Sápmi |

Edorf muitokonsearta čokkii 1 800 euro mánáide geat gillájit borasdávddas

Edorf muitokonseartta boađut, 1 800 euro, leat skeŋkejuvvon buori dárkkuhussii Tampere universitehtalaš buohcceviesu mánáidossodahkii. Muitokonsearttas mannan vahkus ledje mielde maid sámi ráppárat, geaidda Edorf lei stuorra ovdagovva.

Video: Aziz (gur.), Edorf ja Amoc jagis 2004.
Video: Ođđasat 20.5.2015 (álgá áiggis 10:47)

Edorf muitokonseartta boađut leat skeŋkejuvvon buori dárkkuhussii.

Muitokonsearta, mii lágiduvvui miessemánu beallemuttus, čokkii badjel 1 800 euro.

Supmi skeŋkejuvvui borasdávddas gillájeaddji mánáid buorrin Tampere universitehtalaš buohcceviesu mánáidossodat 6:žii. Dat dikšu vuollel 16-jahkásaš varradávddain, borasdávddas ja diabetesis gillájeaddji mánáid.

Muitokonsearttas ustibat gitta Anára rájes

Edorf muitokonsearta čohkkii Tamperei su ustibiid miehtá Suoma.

Iiris Mäenpää
Govva: Kevin Francett / Yle
Máŋgasat ledje boahtán gitta Anára rájes.

– Mun hálidin boahtit deike, go dát lea nu erenoamaš konsearta ja dáppe leat nu olu oahpes olbmot. Dát lea muđuide dakkár, mii ii dáhpáhuva šat goassege. Ja vel dat, ahte dat ruđat dás mannet áibbas hirbmat buorre dárkkuhussii, muitala anárlaš Iiris Mäenpää.

Avvillaš ráppár ja musihkkar Edorf jámii dán giđa dušše 29-jahkásažžan. Son lei guhká dáisttalan hárvenaš borasdávdda vuostá.

Edorf gálái luotta maid Sámi ráppáriidda

Edorf vuittii ráppema suomameašttirvuođa vuollel guovttelotjahkásažžan.

Aziz (gur.), Edorf ja Amoc jagis 2004.
Govva: Yle, Jorma Lehtola
Son lei okta vuosttas davvisuopmelaš ráppáriin. 

– Mun dovden Edorf dieđusge jo dalle go mannen logahahkii. Son lei jagi nuorat go mun, muhto viehka johtilit mii álggiimet ráppet ovttas. Mun ráppejin dalle vuos suomagillii, muhto de álgen ráppet anárašgillii. Mun jáhkán, ahte vuosttas dakkár bihttá, mas mus ledjen Ambassain ja Aziziin mielde, nu dan lei dahkan Edorf. Ja gal son lea álggu rájes leamašan mielde dáin rap-hommáin, muittaša Amoc alias Mikkâl Morottaja.

Ailu Valle Edorf muitokonsearttas miessemánus 2015.
Govva: Kevin Francett / Yle
Edorf lei musihkkarin ja dáiddarin ovdagovva maid Sámi ráppáriidda.

– Son lea dieđusge álggu rájes leamašan dakkár ovdagovva rap-musihka ráhkadeami ektui, ahte davvin lea vuolgán giinu diekkár, gii duođas doalvu dan guhkás. Maiddái áibbas su stiila ja sánit ja buot, de dat lea leamašan munnje nugo persovnnalaččatge hui dehalaččat dat bihtát. Eandalitge dasto vel, go beasai ráhkadit suinna ovttas musihka, de dat lea leamašan munnje dakkár erenoamaš stuorra inspirašuvdna, muitala Ailu Valle.

Mikkâl Morottaja Edorf muitokonsearttas Tamperes miessemánus 2015.
Govva: Kevin Francett / Yle
– Edorf leamašan álo munnje ovdagovva. Gal son lei álo min rap-joavkkus dat buoremus. Son dat máhtii buot: son máhtii čuojahit, ráppaet ja lávlut vel dakkár dábálaš vokálalávlagiid. Gal son lea álo leamaš dakkár stuorra idola das. Son dat lei álo dakkár, gii čievččai mu álo bargat vehá buorebut ja buorebut. Hirbmosit lean álo liikon su musihkas, muitala Morottaja.

Varrasamosat: Sápmi

Váldoođđasat

Varrasamosat

Muualla Yle.fi:ssä