Sápmi |

Eanodagas plánejit dál huksehit máŋggadoaimmadáluid ja ođđa ásodagaid logi miljovnna euro ovddas – Gielddahoavda: “Ruđas ii leat vel diehtu”

Gielda áiggošii boahttevaš jagiid hukset máŋggadoaimmadáluid sihke Heahttái ja Gárasavvonii ja vel ássanvisttiid Gilbbesjávrái.

Jari Rantapelkonen lähikuvassa
– Áigetávvalis ii sáhte vel dadjat maidege. Okta gažaldat lea maiddái dat, ahte leago gielddas ruhta, dadjá Eanodaga gielddahoavda Jari Rantapelkonen. Govva: Vesa Toppari / Yle

Eanodaga gielda pláne dán jagi áigge máŋggaid stuorra huksenfidnuid. Gieldda váldostivra mearridii maŋemuš čoahkkimisttis juolludit sihke Gárasavvona máŋggadoaimmadálu ja Gilbbesjávrri vistehuksemiid plánemii ruđa. Dasa lassin maiddái Heahtá girkosiidda máŋggadoaimmadálu huksenplánat galggašedje gárvánit dán jagi.

Eanodaga gielddahoavda Jari Rantapelkonen muitala, ahte jus buot dát huksenfidnut ollašuvvet boahtteáiggis, de lea sáhka birrasiid logi miljovnna euro investeremis.

– Lea olu gitta plánemis ja man stuorrát dát visttit šaddet. Áigetávvalis ii sáhte vel dadjat maidege. Okta gažaldat lea maiddái dat, ahte leago gielddas ruhta, dadjá Rantapelkonen.

Heahtá máŋggadoaimmadálu soitet huksegoahtit juo boahtte jagi

Guhkimusat gielda lea ollen Heahtá máŋggadoaimmadálu plánemiin. Dattetge ii leat goit vel sihkkar, ahte makkár doaibmit bohtet seamma gáhtu vuollái. Plánaid mielde máŋggadoaimmadálus sáhtašedje leat sihke boarrásiidsiida, searvegoddi ja dearvvašvuođaguovddáš.

– Dálá dilishan Heahtá boarrásiidsiida Luppokoti ii deavdde gáibádusaid. Dán jagi áigge mii fertet plánet ja mearridit buot, ja de boahtte jagi gal ferte álgit geavatlaš doaimmaide, čilge Rantapelkonen.

Gilbbesjávrri ásodagaid huksenplánaid gárvemii gielda bidjá dán jagi 100 000 euro. Gilis lea hui stuorra dárbu ođđa ássanvisttiide. Go gielda jearahii fitnodatdolliin ásodatdárbbu, de boađus lei birrasiid 40 ásodaga. Ná olu ođđa ásodagaid Eanodaga gielda ii goit meine hukset.

– Jurddan lea, ahte vuolggášeimmet johtui 15–20 ođđa ásodaga huksemiin. Huksenbarggut álggáše dasto jagis 2022, dadjá Rantapelkonen.

Gárasavvona skuvla lagabui 70 jagi boaris – visttis heajos sisáibmu

Gárasavvonis lea dál maid doaivva badjánan, go váldostivra čujuhii ođđa máŋggadoaimmadálu plánemii 30 000 euro. Dálá skuvlavisti lea lagabui 70 jagi boaris ja doppe leat sisáibmováttisvuođat.

Ođđa máŋggadoaimmadálu huksen lea dassážii jorran gieldda beavddis ságastallama dásis, muhto dađi guhkkelii plánat eai leat ollen. Ovddit čavčča gielda ja gárasavvonlaččat goit čohkkejedje plánenjoavkku suokkardallat, ahte makkár dárbbut giliolbmuin leat ja mii ođđa viesus galggašii leat.

Gielddahoavda Jari Rantapelkonen muitala, ahte gieldda teknihkalašdoaimma bargun lea dál ovddidit Gárasavvona máŋggadoaimmadálu plánenbarggu.

– Teknihkalašjođiheaddji oažžu mearridit ja plánet mo ruhta geavahuvvo ja mo gieldalaččat ja gárasavvonlaččat besset plánenbargui mielde. Dán jagihan de čielgá, ahte mo ášši ovdána, árvala Rantapelkonen.

Gielddahoavda vássán jagis: "Dákkár fárta ii leat várra leamašan goassege ovdal"

Jagis 2020 Eanodaga gielddas lea dáhpáhuvvan olu. Gielda lea váldán girdingietti doaimma badjelasas ja vuovdán iežas elrávdnjefitnodaga.

Ođđa huksenplánaid geažil eai doaimmat leat nohkame lagaš jagiin.

– Olu livččii huksenbargu, muhto ruđas ii leat vel diehtu. Vássán jagi leat dáhpáhuvvan issoras olu mearkkašahtti áššit Eanodaga gieldda historjjás. Dákkár fárta ii leat várra leamašan goassege ovdal. Bargu mis gal lea doarvái, dadjá gielddahoavda Jari Rantapelkonen.

Varrasamosat: Sápmi

Váldoođđasat

Varrasamosat

Muualla Yle.fi:ssä