Sápmi |

Eanodaga Bealdovuomi skuvlla evttohit heaittihit jo dán jagi bealde

Eanodaga gieldda eallinfápmolávdegoddi evttoha, ahte Bealdovuomi skuvlla oahpahus sirdojuvvo Heahtá vuođđoskuvlii boahtte jagi álggus rájes.

bealdovuomi skuvla
Govva: Anni-Saara Paltto / Yle

Eanodaga Bealdovuomi skuvlla evttohit heaittihit jo dán jagi.

Eanodaga gieldda eallinfápmolávdegoddi gieđahalai ášši dán vahkkus ja evttohage dál ovttamielalaččat Eanodaga gielddaráđđehussii ja váldostivrii Bealdovuomi skuvlla heaittiheami. Evttohusa mielde sihke Bealdovuomi skuvlla mánát, luohkkáoahpaheaddjit ja eará bargoveahka sirdásit Heahtá vuođđoskuvlii jo boahtte jagi álggus.

Dálá dilis Bealdovuomi skuvllas leat vuođđooahpahusas guhtta oahppi. Vuođđooahpahusas leat mánát ovdaskuvllas gitta nuppi luohkkái. Eanodaga gieldda čielggadeami mielde smávva skuvllas leamašan váttis olahit pedagogalaš mihttomeriid. Čielggadeamis árvalit maiddái, ahte smávva skuvla sáhttá hehttet mánáid sosiálalaš ovdáneami.

Bealdovuomi skuvlla vejolaš heaittiheamis lágiduvvo gullandilálašvuohta Bealdovuomi skuvllas skábmamánu 14. beaivve diibmu 17. Eanodaga gielda bivdá maiddái olbmuin ja oassebeliin oaiviliid ja evttohusaid áššis. Oaiviliid galgá doaimmahit čálalaččat Eanodaga gildii skábmamánu 15. beaivve rádjái.

Dálá dilis Bealdovuomi skuvla lea áidna unna giliskuvla Eanodaga gielddas. Skuvlla leat áitán heaittihit máŋgii ovdalge. Jagis 2016 Bealdovuomi skuvlla 3.–6. luohká oahppit vázzigohte skuvlla Heahtás. Dušše 0.–2. luohkkálaččat báhce Bealdovuopmái.

Eanodaga gielddas leat skuvllat Gilbbesjávrris, Gárasavvonis, Heahtás ja Bealdovuomis.

Varrasamosat: Sápmi

Váldoođđasat

Varrasamosat

Muualla Yle.fi:ssä