Sápmi |

Eanodaga girdigieddi buktá miljovnnaid euroi guvlui jahkásaččat – "Dálá mátkkošteaddjimearri ii reahkká dárbbašlaš divvumiidda"

Eanodaga gieldda mielde girdigieddi gáibida vuđolaš divvuma ja girdigeidnosa asfáltta galggašii ođasmahttit. Ođastusdárbbuid lassin fuola dagaha Stuorra-Británnia earráneapmi Eurohpa Uniovnnas.

Hannu Autto
Hannu Autto mielde girdigiettis lea stuora mearkkašupmi gieldda ekonomiijai. Govva: Vesa Toppari / Yle

Eanodaga girdigieddi lea dehálaš oassi gieldda ekonomiija ja ealasvuođa, muhto fuolla dan seailumis lea deaddán jo guhká. Girdigieddi buktá 4,2 miljon euro guvlui jahkásaččat. Turisttaid mearri lea maid dássidit badjánan ja turismasesoŋŋa guhkkon.

Dál Eanodaga girdigieddái seivot dušše chartergirdit, go Finnair heittii girdimis Helsset-Eanodat gaskka beannot jagi dassái.

Girdigietti galggašii goittotge dál divuhit ja girdigeidnosa (su. kiitorata) ođasmahttit. Gieldda ovddidanhoavda Hannu Autto muitala, ahte gielda lea ságastallan Finaviain, muhto vel ii leat sihkkaris diehtu girdigietti boahttevuođas. Finavia ja gielda galggašedje deaivvadit farggabáliid ášši olis.

– Dakkár eahpesihkkarvuohta ii leat goassige buorrin, dat njoahcuda eará investeremiid dán guovllus. Mii galgat oažžut čielga vástádusa, lohká Autto.

Finavia: Eanodaga girdigiettis galledeaddjimearri lea okta unnimusain Suomas

Suoma girdigittiid oamasteaddji Finavia gulahallanossodagas muitalit, ahte fitnodagas eai leat vel mearridan girdigietti divvumis dahje girdigeidnosa ođasmahttimis.

Girdigietti bokte johte jagis 2019 oktiibuot 27 979 mátkkošteaddji.

– Eanodaga girdigietti girdigeainnus lea badjel 20 jagi boaris ja maiddái terminálas leat investerendárbbut. Girdigeidnosa ođasmahttin lea divrasamos investeren. Dálá mátkkošteaddjimeriin nu stuorra investeren ii leat vejolaš. Ruvttojohtolat girdigieddái (su. reittiliikenne) lea jo nohkan ja dohko leat girdán maŋimuš jagiid dušše 70–80 chartergirdi, datge eanaš juovlamánus.

Finnairin Airbus 350 girdi
Finavia mielde Eanodaga girdigieddi lea okta dain girdigittiin, mas lea unnimus johtolat Suomas Govva: Esko Jämsä / AOP

Finavia mielde sii gehččet investerendárbbuid stuorra ollisvuohtan ja fitnodaga strategiijas dehálamos ášši lea fállat buriid oktavuođaid nu riikka siste go riikkaidgaskasaččatge. Eanodaga girdigiettis ii leat mearkkašupmi bargomátkkošteamis, suopmelaš mátkkošteddjiid oktavuođain Suomas dahje olgoriikkain. Suoma bealuštusfámutge eai geavat girdigietti iežaset doaimmas, lohket Finavia gulahallanossodagas.

– Eará Davvi-Suoma girdigittiin johtet olu eanet mátkkošteaddjit. Danin mii investeret namalassii Roavvenjárgga, Avvila ja Gihttela girdigittiide.

Finavia lea investeren badjel 55 miljon euro Roavvenjárgga, Avvila ja Gihttela girdigittiide. Dain girdigittiin galledeaddjimearri lassánii jagis 2019, go fas Eanodagas dat geahppánii 97,3 proseantain.

Brexit dagaha lassefuola

Maiddái máilmmi politihkka váikkuha girdigittiid boahtteáigái.

Stuorra-Británnia earráneapmi Eurohpa Uniovnnas dagaha lassefuola Eanodaga gildii, daningo Eanodaga turisttat bohtet namalassii doppe. Gielda čuovvu Stuorra-Británnia dili dál dárkilit.

– Mii fertet gávdnat ođđa riikkaid márkaniid dál vai livčče eambo sihkkarvuohta turismmas dáppe. Mii leat dál bargan dainna, mii leat fitnan oahpásmuvvamin sierra márkaniid doibmiide. Sávvamis dat mielddisbuktá bohtosiid boahttevuođas, čilge gieldda ovddidanhoavda Autto.

Varrasamosat: Sápmi

Váldoođđasat

Varrasamosat

Muualla Yle.fi:ssä