Kaikki talviolympialaisista!
Sápmi |

Elisa Ylinampa Kolumbia lanjâsist: ”Motomin eellim lii tego elleekove”

Nievdum mätki Maadâ-Amerikan olášui, ko oovdiš toimâtteijee já TV-persovn Kirsi Salo uusâi pargeid huksiđ ekosiijdâ Tave-Kolumbian.

Jietna: Elisa Ylinampa
Jietna


Moonnâm skammâmáánust Elisa Ylinampa ooinij Facebookist almottâs, mast TV-persovn Kirsi Salo uusâi rijjâtátulâš pargeid jieijâs ekosiijdân Tave-Kolumbian, alda Santa Marta riddokaavpug. Ylinampa lâi jo kuhháá siäštám ruuđâ Maadâ-Amerik määđhi várás, mutâ lopâlâš miärádâs šoodâi jotelávt.

Elisa Ylinampa
Rijjâtátulij paargon kullui eereeb iärán nuurrâđ heđâlmijd já kähvipáávuid. Govva: Priivaatkove

Ekosijdâ šadda lanjâsân

Elisa lâi ohtâ vuosmuin rijjâtátulâšpargein Kirsi Salo ekosiijdâst Sierra Nevada de Santa Marta váráduvvâst. Salo lii tobdos eereeb iärán TV-rááiđust Heikoin lenkki. Čohčuv 2017 sun oostij 60 hehtaarid eennâm lanjâsist, kuus sun lii huksimin ekosiijdâ, mon nommâ lii “Avokadomaa”.

Ekosiijdâst ovdâmerkkân šoddâdeh jieijâs purrâmušâid já huksejeh ekologâlâš vuovij mield.


Riddoulmuuh iä tuušij tiet muurâšt

Astoääigi Elisa eelij Santa Marta kaavpugist tánssáámin salsa páihálijn baarijn. Karibiameerâ riddoost sun peesâi meiddei vuojâdiđ já surffađ. Veikkâ Elisa lijkkui-uv huolâttemes riddoelimân, lâi ohtâ äšši mast koolgâi poollâđ: krokodiilijn.

Toh láá tuođâi-uv varâliih. Ettii, ete ij kannat moonnâđ tohon kost toh láá, ko toh tuođâi-uv poreh ulmuu jis tohon mana liijkás alda, Elisa čielgee.

Elisa Ylinampa
Karibiameerâ riddoost juhânjaalmijn surffareh kalgeh poollâđ krokodiilijn. Govva: Priivaatkove

Algâaalmugeh eelih luándust

Elisa Ylinampa
Mopotaksi lii táválâš fiävru Sierra Nevada váráduvvâst. Govva: Priivaatkove
Elisa mield Santa Marta kuávlust láá 5 algâaalmughiäimu. Kaavpugist sii iäruttii eres ulmuin vielgis pihtâsijn já tevkis njuolgâ vuoptâin.

Tobbeen toh eelih aaibâs luándust. Sij iä aassâm kaavpugist ollágin. Maid mun iberdim, te sij noreh šaddoid meecist já miäcásteh. Sist ij lah šleđgâ já sij ääsih kukken meecist, muštâl Elisa.


Halijdičij maasâd

2,5 mánuppaje mađhâšem maŋa Elisa maacâi maasâd pááikán, kost vuordij suu 4-ihásâš Hildá-nieidâ. Tääl Elisa parga puášuigijn päikkikuávlustis Ruávinjaargâ alda, já šiäštá ruuđâ čuávuváá määđhi várás.

Lijkkojim ennuv já halijdâm maasâd, Elisa moijáá ko smiättá Kolumbia fiäráán.

Motomin eellim lii tego elleekove.

Elisa Ylinampa
Juovlâááptu Elisa tánssái salsa páihálâš salsabaarist. Govva: Priivaatkove

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä