Sápmi |

Eanodat rahčá ordnet sámegielat árrabajásgeassinfálaldaga Gárasavvonii – gielda lea vástidan ovttaveardásašvuođaáitardeaddjái njukčamánus

Gárasavvonlaš váhnen lea guoddalan Eanodaga gieldda ovttaveardásašvuođaáitardeaddjái, go gielda ii leat bastán ordnet sámegielat árrabajásgeassindoaimma su mánnái.

Enontekiön kunnantalo
Eanodaga gieldda vearjogovas lea rievssat. Govva: Yle

Eanodaga gielda lea sádden njukčamánu 19. beaivve vástádusa ovttaveardásašvuođaáittardeaddji čielggadanbivdagis, mii guoská Gárasavvona eahkebeaidoaimma.

Ovttaveardásašvuođaáittardeaddji lea gáibidan Eanodaga gielddas vástádusaid dasa, mo Gárasavvonis leat dál ordnen dievasmahtti árrabajásgeassindoaimma, mo gielda lea geahččalan ovddidit sámegielat fálaldaga ja mo gielda áigu ordnet dili nu, ahte riekti sámegielat árrabajásgeassindoibmii ollašuvvá.

Gárasavvonis ordnejit sámegielat ollesáigásaš ja dievasmahtti árrabajásgeassindoaimma vuollel 6-jahkásaččaide oastinbálvalussan Ovdaskuvla Lavvus Ruoŧa beale Gárasavvonis sihke oassin joavkobearašbeaivedikšu Touhulas. Doppe lea barggus mánáiddivššár, gii lea čađahan sámegiela vuođđogurssa.

Gielda ákkastallá vástádusastis, ahte sámegielat dievasmahtti árrabajásgeassimii ii leamaš bissovaš dárbu Gárasavvonis. Dalle go dasa ii leat dárbu, de mánáiddivššár lea bargan suomagielat árrabajásgeassinbálvalusas. Gielda goit cealká, ahte jus šaddá dárbu ordnet sámegielat árrabajásgeassindoaimma Gárasavvonis, de dasa lea válmmašvuohta.

Árrabajásgeassinlága mielde ovdaskuvlalaččat leat vuoigaidahtton oažžut nu gohčoduvvon dievasmahtti árrabajásgeassinbálvalusaid ovdamearkka dihtii vánhemiid bargguid dihte.

Gielda lea geahččalan gávdnat bargi, muhto ii leat lihkosmuvvan

Eanodaga gielda muitala vástádusastis ovttaveardásašvuođaáittardeaddjái, ahte lea geahččalan bálkáhit bargi sámegielat árrabajásgeassimii go dasa bođii dárbu čakčamánus 2020. Bálvalusa leat iskan ordnet Joavkobearašbeaivedikšu Touhulas iežas lanjain. Seamma áigge gielda lei bidjan barggu ohcanláhkai golggotmánus 2020, muhto dasa ii ohcan oktage.

Eallinfápmolávdegoddi lea čoahkkimisttis 2.10.2020 addán vuoigatvuođa árrabajásgeassima hoavdda organiseret sámegielat bearašbeaivedivššára bargguid mearreáigásaš bargiin.

Barggu ohcanáiggi nohkama maŋŋá vánhemat ja bargoveahka leat evttohan vejolaččat heivvolaš olbmuid barggu várás, muhto jearadettiin sis oktage ii lean geavahusas dasa.

Gielda lea geahččalan ođđasit ohcat sámegielat bearašbeaivedivššára guovva-njukčámánus 2021, muhto dallege dasa ii ohcan oktage.

Gielda geahččala čoavdit dili

Eanodaga gielda cealká ovttaveardásašvuođaáittardeaddjái, ahte gielddas leat čielggadan oahpahusdoaimmain vejolašvuođa ordnet sámegielat eahketbeaidoaimma Gárasavvonis.

Dievasmahtti árrabajásgeassindoaimmas leahkki mánáin livččii vejolašvuohta oasálastit sámegielat eahketbeaidoibmii. Gieldda mielde áššis ii leat vel dahkkon mearrádus, go čielggadanbargu lea vel gaskan.

Gielda almmuha reivvestis, ahte fállá dievasmahtti sámegielat árrabajásgeassindoaimma joavkobearašbeaivedikšu Touhulas guoddaleaddji mánnái dassái go leat mearridan áššis. Gielddas maid jotket bargi ohcama Gárasavvonii.

Váhnen guoddalan ovttaveardásašvuođaáittardeaddjái

Gárasavvonlaš vánhen Ingá-Máret Gaup-Juuso ozai mannan čavčča iežas bárdnái saji sámegielat mánáidgárdedoibmii eahketbeivviide, go mánná galggai álggahit ovdaskuvlla. Sámegielat sadji ii goittotge ordnašuvvan, ja mánná lea olles čavčča leamaš suomagielat joavkkus eahketbeivviid.

Gaup-Juuso lea geahččalan ohcat čovdosa áššái ovttas gielddain, muhto konkrehta čovdosat eai leat dán rádjai gávdnon.

Árrabajásgeassinlága mielde gielddat galget ordnet sámegielat mánáide árrabajásgeassima sin eatnigillii buot guovlluin Suomas. Sámi giellaláhkages geatnegahttá eandalii sámeguovllu gielddaid ordnet sámegielat bálvalusaid.

Gaup-Juuso válddii oktavuođa sámedikkiin ja maŋŋil guoddalii áššis maiddái ovttaveardásašvuođaáittardeaddjái, guhte Suomas gohcá ovttaveardásašvuođa ollašuvvama.

Ovttaveardásašvuođaiáttardeaddji lea čielggadeamin ášši.

Gielddas leamaš hástalusat ovdalge ordnet sámegielat árrabajásgeassinbálvalusa

Eanodaga gielda lea jagis 2008 ožžon vealahanlávdegottis vealahangildosa ja áittasáhkuid das, ahte eai leat nákcen ordnet eatnigielat beaivedivššu dásseárvosaččat sámegielat mánáide.

Dalle gávnnahedje, ahte ii leat doarvái ordnet sámegielat mánáide dakkár divššu, gos lea sámegielat bargi, jos suomagielat mánát leat seamma joavkkus. Dalle maiddái deattuhedje dan, ahte go Eanodat gullá sámeguvlui, lea erenomáš geatnegasvuohta ordnet bálvalusaid sámegillii aktiivvalaččat.

Guldal dás lasi radioođđasiid. Jietna: Yle Ođđasat Sámis

Varrasamosat: Sápmi

Váldoođđasat

Varrasamosat

Muualla Yle.fi:ssä