Sápmi |

Eanodaga giellabeassedoaibma ii beasa johtui – eai gávdno bargit

Guokte sámegielat bearašbeaivedivššára báikki ledje rabas jo suoidnemánus ja nuppes fas borgemánus, muhto Eanodaga gielda ii leat ožžon ovttage ohcamuša.

Säde Hautamäki Enontekiön vs. varhaiskasvatusohjaaja
Eanodaga gieldda vs. árrabajásgeassinbagadeaddji Säde Hautamäki. Govva: Anni-Saara Paltto / Yle

Davvisámegielat giellabeassedoaibma ii beasa vel dánge čávčča johtui Heahtás ja Bealdovuomis. Guokte sámegielat bearašbeaivedivššára báikki ledje rabas jo suoidnemánus ja nuppes fas borgemánus, muhto Eanodaga gielda ii leat ožžon ovttage ohcamuša daidda bargguide.

Eanodaga gieldda árrabajásgeassinbagadeaddji sadjásaš Säde Hautamäki dadjá, ahte sámegielat bargiid lea váttis gávdnat.

– Váidalahtti, eat leat ožžon ovttage ohcamuša, eat Heahtá giellabeassái eatge Bealdovuopmái. Dán dilis gielda ii sáhte álggahit giellabeassedoaimma, go mis eai leat resurssat, eaige bargit. Dat lea dieđusge hui váivi. Jus ii dasto geava nu, ahte gos nu fáhkkestaga gávdnat sámegielat bargiid, dadjá Hautamäki.

Giellabesiid boahttevuohta ain rabas

Eanodaga čuvgehuslávdegoddi mearridii mannan miessemánus, ahte gielda álggaha davvisámegielat giellabeassedoaimma Heahtás ja Bealdovuomis. Eanodagas leat gárten sámegielat giellabesiid dárbbu ja maŋimuš gažadeami vuođul livčče leamaš unnimustá 10 máná boahtime giellabesiide.

Dán čávčča doaibma ii beasa johtui, muhto ášši ii sihkkarit vajálduva, árvala Eanodaga gieldda  árrabajásgeassinbagadeaddji sadjásaš Säde Hautamäki.

– Dál in máhte dadjat boahttevuođas maidige. Muhto galhan dat ášši fas boahtá ovdan. In jáhke, ahte bearašbeaivedivššara báikkit bohtet šat ohcanlahkái dán čávčča, go ii das dáidde leat olus ávki.

–Sámegielat olbmuide orru gávdnumin bargu ja sáhttá leat, ahte Eanodat ja dat bargu ii geasut man nu sivas. Obalohkkái sámegielat bargit leat unnán. Mii galggašeimmet gávdnat ođđa kanálaid gávdnat daid olbmuid, geain lea beroštupmi dán suorgái, dadjá Eanodaga gieldda vs. árrabajásgeassinbagadeaddji Säde Hautamäki.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä