Sápmi

Eanodaga teknihkalaš hoavda lea lokten golbma jagi 500 euro menddo stuorra bálkká – dutkanbivdda bolesii

Teknihkalaš hoavda leamaš ieš mearrideamen bálkkástis ja dolvon evttohusa bálkkárehkenastái njuolgga.

Enontekiön kunnanvirasto Hetassa
Eanodaga teknihkalaš hoavda lea lokten golbma jagi áigge 500 euro menddo stuorra bálkká. Su doaimmain áigot dahkat dutkanbivdaga bolesii. Govva: Annu Passoja / Yle

Eanodaga gieldda teknihkalaš hoavda lea dihtomielalaččat lokten 500 euro menddo stuorra bálkká golmma jagi áigge. Áššis lea čállán vuosttážin Lapin Kansa.

Teknihkalaš hoavda ákkastallá, ahte mearrádus bálkká mearis lea báhcán gieldda beales dagatkeahttá, muhto gielda vástida dasa, ahte bálká lea seamma go ovdalge iige stuorát bálkkás leat dahkkon mearrádus.

Doaimmahii ieš bálkkámáksinávžžuhusa ja lei mearrideamen das

Teknihkalaš hoavda lea ieš doaimmahan gieldda čáhcefitnodaga (Enontekiön Vesiyhtiö) stivrra evttohusa njuolgga bálkkárehkenastái, iige doaibmaválddálaš eiseváldi leat diehtán das. Teknihkalaš hoavda leamašan báikki alde go stivra lea gieđahallan su guoskevaš ášši. Son lea ávžžuhan bálkkárehkenastti máksigoahtit bálkká sutnje.

Gieldda vástádusas čállet, ahte teknihkalaš hoavda livčče galgan áddet, ahte su doaibmavuohki ii leat riektá iige heivvolaš.

– Teknihkalaš hoavda livčče galgan diehtit ja áddet, ahte son ii oaččo návddašit stuoriduvvon bálkká dušše iežas almmuhusain, muhto baicce son livčče galgan oažžut áššis gieldda virggálaš mearrádusa, čállo gieldda vástádusas.

Gielda vástádusas čállojuvvo maid, ahte teknihkalaš hoavda mieđiha iežas ákkastallamis dan, ahte gielda ii leat bajidan su bálkká, iige danin dahkan teknihkalaš hoavdda bálkká stuorideamis mearrádusa.

Teknihkalaš hoavdda mielas su guovtti doaimma rádji leamaš eahpečielggas

Teknihkalaš hoavda ieš fas lea dan oaivilis njulgengáibádusastis, ahte teknihkalaš hoavdda virggi ja čáhcefitnodaga doaimmajođiheaddji barggu rádji leamaš eahpečielggas.

Goittotge juo jagi 2013, go teknihkalaš hovdii mearriduvvui doaibma čáhcefitnodagas, leat almmuhuvvon bargojuogu proseanttaoasit.

Seamma ášši lea duođaštuvvon gieldda ja čáhcefitnodaga gaskasaš oastinbálvalussoahpámušas. Nuba maiddái dán mearrádusa dihte teknihkalaš hoavda livčče galgan almmuhit iežas easttalažžan, go su bálkká birra mearriduvvui čáhcefitnodagas.

Gielddahoavda evttohii dahkat bolesii dutkanbivdaga

Eanodaga gielddahoavda evttohii, ahte bálkááššis dahkkojuvvo bolesii dutkanbivdda. Gielddaráđđehus dohkkehii gielddahoavdda evttohusa jienain 4–3. Ulbmilin lea čielggadit, dagaigo teknihkalaš hoavda rihkkosa vai ii.

Gielddahoavda mearridii maid dan, ahte bálkká berret ruovttoluotta. Gielddahoavda lea ságastallan áššis gielddaráđđehusa ságadoalliiguin, čáhcefitnodaga stivrra ságadoalliiguin ja bargoveahkahoavddain. Sii bohte ovttamielalaččat dan loahppabohtosii, ahte gielddahoavda dahká mearrádusa bálkká bearramis ruovttoluotta.

Varrasamosat: Sápmi

Váldoođđasat

Varrasamosat

Muualla Yle.fi:ssä