Sápmi |

Eana- ja vuovdedoallováljagoddi oahpásmuvai Deanu soahpamuša váikkuhusaide: "Lea dehálaš smiehttat, maid dán áššái sáhttit bargat"

Olu eana- ja vuovdedoallováljagoddi ii dán muttus lohpidan bargat ášši buorideapmái. Boahtte áiggi ektui sin mielas lea dehálaš, ahte Deanu luossanáli dilis gávdno dutkandiehtu.

Eana- ja vuovdedoalloválljagotti deaivvadii Ohcejoga báikkálaš doaibmiid ovddasteaddjiiguin.
Eana- ja vuovdedoallováljagotti deaivvadii Ohcejoga báikkálaš doaibmiid ovddasteaddjiiguin. Govva: Vesa Toppari / Yle

Riikkabeivviid eana- ja vuovdedoallováljagotti ságajođiheaddji, guovddášbellodaga riikkabeaiáirras Anne Kalmari lea hirpmástuvvan Deanu bivdosoahpamuša váikkuhusain báikkálaš olbmuid bivdorivttiide ja olles Ohcejoga gieldda guovlluekonomiijai. Son goit deattuha, ahte Suopma stáhta fertii Norgga maŋis dohkkehit ođđa Deanu soahpamuša.

– Galhan das leamašan stuorra negatiivvalaš váikkuhus fitnodatdoibmii ja lea dehálaš, ahte mii smiehttat, maid dán áššái sáhttit bargat. Báikki olbmot leat dieđusge gillán dán Deanu bivdosoahpamušas, muhto buohkat sihkkarit áddejit, ahte go Norggain ii lean soahpamuš fámus, juoidá lei baggu bargat. Lea dehálaš gullat báikkálaš oainnuid, de geahččat dasto sáhttitgo juoidá dasto bargat, dadjá Kalmari.

Anne Kalmari
Riikkabeivviid eana- ja vuovdedoallováljagotti ságajođiheaddji, guovddášbellodaga riikkabeaiáirras Anne Kalmari lea hirpmástuvvan Deanu bivdosoahpamuša váikkuhusain Ohcejogas Govva: Vesa Toppari / Yle

Eana- ja vuovdedoallováljagoddi galledii maŋŋebárgga ja gaskavahku Ohcejogas ja doppe deaivvadedje báikkálaš doaibmiid ovddasteaddjiid. Váljagoddi lei vuolgán oahpásmuvvat diibmá fápmuiboahtán Deanu soahpamuša váikkuhusaide.

Olu váljagoddi ii dán muttus lohpidan bargat dála dili buorideapmái. Kalmari dadjá, ahte guolástuslága 10. paragráfa oasil fertejit smiehttat, sáhttetgo dan oasil bargat maidige. Boahttevuođa ektui son buktá ovdan, ahte lea dehálaš oažžut dárkilis dutkandieđu luosaid meriin.

Guldal Anne Kalmari jearahallama Yle Areenas.

"Buorre ahte fitne, muhto menddo maŋŋit"

Ohcejoga girkosiidda guolástangotti ságadoalli Mika Aikio mielas lei buorre, ahte váljagottis lea beroštupmi Deanu soahpamuša váikkuhusaide. Dan son goit doallá ártegin, ahte sii bohtet easka dál oahpásmuvvat áššái.

– Dieđusge leihan dat hirbmat buorre, ahte dat fitne oahppomátkkis dáppe, muhto menddo maŋŋit. Vihtta jagi biste Deanu soahpamuša ráđđádallamat ja de bohtet maŋŋá, de dat váhá suhttada, dadjala Aikio.

Mika Aikio
Ohcejoga girkosiidda guolástangotti ságadoalli Mika Aikio. Govva: Vesa Toppari / Yle

Galledeami áigi maid vehá hárddii Aikio, go maŋimuš golgadanbeaivve galggai joga alde vuolgit váljagotti deaivvadit.

– Buorre goittotge, doaivvu mielde dat dál guldalit.

– Máŋggas váljagotti lahtuin dajai ahte feaillat leat ja daid galggašii divvut, ja diesa gal bázii. Muhto buorre ahte dovddastit, ahte feaillat leat, dadjá Aikio.

Guldal Mika Aikio jearahallama Yle Areenas.

Varrasamosat: Sápmi

Váldoođđasat

Varrasamosat