Sápmi |

Dušše vuosttas dievasčoahkkimis ledje buot áirasat báikki alde – Okta sámedikki áirras lea maŋimuš guokte jagi dassái oasálastán dievasčoahkkimii

Gávcci áirasa leat politihkken viššalit. Jándora vuordima maŋŋá eanemus čoahkkimiin eret leamašan Tanja Sanila vástida Yle Sápmái čálalaččat, manin lea jávkan čoahkkimiin.

Sámediggi 2016–2019. Saamelaiskäräjät 2016–2019.
Dán válgabajis 2016-2019 leat dássážii čoahkkimastán 13 geardde. Dušše dán vuosttas čoahkkimis 23-24.2.16 ledje visot áirasat báikki alde. Govva: Vesa Toppari / Yle

Áidna válgaáigodaga 2016–2019 čoahkkin, goas buot sámedikki áirasat leat leamašan báikki alde, lei vuosttas dahjege ortniiduvvan čoahkkin.

Muhtun stuolut sámedikki čoahkkimiin leat leamašan dávjjit guorusin go earát. Eanemus čoahkkimiin lea jávkan Tanja Sanila. Maŋimuš háve son lea oasálastán sámedikki dievasčoahkkimii guokte jagi dassái, namalassii 19.6.2017. Dán válgabajis son lea oasálastán golmma dievasčoahkkimii.

Yle Sápmi lea viggan fáhtet su ságaide telefovnna, teakstadieđu, šleađgapoastta ja Facebook bokte, muhto eat fáhten su ságaide olles maŋŋebárgga áigge.

Jándora vuordima ja máŋggaid dieđuid maŋŋá eanemus čoahkkimiin eret leamašan Tanja Sanila vástida Yle Sápmái čálalaččat.

– In sáhte dohkkehit dan siskkáldas vealaheami ja bilkideami, mii dál dáhpáhuvvá ja dohkkehuvvo Sámedikkis dihto sámejoavkkuid ja válggaiguin válljejuvvon luohttámušolbmuid vuostá. In hálit oasálastit almmolaš bilkideapmái dievasčoahkkimiin nu ahte oba boađášin báikki ala. Vuorddán dušše ahte dát válgabadji nohká, čállá Sanila.

Sámediggi Troandimis 8.2.2017
Sámedikki čoahkkin Troandimis 8.2.2017. Govas áirasat Nilla Tapiola, Anu Avaskari, Tanja Sanila, Antti Sujala, Pigga Keskitalo ja Kari Kyrö. Dán joavkkus eanemus čoahkkimiin lea jávkan Tanja Sanila. Viššalamos čoahkkimastit dán govas leat Anu Avaskari ja Kari Kyrö. Govva: Sara Wesslin / Yle

Nubbin eanemus čoahkkimiin lea leamašan eret Jouko Hetta.

– Munnjehan geavai nu, ahte buohcagohten garrasit. Gárten veallát golbma mánu. Das go viimmat čuožžilin, de váhkkaseapmi válddii áiggi, muitala Hetta.

– Dievasčoahkkimat leat dehálaš báikkit váikkuhit, muhto gal lávdegottiinge bastá dan dahkat.

Dušše vuosttas čoahkkimis ledje buohkat mielde

Dán válgabajis 2016-2019 leat dássážii čoahkkimastán 13 geardde. Vuosttas čoahkkimis ledje buohkat báikki alde. Measta seamma bivnnut lei Troandima čoahkkin 8.2.2017 go sámedikki áirasiid girddihedje dohko čoahkkimastit. Dušše okta áirras ii vuolgán Troandimii.

Maiddái mannan čakčamánu dievasčoahkkimis ledje meastta buohkat báikki alde. Dalle gieđahalle Sámediggelága ođasmahttima.

Gávccis čohkkán juohke čoahkkimis – Ságadoallit leamašan juohke čoahkkimis

Muhtun sámepolitihkkarat leat fas hui viššalat čoahkkimastit. Gávccis sis leat oasálastán juohke áidna čoahkkimii. Sii leat ságajođiheaddji Tiina Sanila-Aikio, vuosttas várreságadoalli Heikki Paltto, nubbi várreságadoalli Tuomas Aslak Juuso, Anu Avaskari, Veikko Feodoroff, Kirsti Kustula, Kari Kyrö ja Magreta Sara.

Dát joavku leamašan juohke áidna sámedikki dievasčoahkkimis.
Dát joavku leamašan juohke áidna sámedikki dievasčoahkkimis. Govva: Vesa Toppari / Yle

Feodoroff muittuha, ahte čoahkkimiidda lea álki gávdnat áiggi.

– Galhan dat lea nu, ahte čoahkkimat eai leat go golbmii njelljii jagis. Čoahkkinbeivviid maid diehtá buriin áiggiin, dadjá Feodoroff.

– Dievasčoahkkin lea dat gos lea eanemus váldi sámedikkis. Čoahkkimis don sáhtát ovddidit, doarjut ja joba vuostálastit áššiid. Dievasčoahkkin lea min kulturiešmearrideamis dat báiki gos sáhttá váikkuhit áššiide.

Maiddai Kustula oaidná, ahte čoahkkimiidda oasálastin lea dehálaš.

– Mu leat válggain válljen dán luohttámušdoibmii. Háliidan bargat dán barggu duođai bures. Sámedikki áirasa bárgu manná eará áššiid ovddabeallai.

– Go lea jienasteddjiin ožžon mandáhta bargat dáppe sin ovddas, de dalle ferte vuodjut áššiide ja maiddái oasálastit mearrádusaid dahkamii, dadjá Kustula muhto muittuha, ahte politihkken ii dáhpáhuva dušše čoahkkinsáles muhto maiddái lávdegottiin.

Sámediggi mearridii maŋŋebárgga, ahte válggaid háliidit maŋidit Jus evttohus manná riikkabeivviin čađa, de dát válgabadji bistá vel badjel guokte jagi, dalle áirasiin lea vejolašvuohta čohkkát čoahkkimiin dávjjit dahje dasto jávkat dain.

19.6.2019 diibmu 8:31: Divvojuvvon gaskavahkku maŋŋebárgan.

19.6.2019 diibmu 12:45: Dievasmahtton Tanja Sanila kommeanttain.

Varrasamosat: Sápmi

Váldoođđasat

Varrasamosat

Muualla Yle.fi:ssä