Sápmi |

Ealgalobiid mearri sámegielddain njiejai diimmážis lagabui 700 lobiin

Olles Lappi eanagoddái mieđihuvvui 8 715 ealgalobi, maiguin lea vejolaš goddit badjel 12 000 ealgga.

Hirvi kävelee tiellä
Buot sámegielddain mieđihedje dán jagi uhcit ealgalobiid go diibmá. Arkiivagovva. Govva: Tommi Parkkinen / Yle

Bivdobaji 2021–2022 ealgalohpemearit leat almmustahtton. Buot sámegielddain ealgalohpemearri njiejai diimmáža ektui, ja nu dat dagai olles Lappi eanangottis.

Ohcejohkii lobiid mieđihedje 123, mii lea guhtta lobi uhcit go diibmá. Anárii lobiid mieđihedje 1 238, go diibmá mearri lei 1 796. Eanodagas lohpemearri njiejai 155 lobis 129 lohpái. Soađegilis lohpemearri geahppána diimmá 665 lobis 563 lohpái.

Olles Lappi eanangoddi lohpemearri njiejai 8 714 lohpái diimmáža 11 041 lobis.

Bivdolobit 2021–2022

Bivdolobit 2021

Jahkái 2021 ohccon lobit

Bivdolobit 2020

Ohcejohka123185

129

Anár1 2384 299

1 796

Eanodat129226

155

Soađegilli563798

665

Olles Lappi eanangoddi8 71416 61011 041

Ohcejoga fuođđodikšunsearvvi doaimmajođiheaddji Jarmo Helander muitala, ahte sii ohce lobiid maiddái oktašmeahccái Anára gieldda beallái, ja dat leat automáhtalaččat boahtán Ohcejoga fuođđoguovddáža statistihkaide. Son čilge ahte ohccon 185 lobis leat 12 ealgga ohccon Anár gieldda beallái, nappo Ohcejohkii lobit ledje ohccon 173.

Helander muitala iežas leat duđavaš fuođđodikšunsearvái mieđihuvvon bivdolobiid mearrái. Son dadjá, ahte Ohcejogas ealgabivdolobiid mearri lea bisson sullii seammán badjelaš logemat jagi.

Helander oaidná lohpemeari leat buorre maiddái Ohcejoga ealganáli ektui.

– Go smiehttá mis dat bivdoproseanta jorrá die sullii 80 proseanttas, de dan 123:s várra fidnašuvvá sullii čuođi ealgga, árvala Helander.

Čavčča 2021 bivdobadjái mieđihuvvon bivdolohpemearri vuođđuduvvá Lappi guovllolaš fuođđoráđi giđđat 2021 ásahan mihttomeriide das, man olu iešguđet guovlluide galggašedje čáhkat ealggat. Mihttomearit leat ealgadoalloguovlluid guovdu ja dat leat fámus golbma jagi.

– Mihttomearregaskkaid čuvvon ealganálli Lappis lea 13 481–18 109 ealgga, gaskamearálaččat sulaid 15 800 ealgga. Nálli lea njiedjan Luondduváriidguovddáža nálleárvvoštallama mielde jagiid 2016–2017 alimus dásis 25 000 ealggas 18 000 elgii. Maŋimuš nálli leamašan dán dásis jagi 2012, čállá Fuođđoguovddáš dieđáhusastis.

Fuoddoguovddážis muitalit, ahte boahttevaš baji bivdui mieđihuvvon lohpemearri dahká vejolažžan náli geahpedeami eandalii Anáris ja Oarje-Lappis, gos dálvenálli lei ásahuvvon mihttomeriid bajábealde.

Diibmá lobiin geavahedje 71 proseantta

Mannan bivdobajis Lappi eanagottis godde oktiibuot 9 278 ealgga, main váile goalmmátoassi ledje miesit. Mieđihuvvon 11 403 bivdolobis geavahedje 71 proseantta. Dál olles Lappi eanagoddái mieđihuvvon ealgalobiin lea vejolaš goddit badjel 12 000 ealgga.

Ealgabivddu vuosttas bivdoáigodat Davvi-Suomas lea 1.9.–20.9. Nubbi bivdoáigodat álgá vahku árabut go leat hárjánan, dat álgá 2.10. ja nohká 15.1. Boazodoalloguovllus beatnaga geavaheapmi bivddus lea gildojuvvon 1.1.–15.1.

– Bivddus galgá váldit vuhtii eará luonddus johttiid ja giddet earenoamáš fuomášumi dasa, ahte bivdu dáhpáhuvvá dorvvolaččat, muittuhit Fuođđoguovddáža dieđáhusas.

Varrasamosat: Sápmi

Váldoođđasat

Varrasamosat

Muualla Yle.fi:ssä