Sápmi |

Eeva-Kristiina Harlin jođihišgoahtá guovtte miljovnna euro prošeavtta – ulbmilin lea ovddidit sápmelaš čájáhusgiela sámemuseain

Sápmelaš čájáhusgiela ovddidišgohtet golmma pilohtafidnu bokte. Daid fáttát leat rumbu, gákti ja giela massin.

Eeva-Kristiina Harlin
Eeva-Kristiina Harlin jođiha sámemuseaid oktasaš prošeavtta. Govva: Anneli Lappalainen / Yle

Golbma sámemusea ja guokte universitehta leat álggahan prošeavtta ovddidit sápmelaš čájáhusgiela, mainna sámekultuvra ovdanbukto museain ja čájáhusain dan iežas vuolggasajis.

Muittut, muitalusat – the story of the Sámi by the Sámi -fidnu jođiha Sámemusea Siida Anáris. Prošeaktahoavdan Siiddas bargá filosofiija magisttar, arkeologa Eeva-Kristiina Harlin.

Dasa lassin mielde leat Ruoŧa duottar- ja sámemusea Ájtte Johkamohkis, Máttasámi musea ja kulturguovddáš Saemien Sijte Snoasas, Lappi universitehta ja Luleju teknihkalaš universitehta.

– Fidnu ulbmilin lea nannet sámi identitehta. Museat leat maid mearkkašahtti galledanbáikkit iežaset guovlluin ja fidnus lea fitnodateallima geahččanguovllus mearkkašupmi olles davvi guovllus. Ulbmilin lea, ahte fitnodateallin sáhttá atnit ávkin fidnu bohtosiid go ovddida bálvalusaid ja buktagiid, dieđiha Sámemusea Siida.

Sápmelaš čájáhusgiela temán rumbu, gákti ja giela massin

Sápmelaš čájáhusgiela ovddidišgohtet golmma pilohtafidnu bokte. Daid fáttát leat rumbu, gákti ja giela massin.

– Dáid fáttáid ovddidit sihke sisdoalu ja čájáhusteknihkalaččat ovttasbarggus fidnu ovttasbargoguimmiiguin ja bargobájiin sámeservošiin. Ovddidanfidnu pilohtat báhcet bissovaš oassin Saemien Sijte, Sámemusea Siidda ja Ájtte čájáhusain, muitalit Sámemusea Siidda dieđáhusas.

Prošeavtta árvvoštallon golut leat buohkanassii sullii guokte miljon euro. Interreg Nord Sápmi lea mieđihan dasa ruhtadeami. Prošeakta bistá čakčii 2022.

Varrasamosat: Sápmi

Váldoođđasat

Varrasamosat

Muualla Yle.fi:ssä