Sápmi |

Eanodahkii vurdet 80 chartera Británnias: “Giđđat gahpir lea bivastuvvan go badji lea meattá”, árvala turistafitnodatdoalli Samuli Näkkälä

Skábmamánus Eanodahkii vurdet guokte girdi vahkus ja juovlamánu álggu rájes sáhttet olles guhtta chartera deavdit girdinšillju ovtta beaivve áigge.

Yrittäjä Samuli Näkkälä Enontekiöltä
Turistafitnodateaiggát Samuli Näkkälä lea duhtavaš go badji lea viimmát álgán. Govva: Vesa Toppari / Yle

Eanodaga charterbadji lea álgán. Vuosttas charter Británnias seaivvui Eanodahkii vuossárgga veaigebeaivve moatte jaskes jagi maŋŋá. Dat lei maid vuosttas girdi mii seaivvui girdinšilljui dan maŋŋá go gielda osttii dan Finavias.

Dán dálvebaji áigge turisttat girdet Británnias sullii 80 tuvrra.

– Skábmamánus čeassá guokte girdi vahkus ja juovlamánu njealját beaivve rájes sáhttet viđas guđa chartera beaivvis deavdit girdinšillju. Eanet dohko ii oba čága, dadjá Eanodaga girdinšilju hoavda Marko Halla.

Enontekiön lentoaseman päällikkö Marko Halla
Juovlamánu njealját beaivve rájes sáhttet viđas guđa chartera deavdit girdinšillju ovtta beaivve áigge. Eanet dohko ii oba čága, illuda Eanodaga girdinšilju hoavda Marko Halla. Govva: Vesa Toppari / Yle

Turistafitnodateaiggát luohttá boahtteáigái

Turistafitnodateaiggát Samuli Näkkälä mojohallá, go dál beassá moadde jaskes jagi maŋŋá fas bálvalit turisttaid. Koronaáigi lea čuohcan sakka maid Näkkälä ealáhussii.

– Veháš lea eahpesihkarvuohta, go muhtin veardde leat boahtán šluhttemat. Mun jáhkán, ahte go doaibma álgá, de giđđat gahpir lea bivastuvvan go badji lea meattá, árvala Näkkälä.

Näkkälä vuovdá prográmmabálvalusaid eará fitnodagaide. Son ordne turisttaid ovdamearkka dihtii geahččat guovssahasaid ja oaggut guliid jieŋa alde. Son doalvu turisttaid maiddái muohtašlohttii, mii lea gárvvis juovlamánu álgui.

Son leamašan moattelot jagi fárus charterdoaimmain ja lea geargan bargat máŋggalágan bargguid.

– Háldin ja juovlastállunge lean muhtimin leamašan. Charterat addet barggu ja buktet ruđa gildii. Seammás gielda oažžu fuomášumi. Dat lea dehálaš ášši Eanodahkii.

Enontekiön kunnalliselle kentälle laskeutui charter-kone 22.11.2021
Eanodaga gieldda girdinšilljui seaivvui vuossárgga dálvebaji vuosttas chartergirdi Británnias. Govva: Vesa Toppari / Yle

Näkkäläs badjánedje dovddut go vuosttas charter seaivvui Eanodahkii.

– Seamma láhkai čuohcá go moaddelot jagi dassá, go vuosttas charter seaivvui deikke. Moatte jaskes jagi maŋŋá eat meastta jáhkkán, ahte deikke šat girdet charterat.

Son vuordá, ahte turisttat bohtet Sápmái dearvvasin vai koronanjoammumat eai leava. Näkkälä luohttá, ahte buot ordnašuvvá. Turisttabargit leat boahkuhuvvon ja sis lea iešguđetlágan plánat dávdda váras.

– Eat mii gal vuosttažettiin salo, eatge geige gieđa.

Gielddahoavda: Charter-mátkkit leat Eanodahkii mearkkašahtti

Charter-turisttat mearkkašit ollu Eanodaga gildii ja olles Duottar-Lappi guvlui.

– Dat čuohcá gielddaid ruhtadillái ja barggolašvuhtii, muittuha Eanodaga gielddahoavda Jari Rantapelkonen.

Jari Rantapelkonen seisoo lentoasemalla
Mii sávvat, ahte turisttat váldet vuhtii báikkálaš dili, mii dáppe lea, dadjá Jari Rantapelkonen. Govva: Vesa Toppari / Yle

Gielddahoavda sávvá, ahte sii sáhttet fállat dovdduide čuohcci vásáhusaid dego garra buollaša, muohttaga ja daid prográmmabálvalusaid, maid turisttat háliidit geavahit.

Skábmamánus turisttat loktet Eanodagas sullii njeallje beaivve hávil ja juovlamánus fas finadit beaivemátkki. Dálvebadji nohká guovvamánu loahpas.

Beaivvi ságaid ja Yle Ođđasiid Sámis sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä