Sápmi |

Eanodat ja Omasvuotna nannejit ovttasbarggu – "Riikarádji ii galgga leat eastta"

Gielddat áiggoše boahttevuođas ovddidit goit dárogiela oahpahusa Gilbbesjávrri skuvllas.

Omasvuona ja Eanodaga gielddat
Omasvuona ja Eanodaga gielddaid njunnožat deaivvadedje 3.9.2019 Ivgubađas. Govva: Eanodaga gielda / Enontekiön kunta

Eanodaga gielda ja Omasvuona gielda Norgga bealde áigot lasihit ja ovddidit ovttasbarggu. Gielddat deaivvadedje čakčamánu álggus Ivgubađas ja dalle bessege ságastallat boahttevaš ovttasbargovejolašvuođain.

Eanodat ja Omasvuotna leamašan juo guhká ustitgielddat ja dál ulbmilin livččii ođasmahttit gielddaid ovttasbargosoahpamuša.

Eanodaga gielddahoavda Jari Rantapelkonen muitala, ahte gielddat áiggoše boahttevuođas ovddidit goit dárogiela oahpahusa Gilbbesjávrri skuvllas.

– Min jurdda lea, ahte riikarádji ii galgga eastit ovttasbarggu, dadjá Rantapelkonen.

"Geasuheaddji guovllut ja duovdagat"

Eanodat ja Omasvuotna plánejit ovttasbarggu maiddái earret eará mátkeealáhussuorggis. Rantapelkonen árvala, ahte goappaš gielddain leat iežas givrodagat ja daid berre ávkkástallat.

– Ovttasbarggu ovddideapmi lea dehálaš. Mis leat dáppe geasuheaddji ja máŋggabealát guovllut ja duovdagat. Ovttas mii leat eanet, dadjá Rantapelkonen.

Maiddái gádjun- ja buollinčáskadandoaimma ovttasbarggu ovddideapmi lea goappáge gildii dehálaš.

– Jus šaddá heahti duoddaris, de Norgga bealdehan dat gádjunhelikopter sihkkarepmosit boahtá veahkkin. Danne mii háliidit nannet ovttasbarggu, dadjá Rantapelkonen.

Eanodaga ja Omasvuona gielddat galget vuolláičállit ođasmahttojuvvon ovttasbargosoahpamuša giđđat 2020. Dalle gielddaid gielddaráđđehusat čoahkkanit oktasaš čoahkkimii Gilbbesjávrái.

Varrasamosat: Sápmi

Váldoođđasat

Varrasamosat

Muualla Yle.fi:ssä