Kaikki talviolympialaisista!
Sápmi |

Ealli arkiiva lea fállan vuorkáságaid dál jagi

Sámegielat radioprográmmat maŋimuš 50 jagis leat beroštahttán eandalii rikkis giela dihte. Eanemus guldaluvvon ja juogaduvvon muitalus gieđahallá boazosániid.

Kuva Ealli arkiiva -etusivusta
Ealli arkiiva -siidui beassá earret earáid Yle Sámi váldosiiddu bokte. Govva: Yle

Yle Sápmi rabai Sámi álbmotbeaivvi 2017 neahttasiidosbáikki sámegielat vuorkáprográmmaide. Jagis doaimmahus lea almmuhan badjelaš 120 arkiivaságastallama oktan artihkkaliin mas čilgejuvvo arkiivabátti duogáš.

Bivnnuhamos vuorkábáttis eallilan boazosápmelaš válddahallá bohcco namahusaid agi ja guolgga mielde

Eanemus gerddiid (badjel 850 geardde) Ealli arkkiva geavaheaddjit leat rahpan ártihkkala Bohcco namahusat agi, guolgga ja čorvviid mielde. Das Niiles Aslak Niittyvuopio muitala dehalamos sániid mat gusket bohcco válddahallamii ja bohcco sierra gorutosiide.

Ságastallan lea báddejuvvon jagis 1999. Dán artihkkalis lea maid eanemus facebook-doaimmat nugo juogadeamit, kommeanttat dahje liikomat.

Badjel 300 geardde rahppojuvvon ja maiddái divdna guldaluvvon báddejumit leat Jumbál-Rávdná máinnasta ja Vilho Pohjanrinne biilafearánat dološ johtolagain.

Buot dát golbma namuhuvvon muitaleaddji leat juo vádjolan eret dán máilmmis.

Vuorkáságat golmma sámegillii

Facebook-doaimmaid geahčadettiin eanemus beroštumi lea fidnen nuortasámegielat ja suomagielat arkiivadoaimmahusaid oktasaš prográmmačoakkáldat nuortalaččaid lávlunárbevierus.

Doaimmahusas lea bargan okta olmmoš vahkkosaččat davvisámegielat almmuhemiin. Anárašgillii ja nuortalašgillii artihkkalat ja ságastallamat leat almmuhuvvon dađi mielde go doaimmahusas leamaš vejolašvuohta dasa luvvet bargi.

Ealli arkiiva bokte beassá guldalit dál sullii 70 davvisámegielat ságastallama, badjelaš 40 anárašgielat Ellee arkkâdâh vuolggahusaid ja logemađi nuortalašgielat Jieʹlli arkiiv vuorkáságaid.

Moatti Ealli arkiiva -prográmmas gullo maiddái suoma giella, muhto suomagielat fálaldaga váldosiidu lea Elävä arkisto.

Ealli arkiiva -neahttasiidduin olbmot ohcet maid fulkkiid dahje oahppásiid jiena, buriid dadjanvugiid ja suopmanerohusaid. Ovdamearkkadihte dán Skuvllaalbmá-Ásllat Olle máidnasa guldalettiin olbmot leat ádjánan guhkebuš go dábálaččat vuorkáprográmmas.

Yle Sápmi joatká vuorkáprográmmaid almmuheami Ealli arkiiva -siiduin. Radios vuorkáprográmmaid beassá gullat anárašgillii maŋŋebárggaid, nuortalašgillii gaskavahkuid ja davvisámegillii duorastagaid. Buot vuorkáprográmmat sáddejuvovjit vuos diibmu 10.00 ja nuppádassii diibmu 14.00.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä