Sápmi |

Eará guovlluin Sámis jávkan čoarvegahpir lea seilon nuortalaččain

Girku ii gieldán nuortalaččaid geavaheamis čoarvegahpira, vaikko eará guovlluin Sámis dat lea jávkan justa dan sivas. Náitalan nuortalašnissoniid gahpiris lea ain čoarvvi hápmi. Muđui bivttaskultuvra lea gal rievdan, erenoamážit ásodatáiggi geažil, muitala duojár Matleena Fofonoff.

Kolttien perinnetalolla esitellään vaimon ja neidon lakkia
Náitalan nuortalašnissoniid gahpir "šaamsiǩ" ja nieiddaid gahpir "peeʹrveʹsǩ". Govva: Sara Wesslin / Yle

Sámiid ládjogahpira geavaheapmi nogai 1900-logu álgobealde, go girku fuonui dan biro čoarvin. Čoarve- dahje ládjogahpir jávkkaige stuorámus oasis Sámis, muhto náitalan nuortalašnissoniid gahpiris lea ain čoarvvi hápmi.

- Ovdamearkka dihte anáraččainhan girku gilddii ládjogahpira. In dieđe manin, muhto min girku ii leat gieldán geavaheamis náitalan nissoniid gahpira, muitala nuortalaš duojár Matleena Fofonoff.

"Ásodatáigi váikkuhii bivttaskultuvrii"

 Muđui nuortalaš gárvodankultuvra lea gal rievdan áiggiid mielde. Ovdamearkka dihte ásodatáigi váikkuhii sakka nuortalaškultuvrii.

- Vel 1950-logus nuorra nissonat ožžo iežaset nieidda gahpira, peeʹrveeʹsǩ, rihppaskuvlla maŋŋel. Náitalan nissoniid gahpira, šaamšiǩ, geavahedje álo ovttas liinniin, muitala Fofonoff.

Sođiid maŋŋel nuortalašnissonat geavahedje dušše sámebiktasiid árgabeaivve. Ásodatlágádus goittotge bággii maiddái nuortalaččaid geavahit dábálaš suopmelaš biktasiid.

- Muittán, go ásodatáigge ii ožžon geavahit nuortalašbiktasiid iige sámástit. Oaččuimet geavahit dušše suopmelaš biktasiid ja daid mii goaruimet. Ásodatáigi gal dagai ráiggi nuortalaškultuvrii, muittaša Matleena Fofonoff.

Varrasamosat: Sápmi

Váldoođđasat

Varrasamosat

Muualla Yle.fi:ssä