Sápmi

Elle Rávdná Näkkäläjärvi lea okta ođđa ofelaččain: "Háliidan leat ávkin Sápmái"

Elle Rávdná Näkkäläjärvi
Elle Rávdná Näkkäläjärvi vuordá iluin, ahte beassá johttit miehtá Norgga ovttas eará ofelaččaiguin. Govva: Samiske veivisere

Elle Rávdná Näkkäläjärvi háliida bargat ovdagáttuid vuostá ja danin ozaige Sámi ofelažžan.

Movttegis Elle Rávdná Näkkäläjärvi vástida telefovdnii ruovttugilistis Guovdageainnus. Áiddo dál son lea luomus: vássán mánut leat gollán Mátta-Norggas, soahteveagas.

Borgemánu álggus dat vásáhus lea oalát meattá, muhto ođđa hástalus lea juo vuordimin: sus šaddá Sámi ofelaš ovttas golbma eará nuorain.

Mortena Heaikka Ellen Anete Elle Rávdná dahjege Iskku Issáha Niillasa Nils-Heaikka Elle Rávdná lea 19-jahkásaš. Son lea bajásšaddan sihke Guovdageainnus ja Suoma bealde Leammis. Sutnje dát lea goittotge dat okta ja seamma Sápmi.

Háliida bargat ovdagáttuid vuostá

Sámi ofelaččat leat nuorat, geat johtet miehtá Norgga muitaleamen sámiid birra eandaliige joatkkaskuvllain. Doaibma lea álgán jagi 2004. Ofelaččat stuđerejit Sámi allaskuvllas Sámi kultur- ja servodatmáhtu, ja ofelaštin gullá oassin sin oahpuide.

Elle Rávdná Näkkäläjärvi muitala, ahte son háliidii šaddat ofelažžan danin, go diehtá bures dan, man unnán diehtu sámiid birra lea. Skuvllas lea kánske okta siidu jahkái sámiin ja dasa dat nohká.

– Dieđán, ahte Norggas ja sihkkarit Suomas ja Ruoŧas maid leat olu ovdagáttut sápmelaččaid vuostá. Ohcen ofelažžan, vai beasan daid ovdagáttuid vuostá bargat ja oahpahit, Näkkäläjärvi lohká.

Samiske veivisere, Sámi ofelaččat
Čuovvovaš skuvlajagi, 2020-2021, sii johttet miehtá Norgga muitaleamin sámiid birra. Sii leat Lemet Johanas Nystad, 21, Kárášjogas, Mirja Cicilia Andersson Renander, 18, Rennebuas, Elle Rávdná Näkkäläjärvi Guovdageainnus ja Vibeke Persen, 21, Deanus. Govva: Samiske veivisere

Son muitala, ahte šaddá sihkkarit hui miellagiddevaš baicce ságastallat Norgga nuoraiguin, muhto maid gullat, makkár gažaldagat sis leat.

– Munnje lea hui dehálaš muitalit, ahte Sápmi lea nu girjái. Ii leat okta vástádus, mii Sápmi lea. Leat olu iešguđetlágán kultuvrrat dan sámekultuvrra siste.

Näkkäläjärvis lea stuorra jáhkku dasa, ahte ofelašjagis šaddá hui somá. Dál joavku lea leamašan Oslos, gos sii leat beassan oahpásmuvvat gaskaneaset. Näkkäläjärvi illudage sakka, go beassá mátkkoštit dáid olbmuiguin.

– Mii leat hui buorre joavku, mii leat juo olu boagustan ja olu buorit ságastallamat leamaš, illuda Näkkäläjärvi.

Sápmi ja olbmot leat lahka váimmu

Boahttevuođas Näkkäläjärvi ii nu olu vel stresse. Son oaidná iežas barggus, mas beassá deaivvadit olbmuiguin ja humadit singuin. Dasa lassin son lea mielde boazodoalus ja das háliida dás duohkoge joatkit.

Guovdageaidnu lea ruoktu, dohko son háliida báhcit, vaikko finašiige gosnu eará sajis oahpu gazzamin. Oktan vejolašvuohtan son lea jurddašan oahpaheaddji barggu, muhto áibbas sihkkar son ii das vuos leat.

Go vel smiehtasta, maid háliidivčče boahttevuođas bargat, vástida son:

– Juoga mas beasan leat ávkin Sápmái.

Dá beasat guldalit Elle Rávdná Näkkäläjärvi muitalusa das, manin son háliidii Sámi ofelažžan ja makkár áššiid son atná dan barggus dehálažžan. Nu – ja gii son iešalddes lea?

Varrasamosat

Muualla Yle.fi:ssä