnejuvvon bálvalusat ovdánit olles áigge, vaikke turisma ii leatge vel seamma dásis go Deanuleagis. 

– Mii leat easkka hárjehallamin dán hommá, jos Detnui veardida. Muhto gulul mii dan ovddidit ja dan galgáge ovddidit, Koivumaa lohká.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä