Sápmi |

"Eatnanvuloš lottit" gilvvohalai ovtta máilmmi eanemus árvvusadnon filbmafestiválain USAs – filbmadahkki vuordámušat ollašuvve

Sundance-filbmafestivála oanehisfilbmagilvvu bálkkašumit juhkkojedje mannan ija.

Video: Eatnanvuloš lottit -filmma govvejeaddji Mauri Lähdesmäki, bagadalli Marja Helander, jietnaplánejeaddji Pekka Aikio ja jietnaplánejeaddji Pekka Kumpulainen Sundance-filbmafestiválas ođđajagimánus 2019.
Filbmadahkki Marja Helander muitala dovdduinis Sundance-filbmafestiválas mannan ija. Filmma lea govven Pekka Aikio ja čuohppan Kirsti Länsman. Video: Yle Areena. Govva: Dan Campbell / Sundance Institute

Marja Helander oanehisfilbma "Eatnanvuloš lottit" ii vuoitán mannan ija Suoma áigge Sundance-filbmafestiválas Park Citys Davvi-Amerihkás.

Filbma lei evttohassan filbmafestivála oanehisfilmmaid gilvvus. Gilvvus bálkkašuvvui goit nubbi álgoálbmotfilbma, "Fast Horse" Kanadas, buoremus bagadallamis. Cree-álbmogii gullevaš bagadalli Alexandra Lazarowich oanehisfilbma muitala čáhppesjulggiid riidenárbevieruin. Filbma čájehuvvui maiddái Skábmagovat-festiválas Anáris mannan vahkuloahpa.

"Eatnanvuloš lottit" lea jagi 2018 almmustuvvan oanehisfilbma, mii muitala sápmelaš dánsastudeanttaid Birit ja Katja Haarla birra. Haarla-oappážagat dánsuba filmmas Sámi gilážiid ja mehciid čađa gitta Helssegii. Filbma gieđahallá sámeguovllu oamasteapmái váikkuheaddji stuorát gažaldagaid.

Filbma lea árat bálkkašuvvon ImagineNATIVE-álgoálbmotfilbmafestiválas Torontos ja lea maid ožžon Risto Jarva -bálkkašumi Tampere oanehisfilbmafestiválas.

Eatnanvuloš lottit – Maan sisällä linnut.
Govva: Marja Helander / Eatnanvuloš lottit – Maan sisällä linnut
Eatnanvuloš lottit – Maan sisällä linnut.
Govva: Marja Helander / Eatnanvuloš lottit – Maan sisällä linnut

"Dát lea áibbas jáhkkemeahttun"

Sundance lea okta USA stuorámus ja eanemus mearkkašahtti filbmafestiválain. Sundancei ohce dán háve 9 443 oanehisfilmma, main 73 besse mielde festiválii. Jagis 2018 festiválas fitne 124 900 galledeaddji.

Badagalli Marja Helander ii leat behtton, vaikko filbma ii vuoitánge. Son lea baicce duđavaš, go sámefilbma beasai oidnosii ovtta máilmmi eanemus árvvusadnon filbmafestiválas.

– Dáthan lea áibbas jáhkemeahttun, mun lean hui ilolaš, ahte sámefilbma lea oassin Sundance-filbmafestiválaprográmmas. Mu mielas lea suohtas, ahte lea vejolašvuohta buktit sámefilmma oidnosii stuorra máilmmis. Gal dát filbma lea lihkostuvvan diená, ahte olbmot hálidit oaidnit dan maid dáppe Amerihkás, Helander govvidii dovdduidis vuoitiid almmustahttima maŋŋá.

– Lean hui duhtavaš buot bargojoavkku lahtuide, Helander joatká.

Marja Helander, Helsinki, 29.11.2018
Marja Helander lea sápmelaš govvadáiddár, videodáiddár ja filbmabagadalli. Govva: Antti Haanpää / Yle

Filmma čájeheapmi ii goit leat áidna dehálaš ášši dákkár dáhpáhusain. Seamma dehálaš lea maiddái beassat deaivat ođđa olbmuid.

– Vurden beassat deaivvadit eara filbmadahkkiiguin ja ságastallat kollegaiguin, ja oažžut ámmátlaš fierpmádaga.

– Mu vuordámušat lea ollašuvvan. Lea leamašan hui dehálaš deaivvadit earáiguin, ja vaikko lea hoahppu leamašan, de lean geargan oaidnit filmmaid, buriid filmmaid.

Marja Helander jáhkká Sundance-evttohasvuođas leat ávkki boahttevuođas.

– Doaivvun, ahte dát filbma vuolggášii maid eará filbmafestiválaide. Kánske maid lea vejolašvuohta oažžut eambbo doarjaga ja ruhtadeami boahtteáiggi prošeavttaide, smiehtada filbmadahkki.

Divvojuvvon 30.1.2019 diibmu 19:05: Fast Horse bálkkašuvvui bagadallamis, ii vuoitán oanehisfilmmaid gilvvu.

Varrasamosat: Sápmi

Váldoođđasat

Varrasamosat

Muualla Yle.fi:ssä