Sápmi |

Eanodat ballá massit chartergirdiid – Finavia lohpida dikšut vel boahtte dálvvi charteriid vaikko ruvttojohtolaga eai šat girddege Heahttái

Eanodaga gielda lea fuolas go ruvttogirdijohtolat nohká Heahttái. Finavia šálloša dili ja muittuha, ahte Heahtá girdigieddi lea Lappi girdigittiin dat mii gánniha fuonimusat.

Lappiin laskeutuu joulukuun aikana noin 500 tilauslentoa. Reittilentoja on lähes saman verran.
Gieskat almmuhedje, ahte girdifitnodat Finnair ii girdde Helssegis Eanodahkii šat boahtte dálvve. Govva: Jarmo Honkanen / Yle

Eanodaga gielda lea ovdanbuktán vahkuloahpas ealáhusministtar Mika Lintiläi dan, makkár váikkuhusat šaddet, jus Eanodahkii eai girdde šat ruvttojohtolaga (su. reittiliikenne).

Gieskat almmuhedje, ahte girdifitnodat Finnair ii girdde Helssegis Eanodahkii šat boahtte dálvve. Dát mearkkaša dan, ahte Finavia ii šat anášii fuola Heahtá girdigiettis. Finavia lea dadjan gildii, ahte sii atnet fuola girdigiettis nu guhká go dohko lea ruvttojohtolat.

jari rantapelkonen
Gielddahoavda Jari Rantapelkonen lea dolvon dearvvuođaid ministarii ja muitalan man olu gielda massá, jus Heahttái ii leat girdijohtolat. Govva: Anni-Saara Paltto / Yle

Jus girdigiettis eai doala fuola, de dat váikkuha chartergirdimiidda, ballá gielddahoavda Jari Rantapelkonen. Chartergirdit leat dat, mat buktet eanemus turisttaid dálvit Heahttái. Mannan dálvvi dohko seivo 69 chartergirdi.

Eanodaga gielddahoavda dadjá, ahte dál lea šaddamin dakkár dilli mas ii oro olggos beassan.

– Jus ruvttojohtolat ii leat, girdigietti eai doala ordnegis. Dat dárkkuha dan, ahte boahttevuođas eai várra sáhte charteratge šat seaivut dohko. Ruđalaš dáhpa lea 4,2 miljovnna euro, govvida Eanodaga gielddahoavda Jari Rantapelkonen.

Finavia šálloša dili – “Lea menddo árrat árvaladdat mo girdigieddái geavvá”

Finavia, guhte oamasta girdigittiid, álggaha vástádusastis šállošemiin. Eanodat ii geasut nu olu mátkkošteaddjiid, ahte ruvttojohtolaga dohko gánnehivčče girdit, čállá Finavia fierpmádagain vástideaddji hoavda Jani Jolkkonen.

– Girdifitnodagat girdet dohko gosa leat mátkkošteaddjit. Ii leat doarvái, ahte gos nu lea girdigieddi. Guovllus ferte gávdnot turisma ja juoga, mii geasuha olbmuid dohko.

– Eanodat lea jo máŋggaid jagiid leamašan Finavia girdigittiin dat gosa lea unnimus johtolat. Lea goit menddo árrat álgit árvaladdat mo girdigieddái geavvá, čielggadeamit leat ain gaskan. Boahtte dálvvi chartergirdiid mii goit dikšut, lohpida Jolkkonen.

Tiina Vuontisjärvi Hotelli Hetan Majatalos
Chartergirdit ealáskahttet Eanodaga skábmaáigge, muitala fitnodatdoalli Tiina Vuontisjärvi. Govva: Vesa Toppari / Yle

Fitnodatdoalli: "Sávvamis juoga čoavddus gávdno"

Hetan Majatalo -hoteallas muitalit, ahte dát lea juo 12. jahki go sin dállu dievvá juovllaid guktuid beale charterturisttain. Guossit, maid charterat buktet Heahttái, leat hui mearkkašahtti dienas guovllu fitnodagaide, eai dušše sidjiide, muittuha Tiina Vuontisjärvi.

– Jus eai livčče charterat, eat mii gosge oaččo nie olu gussiid dálvit.

Vuontisjärvi sávvá, ahte giđđadálvái ožžot fas ruvttojohtolaga doaibmat. Mannan giđa Finnair girddii Heahttái 3.3.–14.4.2018.

– Ruvttojohtolat lea dehálaš min giđđagussiide. Livčče vuogas oažžut áiggil dieđu das, mii girdijohtolahkii dáhpáhuvvá, amas giđđaguossit geargat rievdadit mátkeplánaidis, sávvá Vuontisjärvi.

Gielddahoavda: “Lappi eará girdigittiide leat investeren olu, dál livčče Heahtá vuorru”

Eanodaga girdigieddi dárbbašivčče ođđa asfáltta seaivunbáikái. Rantapelkonen muittuha, ahte Finavia lea investeren olu eará Lappi girdigittiide, ammal dál livčče Eanodaga vuorru, jearrá son.

Finavia čujuha dalán burssa guvlui. Ovtta girdigietti divvun máksá sin mielas badjel 10 miljovnna euro. Finavia ferte divvut ja hukset ođđa dohko, gos lea eanemus dárbu. Finavia leage bidjan badjel 55 miljovnna euro Roavenjárgga, Gihttela ja Avvila girdigittiide. Sii smihttet ain Eanodaga girdigietti divvuma, dadjá Finavia fierpmádagain vástideaddji hoavda Jani Jolkkonen.

Vaikko Finavia ii lohpit olus maidige, de gielddahoavda oaččui goit ovtta olbmos áddejumi, namalassii ministtar Mika Lintiläs.

– Ministtar dajai midjiide guokte ášši. Nubbi lei dat, ahte nu guhkká go son lea ministtarin, de ovttage girdigietti eai heaitte. Nubbi lohpádus lei dat, ahte son ságastallá áššis Finaviain, loahpaha Rantapelkonen.

Varrasamosat: Sápmi

Váldoođđasat

Varrasamosat

Muualla Yle.fi:ssä