Sápmi |

Ekologalaš elrávdnjeskohteriid testejit praktihkas – Leatgo olbmot gergosat máksit buhtes oamedovddus?

Ámmátallaskuvlla ovddidanfidnuid boađusin lea vuođđuduvvon fitnodat, mii iská dál ovddidit elrávdnjeskohteriid vuovdimassii. Eanemus ávki elrávdnjeskohteris sáhttá leat safárifitnodagaide.

Tapani Lappalainen
Anárlaš fitnodatdoalli Tapani Lappalainen mielas elrávdnjeskohteriid buorre bealli lea jaskatvuohta ja ekologalašvuohta. Govva: Vesa Toppari / Yle

Lappi ámmátallaskuvllas leat juo guhká bargan mohtorgielkkáin, mas ii leat dábálaš bensinmohtor, muhto báhtterat maid sáhttá luđet. Nu gohččoduvvon elrávdnjeskohtera leat dahkan Lappi ámmátallaskuvllas ovddidanfidnun jagi 2010 rájes.

– Fidnut leat leamašan golbma. Maŋimus nogai geassemánus ja das válmmaštalle dan, ahte elrávdnjeskohter biddjojuvvo vuovdimassii. Dan maŋŋá vuođđuduvvui Aurora Powertrains -fitnodat, man olis mii leat duođas bidjame elrávdnjeskohteriid vuovdimassii, muitala inšenevra Olli Haavikko Aurora Powertrains fitnodagas.

Vuosttaš logi elrávdnjeskohtera, maid leat buvttadan, vuolgá ođđajagimánus geahččaleapmái čierastallanguovddážiidda ja safárifitnodagaide.

– Doppe ohcet, maid galggašii buoridit ja mot skohter geavatlaččat doaibmá, Haavikko muitala.

Sähkömoottorikelkan erikoistekniikka eli moottori, voimansiirto ja akusto kätkeytyy vakiomallisen moottorikelkan sisään.
Vuosttaš fitnodatbuvttaduvvon elrávdnjeskohteriid testejit praktihkas ođđajagimánus. Govva: Antti Mikkola / Yle

Dál elrávdnjeskohteriin beassá vuodjit sullii 5 miilla ovttain luđemiin

Dán muttus elrávdnjeskohteriin beassá ovttain luđemiin vuodjit 5 miilla, mii lea oalle unnán go veardida dábálaš bensinmohtorskohteriidda.

Anárlaš fitnodatdoalli, Visit Inari beaivválašjođiheaddji Tapani Lappalainen dovdá safáridoaimma dego iežas lupmaid. Son lea bargan logiid jagiid safáribargguin. Son oaidná elrávdnjeskohteriid buorre beallin jaskatvuođa ja ekologalašvuođa.

–Váikko njealljetávttat skohterat leat juo jaskadat ja nuoskidit unnán, nu ná geavahusas elrávdnjeskohter nuoskida unnit ja dat lea jaskadut. Ja várra veahá unnit geavahangolut, muhto oastinhaddi lea de nubbi ášši, lohká Lappalainen.

Dákkár elrávdnjeskohtera ii sáhte vel dábálaš geavaheaddji oastit. Jagit vel mannet ovdal go dábálaš geavaheaddjit ožžot elrávdnjeskohtera, mainna sáhttá vuodjit badjel 10 miilla. Eanemus ávki elrávdnjeskohteris sáhttá leatge safárifitnodagaide.

– Sin kundarat atnet árvvus dákkár buhtisvuođa. Sii bohtet Lappi luonddu geahččat ja jurddašit ahte dáppe buot lea buhtis ja fiinnis, nu dakkár imagoi heivešii bures maiddai elrávdnjeskohter, muitala Haavikko.

Olu divrasut go dábálaš skohter

Turisttat gal vuoruhit ekologalašvuođa. Elrávdnjeskohtera haddi lea goit measta golmmageardásaš dábálaš skohtera ektui. Leatgo das de gergosat máksit?

– Gal dán áigge meastta buohkain lea skuhter mas lea njealljetávttat mohtor. Gal dat atnet ekologalašvuođa árvvus muhto eatnasat eai leat das gergosat máksit. Áloge beare ollu eanet. Golut eai oaččo šattat menddo stuorisin, dadjá Lappalainen.

Dorvvolašvuođa ektui elerávdnjeskohter sáhttá leat buorre. Heahtedilis dan sáhttá bissehit dušše ovttain boaluin.

– Lean ipmirdan, ahte elrávdnjeskohteriin lea vejolaš bidjat nu, ahte jus ofelaš háliida váralaš dili dahje eará siva dihte bissehit dahje jáddadit skohteriid, nu son sáhttá dahkat dan nu, ahte deaddila boalu. Dat lasihivččii dorvvolašvuođa, lohká Lappalainen.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä