Sápmi |

Eanodatlaččat vurdet ain iežaset bolesa, vaikko ministtar ii dan vuos lohpitge: "Gielda ánssáša ja dárbbaša iežas bolesa"

Eanodaga olbmuid mielas ii leat doarvái, ahte bolespatrullat dušše fitnet, vaikke vel dávjjitge. Sii hálidit gildii iežaset bolesa.

Johan Antti Syväjärvi
Eanodatlaš Johan Antti Syväjärvi mielas dakkár bolesis ii leat miige virggiid, mii guhkes mátkki duohken duollet dállet finasta márkanis. Govva: Ritva Torikka / Yle

Sisáššiid ministtar Kai Mykkänen almmuhii bearjadaga, ahte Eanodat ii fidne iežas bolespatrulla ruovttoluotta. Son goit oaivvilda, ahte bolesii gieskat mieđihuvvon 3,3 miljon euro lasseruđas lea ávki maiddái Eanodaga bolesdillái.

Mykkänen galledii bearjadaga Eanodagas ja lohpidii, ahte bolespatrullat bohtet oidnot Eanodagas dávjjit, vaikko ovtta báikái čadnojuvvon bolesat eai šat boađe.

– Dat vuohki, ahte mo dat ordnejuvvo, ii leat vel čielggas, muhto boles galgá oidnot Eanodagas ja galget leat maid dakkár bolespatrullat, mat namalassii fuolahit Eanodaga áššiin ja eanodatlaččat dihtet, ahte dat leat sin bolesat, dadjá Mykkänen.

Sisäministeri Kai Mykkänen (oik.) vieraili Enontekiöllä 7.9.2018. Kuvassa myös Enontekiön kunnanjohtaja Jari Rantapelkonen (kesk.) sekä kunnanvaltuuston puheenjohtaja Seppo Alatörmänen (vas.).
Sisáššiid ministtar Kai Mykkänen (olg.) galledii Eanodagas 7.9.2018. Govas gasku Eanodaga gielddahoavda Jari Rantapelkonen ja gurut ravddas gielddastivrra ságadoalli Seppo Alatörmänen. Govva: Ritva Torikka / Yle

"Easttada ovddalgihtii rihkolašvuođa"

Vaikko njuolga lohpádusa iežaset bolespatrullas eai ožžonge, de lea gieldda olbmuin goit ain nana jáhkku dasa, ahte sii ožžot iežaset polespatrulla gildii.

Eanodaga gieldda hálddahushoavda Leni Karisaari dadjá, ahte gielda ánssáša ja dárbbaša iežas bolesa, daningo gielddas leat erenoamáš iešvuođat, dego viiddis meahcceguovllut ja turisma-, luonddu- ja boazoealáhusat. Karisaari mielas maiddái rádjejohtolaga, trailerjohtolaga ja turisttaid meari lassáneami dihte livččii buorre, ahte gielddas livččii iežas boles.

– Olbmot dáppe goittotge váillahit dan, ahte livččii dakkár lagas boles, gean olbmot dovdet ja muhtin láhkai dat ovddalgihtii maid easttada rihkolašvuođa, dadjá Karisaari.

Tiina Vuontisjärvi ja Leni Karisaari
Heahttálaš fitnodatdoalli Tiina Vuontisjärvi ja Eanodaga gieldda hálddahushoavda Leni Karisaari. Govva: Ritva Torikka / Yle

Seamma oaivilis lea maiddái heahttálaš fitnodatdoalli Tiina Vuontisjärvi.

– Gal dat orru goittotge nu, ahte dorvvolašvuođa mii dáppe hálidivččiimet ja livččii hui dehálaš, ahte dat dáppe min márkanis oidnošii.

"Boles galgá leahkit dáppe báikki nalde"

Dálá dilis bolesis manná badjel diibmu ovdal go joavdá Eanodahkii. Lappi boleslágádus dikšu Eanodaga áššiid Gihttela, Kolari ja Muoná bolesfámuiguin.

Eanodatlaš boazodoalli Johan Antti Syväjärvi mielas dakkár bolesis ii leat ávki, mii guhkes mátkki duohken johtá guovllus.

– Eai dat bastte dikšut jos juoidá dáhpáhuvvá. Go dat bohtet vahku geažes, de luottat leat jávkan juo. Boles galgá leahkit dáppe báikki nalde. Gal Eanodat, Heahttá ja Giehtaruohtas dárbbašit bolesa, dadjá Syväjärvi.

Syväjärvi mielas orru, ahte dál boles fitná báikki alde dušše fáktemin johtolaga. Dasage lea dieđus dárbu, muhto sáhtášii bolesis leat earáge virgi, son oaivvilda.

– Gal dat bolesat galget dáppe orrut, jos dáppe mii nu dáhpáhuvvá. Eaihan dat geargga gosage. Go heajos dálki lea šaddan, dan diehtá eai dat máhte gosage. Ii dakkár bolesiin leat mihkkige virggiid.

Johan Antti Syväjärvi mielas Eanodaga bolesat galggašedje leat dakkárat, geat dovddašedje boazodoalu ja sámi olbmuid, ja orošedje Eanodagas. Son ávžžuhage sámiid mannat boleskuvlii ja álgit bolesin.

– Go lea fal dearvvas ja jierbmi lea ja lea dakkár bealeheapme, ii earágo bolesskuvlii fal, dadjá Syväjärvi.

Gielda lea várren ruđa dorvvolašvuhtii

Ovdal go Eanodaga maŋimušge boles bázii ealáhahkii guovvamánu loahpas, álge Eanodaga gielddas juo plánet vugiid sihkkarastit gieldalaččaid dorvvolašvuođa. Eanodaga gielda leage sihkkarvuođa dihtii seastán 100 000 euro dorvvolašvuođa várás.

– Jos eat oaččo Eanodahkii iežamet bolesa, de dasto gielddaráđđehus dahká evttohusa das, mo gielda ovddidišgoahtá dorvvolašvuođa. Dego ministariige dadjen, de sávan, ahte dan ruđa eat dárbbaš geavahit, dadjá Eanodaga gielddastivrra ságajođiheaddji Seppo Alatörmänen.

Varrasamosat: Sápmi

Váldoođđasat

Varrasamosat

Muualla Yle.fi:ssä