Sápmi |

Eanodaga Luppokoti boarrásiidsiidda sadjái plánejit ođđa lanjaid, danin go dála visti ii deavdde njuolggadusaid

Eanodaga gielddas leat guorahallamin, mo ordnet vuorasolbmuid beavttálmahtton bálvalanássama doaibmalanjaid ja doaimma, go dála boarrásiidsiidda lanjat eai deavdde njuolggadusaid.

Satu-Marja Eira-Keskitalo
Luppokoti vástideaddji divššár Satu-Marja Eira-Keskitalo sávvá, ahte bargiid oaivilat váldojuvvojit vuhtii ođđa lanjaid plánenbarggus. Govva: Minna Näkkäläjärvi / Yle

Eanodaga gielddas leat guorahallagoahtán Luppokoti boarrásiidsiidda boahttevuođa. Boarrásiidsiidda doaibmalanjat eai deavdde dála standárddaid: lanjat leat gáržžit eaige daid leat álgoálggosge plánen boarrásiidsiidda dárbbuid várás.

Gielda lea dál guorahallamin Luppokoti sadjái ođđa doaibmalanjaid vuorasolbmuid beavttálmahtton bálvalanássama várás. Gielddaráđđehus mearridii vuossárgga 4.6. čoahkkimisttis evttohit gielddastivrii, ahte gielda láigoha ođđa doaibmalanjaid, mat leat priváhta oamastusas, ja fállá bálvalusaid das duohkoge ieš.

Fitnodat huksešii ođđa viesu, gielda fálašii bálvalusaid

Eanodaga gielddaráđđehusa vuosttas várreságadoalli Janne Näkkäläjärvi muitala, ahte ráđđehusa oainnu mielde buot buoremus livččii dat, ahte gielda ieš fálašii vuorasolbmuide divššu, muhto ii álgge ieš hukset.

– Mii evttohit dál gielddastivrii, ahte jos gávdno dakkár sosiála- ja dearvvašvuođafitnodat, mii fállá dakkár bálvalusaid, ahte dat fitnodat sáhtášii hukset dan ođđa viesu ja gielda goit ieš fálašii daid bálvalusaid. Sisdoallu livčče goittotge gielddas, muhto dat viessuhuksen livčče dasto fálaldagaid bokte fitnodagaide addon, muitala Näkkäläjärvi.

Janne Näkkäläjärvi
Eanodaga gielddaráđđehusa vuosttas várreságadoalli Janne Näkkäläjärvi. Govva: Ritva Torikka / Yle

Boarrásiidsiida Luppokoti vástideaddji divššár Satu-Marja Eira-Keskitalo lea ilus, ahte gielddaráđđehus mearridii nu, ahte gielda joatkkášii bálvalusaid fállama ieš. Okta molssaeaktu livččii lean dat, ahte priváhta fitnodat huksešii vistti ja fálašii bálvalusaid, ja Luppokoti bargit sirdašuvašedje bargat dan priváhta fitnodahkii.

– Ballun leamaš, ahte bargiid sajádat rievddašii ja gielddas ii livčče šat mihkkige dadjamušaid bálvalusaid ordnemis. Dat priváhta fitnodat mearridivččii, maid bargat ja man olu leat bargit, dadjá Eira-Keskitalo.

Luppokoti dála lanjat eai deavdde njuolggadusaid

Lappi guovlohálddahusdoaimmahat AVI lea golggotmánus 2015 gávnnahan stivren-, gohcin- ja dárkkistusgalledeami oktavuođas, ahte Luppokoti lanjat eai dála láhkamearrádusaid ja Valvira njuolggadusaid mielde heive dan geavahussii, mas dat dál leat. Doaibmalanjat eai leat plánejuvvon boarrásiidsiidda doaimmaide: lanjat leat gáržžit ja vuorkkát menddo uhcit.

Eanodaga vuođđodorvolávdegoddi ásahii seamma jagi áigge bargojoavkku guorahallat beavttálmahtton bálvalanássama ordnema. Bargojoavku mearridii loahpas evttohit, ahte Luppokoti lágádusdikšu molsojuvvo beavttálmahtton bálvalanássamiin dakkár lanjaiguin, mat devdet dála áiggi gáibádusaid.

Luppokoti
Dála Luppokotis bázášedje dušše olgoseainnit ja oassi gáhtus, jos dat divvojuvvošii vuorasolbmuid beavttálmahtton bálvalanássama dárbbuid ja njuolggadusaid dássái. Govva: Minna Näkkäläjärvi / Yle

Gielddas eai atnán buori molssaeaktun divvut Luppokoti: viesu huksenteknihkalaš áššiid galggašii beaivádit nu, ahte geavadis viesus eai gaikodeami maŋŋá livčče sajis go olgoseainnit ja oassi gáhtus.

Dál go sode- ja eanagoddeođastusat leat barggu vuolde, Eanodaga gielddas lea fuollan, mo dáhkidit dan, ahte vuorasolbmuid dikšobálvalusat leat oažžumis ruovttuguovllus dan maŋŋáge, go eanagoddi vástida sode-bálvalusain. Danin atnet dehálažžan dan, ahte boarrásiidsiidda doaibmalanjat ođasmahttojuvvojit dál dála njuolggadusaid dássái, vai ii geavaše nu, ahte bálvalus heaittihuvvo boahttevuođas ollásit Eanodagas.

– Dál lea dehálaš áigi ieš nai geahččalit váikkuhit. Dáinna lágiin mii jáhkkit, ahte oaččošeimmet buorimus lági mielde fállat boarrásiidda dakkár bálvalusaid, ahte sii beasašedje leahkit dáppe Eanodagas ja eai dárbbašivčče vuolgit gosage eará guvlui, dadjá Eanodaga gielddaráđđehusa vuosttas várreságadoalli Janne Näkkäläjärvi.

Bargi sávvá sin oaivilat váldojuvvojit vuhtii ođđa lanjaid plánemis

Luppokoti vástideaddji divššár Satu-Marja Eira-Keskitalo muitala, ahte dárbu lea oažžut stuorát lanjaid, hivssegiid ja riššuid ássiide. Son ii goit hálit, ahte oktasaš lanjaid gáržžidivčče, danin go lea dehálaš, ahte ássit besset ovttastallat ja háleštit gaskaneaset ja ahte lea muđuige sadji oktasaš doaimmaide.

Eanodaga gielddaráđđehus lea dohkkehan ekonomiija- ja doaibmaplánastis jahkái 2018 mearreruđa plánet ođđa lanjaid Luppokoti sadjái. Eira-Keskitalo sávvá, ahte bargit beasašedje váikkuhit ođđa lanjaid plánenbargui ja ahte sin oaivilat váldojuvvošedje vuhtii.

– Ođđa lanjat gal leat buresboahtán, muhto galgá smiehttat, makkár lanjat dat leat.

Dan eai leat vel mearridan, gosa ođđa lanjat huksejuvvošedje dahje mii dáhpáhuvvá dála Luppokotii. Ášši ovdána čuovvovaččat gielddastivrii.

Gáldun dán áššis lea geavahuvvon Eanodaga gielddaráđđehusa áššelistu.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä