Sápmi |

Eanodagas váttisvuohta nuoskkidemiiin – "Njuolga heahpanan"

Bálojávrri bisánanbáikái leat čoggon olu ruskkat, vaikko dan galggašedje gurret guovtte vahkku gaskkaid. Bálojávrelaš Káren Proksi ja EJB-guovddáža guovlovástideaddji eaba ádde, manin olbmot bálkot ruskkaid eatnamii.

Geađgeluobbala ja Bálojávrri bisánanbáiki
Bálojávrri ja Geađgeluobbal gaskasaš bisánanbáiki 8.5.2018. Govva: Minna Näkkäläjärvi / Yle Sápmi

Davvi-Suomas geaidnoguoraid bisánanbáikkiid čorgadin doallan lea juohká jagaš váttisvuohta eandalii go bievlá. Dávjá lávejit biilavuoddjit ja eará mátkkošteaddjit doallat káffebottuid bisánanbáikkiin ja muhtimat guđđit daidda maiddái ruskkaideaset. Vearrámus dilis ruskat čoggojit eatnamii. Giđđat go muohta suddá, de muohttaga vuolde ihtet buotlágan diŋggat. Ná geavai maiddái Eanodagas.

Eanodaga Geađgeluobbala ja Bálojávrri gaskasaš bisánanbáikkis muohttaga vuolde ihte dán giđa ollu luonit, ja bisánanbáikki ruskalihtti lea dievva. Bálojávrelaš Káren Proksi mielde ruskalihtti eai leat gurren guhkes áigái.

– Dat leamaš gurrekeahttá olles dálvvi, ja dievva ruskkapusset leat leavvan miehtá dan parkerensaji. Govvejin dan ja bidjen Facebookii. Dat nuoskideapmi lea leamaš juohke áidna giđa áŋkke 7-8 jagi, šuohkiha Proksi.

Proksi ii ieš leat váldán oktavuođa gildii dahje Lappi ealáhus-, johtolat-, ja birasguovddážii. Facebook bokte son goittotge juvssai olbmuid.

– Ollugat leat reageren dasa ja soames de válddiige oktavuođa viidásit.

Káren Proksi
Káren Proksi mielde Suomas livččii dál dárbu hállat nuoskideami birra. Govva: Priváhta

Káren Proksi lea dolkan dan dillái, ja sávvá ahte bisánanbáikki čorgešedje dávjjibut. EJB-guovddáš lea bálkkáhan Lappi bázahusfuolahusa gieldaovttastupmi Lapeco gurret dan ruskalihtti geassit guovtti vahku gaskkaid ja dálvit oktii mánotbajis.

Albma váttisvuohta goittotge lea dat, ahte olbmot eai čorge iežaset luottaid, oaivvilda Proksi.

– Eaigo olbmot máhte čorget iežas maŋis, go dat oidnet ahte konteinar lea dievva, de manne dat dasa galget guođđit ruskkaid, dan mun in ipmir. Mii sámi olbmot leat bajásgessojuvvon dasa, ahte mii eat galgga lundui guođđit maidege.

– Suomas leamaš Pidä Lappi siistinä -kámpánjja máŋgalot jagi áigi, dasa oččolii bossut heakka. Dat lea oba mihá heahpat go boađát deike, dat mu ruovttugielda, ja dat lea dakkár. Mun njuolga heahpanan, dan galggalii čorget jođáneamos lági mielde, lohká Proksi.

EJB-guovddáš: Olbmot eai beroš, gosa ruskkaid bálkot

Lappi ealáhus-, johtolat- ja birasguovddážis lea loahpaloahpas ovddasvástádus Davvi-Suoma bisánanbáikkiin.

EJB-guovddáža Duottar-Lappi guovlovástideaddji Vesa Joona mielde Suoma riikkarájáid lahkosis váttisvuohtan lea earet eará dat, ahte olgoriikalaš guorbmebiilavuoddjit eai dieđe, gosa ruskkaid galgá Suomas bidjat.

– Gal dan sivvan lea dat, ahte olbmot eai beroš gosa ruskkaid bidjet. Galggašii gáibidit eanet dan, ahte olbmot válddášedje luonddu ja birrasa vuhtii. Ja de leat guorbmebiillat Gaska-Eurohpas, ja doppe lea earálágan kultuvra go mis dáppe. Dat lávejit biillas bálkkut ruskkaid geaidnoguoraide, čilge Joona.

Bálojávrri bisánanbáiki.
Bisánanbáikki olles biras lea dievva ruskkaid. Govva: Minna Näkkäläjärvi / Yle Sápmi

Vesa Joona mielas dili sáhtašii čoavdit earet eará nu, ahte bijašii bisánanbáikkiide eaŋgasgielat rávvagiid, ahte gosa ruskkaid galgá bidjat.

– Ja dieđusge maiddái dat, ahte dan galggašii gurret dávjjibut, mieđiha Joona.

Bálojávrri ja Geađgeluobbal gaskasaš bisánanbáikki galggašedje čorget fas miessemánu 15. beaivve.

Varrasamosat: Sápmi

Váldoođđasat

Varrasamosat

Muualla Yle.fi:ssä