Sápmi |

Eanodagas báhce kulturruđat geavatkeahttá korona dihte 12 000 euro – Anáris filbmateáhter ceavzá, go ii leat priváhttaoamastusas

Gielddat seste miljovnnaid euroid kulturruđain seammás go korona heaittihii dáiddáriid bargguid. Anáris ja Eanodagas goittotge vurdet fas beassat ordnet kulturvásáhusaid.

Mirja Karjalainen, inarin kunta, anára gielda, kulturdoaibma
Kulturčálli Mirja Karjalainen Anára gielddas lea giitevaš das, ahte gieldda oamasta boares filbmateáhtera. Muđui teáhter illá livčče ceavzán mannan jagis. Govva: Anneli Lappalainen / Yle

Koronapandemiija bissehii measta olles Suoma kultureallima mannan jagi. Dát oidno maiddái gielddaid bušeahtain. Yle viiddes čielggadeami mielde gielddain báhce geavatkeahttá 23 miljovnna euro kultuvrii várrejuvvon ruđat.

Ovdamearkka dihte Anáris ja Eanodagas kulturbušehttii várrejuvvon ruđaid eai leat bastán geavahit, go ráddjehusat eastadedje doallamis kulturdáhpáhusaid.

Eanodaga gieldda kulturbušeahtas báhce geavatkeahttá 12 000 euro. Ii Anára kulturdoaibmage nákcen geavahit buot ruđaid.

Gieldda filbmateáhter ii nu álkit gopmán

Anára kulturčálli Mirja Karjalainen muitala, ahte kulturbušeahtas bázii oassi geavatkeahttá ráddjehusaid dihte. Karjalainen namuha, ahte sii goittotge baste ordnet olu dáhpáhusaid, vaikko jahki leige spiehkastatlágán. Karjalainena mielde ruđat leat baicce geavahuvvon earret eará sosiála- ja dearvvásvuođadoaimmas gieldda dárbbuid mielde.

Gielddas lea maid áiddo dál jođus oktasaš doarjagiid ohcan, mas servviide ja eará doibmiide fállet doarjagiid losses áigodahkii.

Okta kulturfálaldagain lea Avvilii jagis 1960 vuođđuduvvon filbmateáhter Aslak, gos bastet dán áigge čájehit maid máilmmi vuosttašeahkediid.

Koronaáiggis dát bálvalus gal ceavzá, go gielda dan oamasta.

Aslak
Filbmateáhter Aslakis leat bastán čájehit filmmaid, vaikko geahččit leatge leamaš oalle unnán. Govva: Eljas Niskanen / Yle Sápmi

– Bileahttaboađut unnot, go čájáhusmearit leat vuollin, muitala Anára gieldda kulturčálli Mirja Karjalainen.

Karjalainen dadjá, ahte geahččit leat hui várrugasat, muhto son atná dan gal buorrin.

– Priváhtta fitnodatdoallin dán ii basttaše doallat. Dien dáfus gieldda oamastan filbmateáhter lea min lihkku vai mii sáhttit joatkit doaimma, Karjalainen giitala.

Doaibma joatkašuvvá Aslak-dálus vel boahtte jagi rádjái, muhto dan maŋŋá doaibma sirdašuvvá Avvila ođđa skuvlaguovddážii.

Eanodagas seste, go dáhpáhusat eai ollašuvvan ja báikkit ledje gitta

Eanodagas kulturruđat sisttisdollet kulturdoaimma lassin girjerádjosa. Gieldda kulturdoaimma ollislaš bušeahtta lei diibmá 188 000 euro, mas bázii 12 000 euro geavatkeahttá.

Heli Nurmi.
Eanodagas Heli Nurmi vuordá jo dan, ahte beassá fállat kulturdáhpáhusaid gieldalaččaide. Govva: Kaija Länsman / Yle

Kultur- ja dieđihankoordináhtor Heli Nurmi mielde mearri lea máŋgga unna siva boađus.

– Girjeráju elrávdnje- ja čáhcerehkegiin ledje stuorra nuppástusat, dat ledje unnit ja das šattai moaddeduhát euro seastu. Dasto seastin bođii dasge, go kulturdáhpáȟusat eai ollašuvvan, degomat lágádusaide ja skuvllaide boahtti kulturgalledeamit ja konsearttat, Nurmi čilge.

Nurmisge miella livčče ordnet dáhpáhusat kultuvrra nealgái. Mannan vahku almmuhuvvon ođđa ráddjehusaid dihte njukčamánu lohppii plánejuvvon dáhpáhusat goittotge báhcet dušše niehkun.

Diehtobivdagii vástidedje 167 gielddas

Yle sáddii Suoma gielddaide diehtobivdaga, mas jerrojuvvui daid kulturbušeahtain ja ruđaid geavaheamis.

Gažadeapmái vástidedje 221 gieldda. Geavahuvvon ruđaid meari dihte easkka 167 gielddas, dasgo buot gielddain ii leat vel dahkkon ruhtadoalloloahpaheami jagis 2020.

Geavatkeahttá báhcán ruđaid mearri soaitá leat velá eanet go 23 miljon euro.

Varrasamosat: Sápmi

Váldoođđasat

Varrasamosat

Muualla Yle.fi:ssä