Sápmi |

Eanodaga skábmaivnniid beassá dál čuovvut neahttakámera bokte – “Olbmot jáhkket dáppe lea skábman bihkkaseavdnjat, vaikko nu ii leat”

Skábmakámera ulbmilin lea dahkat Eanodaga dovddusin, sihke ássanbáikin ja maiddái turismaealáhusa dáfus, muitala Eanodaga gieldda kultur- ja diehtojuohkinkoordináhtor Heli Nurmi.

Enontekiön kaamoskamera – Polar Night Live
Govva: Enontekiön kaamoskamera – Polar Night Live / Flycam Oy

Eanodaga skábmaáiggi beassá dál čuovvut neahttakámera bokte. Skábmakámera – Polar Night Live sáhttá čuovvut reálaáiggis birra jándora, iđitguksos gitta ija nástealbmái ja guovssahasaide.

Skábmakámera ulbmilin lea čájehit máilbmái, ahte ii skábmaáigi leat seavdnjat, muhto baicce hui ivdnái, muitala Eanodaga gieldda kultur- ja diehtojuohkinkoordináhtor Heli Nurmi.

– Máddin olbmot jáhkket, ahte skábman dáppe lea bihkkaseavdnjat. Miihan goit diehtit, ahte skábman dáppe lea hui fiinnis. Skábmakámera lea okta vuohki buktit ovdan, ahte dáppe Eanodagas lea čáppa biras ja buorre eallit. Ulbmilin lea dahkat Eanodaga dovddusin, sihke ássanbáikin ja maiddái turismaealáhusa dáfus, Nurmi muitala.

Heli Nurmi
Eanodaga gieldda kultur- ja diehtojuohkinkoordináhtor Heli Nurmi. Govva: Anni-Saara Paltto / Yle

Háliidit skábmakámera beaggit miehtá máilmmi

Skábmakámeras oidno Heahtá girkosiida, Bassičearru ja maiddái Ovnnesjávri. Olbmot leat beassan geahčadit gili eallima ja skábmaivnniid neahta bokte dál vahkku veardde. Dán rádjái geahččit leamašan badjel 1 000.

Jurddan lea, ahte skábmakámera beassá čuovvut goit dassái go beaivváš fas ihttá ođđajagimánu beallemuttus.

– Dieđus skábmaivnnit leat olu fiidnát luonddus go kámeralinsa čađa. Kámerabokte olbmot goit besset goit vásihit skábmaáiggi fiinna bottuid, dadjá Heli Nurmi.

Enontekiön kaamoskamera – Polar Night Live
Govva: Enontekiön kaamoskamera – Polar Night Live / Flycam Oy

Vaikko eanodatlaččat ieža eai dárbbašivčče guovlat neahttakámera go háliidit oaidnit skábmaivnniid, de Eanodaga gielda lea ožžon olu positiiva máhcahaga gieldalaččain. Ulbmilin lea goit oažžut skábmakámera beaggit miehtá máilmmi.

– Mis lea jođus stuorra kampánja, mainna muitalit viidát máilbmái min skábmakámeras. Oaidnit de makkár geahččiloguid oažžut go kampánja ovdána, dadjá Eanodaga gieldda kultur- ja diehtojuohkinkoordináhtor Heli Nurmi.

Eanodaga skábmakámera lea vuos geahččaladdanprošeakta. Go skábma nohká, de gielda vihkkehallá neahttakámera boahtteáiggi.

– Dieđusge mii smiehttat, ahte sáhtášeimmetgo sáddet gova maiddái eará jagiáiggis. Okta vejolašvuohta lea geassi ja ijahis idja, árvala Heli Nurmi.

Varrasamosat: Sápmi

Váldoođđasat

Varrasamosat