Sápmi |

Eamiálbmogiid filbmafestivála Skábmagovat lahkona – Nissonenergiija ja gielaid ávvuriemut oidnojit dán jagi prográmmas

Badjel guokte goalmmátoasi dán dálvvi Skábmagovaid prográmmas leat nissoniid buvttadusat.

Nissoniid ja Mátta-Amerihká eamiálbmogiid filmmat lea guovddážis
Govva: Outi Pieski / Skábmagovat

Farga vuot Anára gilli dieviha ealligovain beroštuvvan olbmuin, go eamiálbmogiid filbmafestivála Skábmagovat ordnejuvvo ođđajagimánu loahpas 22. háve. Skábmagovat lea máilmmi boarrásamos eamiálbmotfilbmafestivála.

Skábmagovaid veahkkebuvttadeaddji Anni Koivisto muitala, ahte dán jagi temán lea oktavuohta eatnamii ja eamiálbmogiid erenomášvuođat luonddubirrasiin.

Son sávvá, ahte festivála sisdoalut buktet jurddašanveara gussiide.

– Mii háliidit bohciidahttit olbmuid jurddášit, ahte maid sii sáhtášedje oahppat eamiálbmogiid eallinvugiin ja eallit dássedeattus ovttas luondduin, dadjá Koivisto.

Skábmagovien apulaistuottaja Anni Koivisto.
Skábmagovaid veahkkebuvttadeaddji Anni Koivisto hástála festiválagussiid jurddášit oktavuođaset lundui. Govva: Kirsti Länsman / Yle

Badjel guokte goalmmátoasi dán dálvvi Skábmagovaid prográmma sisdoaluin leat nissoniid buvttadusat. Filmmain boahtit oaidnit nu Jaskes ábi sulluid Ruošša siseatnamiin, go govaid Sámi duoddariin. Koivisto namuhage, mo nissonat leat hálddašan eamiálbmotfilmmaid buvttadusaid máilmmis.

Dán jagi Skábmagovaid filmmat gieđahallet ovdamearkka dihte bearašveahkaválddi veahkeheami geahččanguovllus, Meksiko nuoraid fárrema gávpogiidda ja nissonvuođa gažaldagaid Jaskes ábi sulluin.

Dán dálvvi temáguovllu, latinaláš Amerihká filmmat bohtet sihke Perus, Kolumbias, Meksikos ja Brasiliasge. Filmmaid bokte beassá čuovvut dálkkádatrievdama váikkuhusaid nissoniid eallimii Andiin ja árbevieruid sirdima hástalusaid modearna máilmmis.

Oscar-evttohas ja gielaealáskahttin oassi dán jagáš prográmma

Sápmelaš ealligovaid spektra olle Sámi allaskuvlla filbmasuorggi studeanttaid dujiin gitta blackfoot-sápmelaš Elle-Máijá Tailfeathersa bálkkašuvvon debyhtafilbmii The Body Remembers When the World Broke Open.

Ollislaččat Skábmagovaid prográmmas oidnojit badjel 30 álbmoga duojit ja váldogielaid lassin čájáhusbáikkiin čudjet 24 eamiálbmotgiela.

Festiválas čájehuvvojit maiddái vuosttas filmmat aimara- ja haidagielain: Óscar Catacora fikšuvdna Wiñaypacha lei Peru Oscar-evttohas jagis 2019, go fas Gwaai Edenshawa ja Helen Haig-Browna myhtalaš Sgaawaay K'uuna doaimmai hui áitatvuloš haidagiela ealáskahttima dehálaš bargobadjin Kanadas.

Olles Skábmagovaid prográmma sáhttá geahčastit dáppe.

Skábmagovilla nähdään Gwaai Edenshawan ja Helen Haig-Brownin myyttinen Sgaawaay K'uuna
Gwaai Edenshawa ja Helen Haig-Browna "Sgaawaay K'uuna" lea áitatvuloš haidagillii. Govva: Sgaawaay K'uuna -filbma

Filbmačájáhusaid maŋŋel liggehallet eamiálbmotmusihka rytmii Skábmaklubbas

Festivála oktavuođas ordnejuvvojit maid oalgedáhpáhusat, degomat rumbodánssa Ruonáeatnamis, musihka klubbaeahkediin, sirdašuvvama čuovvovaš logijahkái Virtual Reality bokte ja lávvardateahkeda erenoamáščájáhusa, mii sisttisdoallá ságastallama áitagiin, mat uhkidit eamiálbmogiid.

Eamiálbmogiid ealligovvafestivála Skábmagovat ordnejuvvo Anáris 23. - 26.1.2020.

Ealligovvačájáhusat ordnejuvvojit sámemusea ja luondduguovddáš Siiddas, kulturguovddáš Sajosis ja muohttagis ráhkaduvvon guovssahasteáhteris, gos filmmaid beassá geahččat olgun.

Skábmagovaid ordne Sámedáidaga doarjjasearvi ovttasbarggus sámekulturguovddáš Sajosiin, sámemusea ja luondduguovddáš Siiddain, Sámi oahpahusguovddážiin, Yle Sámiin sihke Anára gielddain.

Varrasamosat: Sápmi

Váldoođđasat

Varrasamosat

Muualla Yle.fi:ssä