Sápmi |

Eamiálbmogiid bissovaš foruma maŋidit koronavirusa dihtii – ságadoalli: "Njoammudávddat sáhttet dagahit stuorra vahágiid eamiálbmotservodagaide"

Bissovaš forum galggai čoahkkanit cuoŋománus. Árvalus lea, ahte čoahkkin maŋiduvvo čavčča beallai.

Chandra Roy-Henriksen, Anne Nuorgam
Bissovaš foruma lahtut deaivvadedje guovvamánus Anáris. Govas čállingotti jođiheaddji Chandra Roy-Henriksen ja ságadoalli Anne Nuorgam. Govva: Tuomas Hautaniemi / Yle

ON eamiálbmogiid bissovaš forum galggai čohkket eamiálbmogiid miehtá máilmmi New Yorkii cuoŋománus. Máilmmis goit leavvá koronavirus ja danin galget dál sirdit čoahkkima, muitala bissovaš foruma ságadoalli Anne Nuorgam.

– Mii fertet muitit, ahte máŋggat álgoálbmotservodagat leat oalle rašes dilis, ja njoammudávddat sáhttet dagahit hui stuorra vahágiid.

Ođđa čoahkkináigi ja -báiki ii leat vel dieđus. Dain áigot mearridit sullii mánotbaji geažes.

– Vejolašvuohta lea maiddái sirdit čoahkkima New Yorka olggobeallai danin, ahte čavčča bealde sáhttet leat oalle ollu čoahkkimat New Yorkas, go dán jagi ON ávvuda iežas 75 jagi, muitala Nuorgam.

Árvalus lea, ahte ođđa čoahkkin sirdása čavčča beallai ja dat lea oanehut go dábálaččat, daningo olu earátge čoahkkimat sirdojuvvojit dál koronavirusa dihtii dán giđa.

"Eat hálit dagahit dan, ahte njoammudávda leavvagoahtá"

Lagabui 2 000 olbmo miehtá máilmmi lávejit čoahkkanit New Yorkii ON eamiálbmogiid bissovaš forumii juohke jagi. Nuorgam muitala, ahte dán rádjai čoahkkimii ledje almmuhan jo 1 100 olbmo. Almmuhemiid vurde eamboge.

– Álgoálbmogiidda livččii lean dehálaš čoahkkanit, muhto go lea dákkár njoammudávda jođus, de dasahan mii eat veaje maidige.

Nuorgam mielas dákkár dilis lea buoret leat várrugas.

– Eat mii háliit dan dagahit, ahte dat njoammudávda leavvagoahtá gosnu dakkár boaittobeale álgoálbmotguovlluin, gos ii leat mangelágan dálkkodeapmi oažžumis.

Varrasamosat: Sápmi

Váldoođđasat

Varrasamosat

Muualla Yle.fi:ssä