Sápmi |

Elle Sofe Sara lea ožžon ruhtadeami ráhkadit sámi vuosttaš guhkes musikálafilmma

Koreográfa ja filbmadahkki Elle Sofe Sara musikálafilbma lea ožžon guđa miljovnna ruvnnu ruhtadoarjaga.

Elle Sofe Sara
Sámi filbmadahkki ja koreográfa Elle Sofe Sara beassá bargagoahtit sámi vuosttas musikálafilmmain. Govva: Per Heimly / Preassagovva

Sámi filbmadahkki, koreográfa ja Dáiddadálu vuođđudeaddji Elle Sofe Sara lea ožžon filbmadoarjaga Norgga Filbmainstituhtas ráhkadit vuosttaš sámi musikálafilmma. Filmma namma lea Árru ja ikte almmuhuvvui, ahte filbma oažžu guđa miljovnna ruvnnu ruhtadoarjaga NFI Nye veier -prográmma bokte.

Sara muitala Dáiddadálu neahttasiidduin, ahte son ii riekta jáhke vel doarjaga leat duohta, iige son vuordán dákkár ođđasa. Son illuda joatkit bargguin, go filmmas lea su mielde dehálaš muitalus. Seammás lea maid dehálaš, ahte eanet sámi ja sámegielat filmmat ráhkaduvvojit, oaivvilda Sara.

Diibmá dálvet Sara válljejuvvui Romssa Riikkaidgaskasaš Filbmafestiválas Talent Norge ja Mer Film taleantaprográmmii. Dál logi mánu maŋŋá son lea ožžon buvttadanfitnodagain doarjaga ráhkadit guhkes filmma.

Mer Film lea buvttadanfitnodat Tromssas, Bergenis ja Oslos. Sara filmma buvttadeaddji lea Elisa Pirir.

Sámi vuosttaš filbmamusikála

Elle Sofe Sara orru Guovdageainnus ja son lea koreográfa ja filbmadahkki. Filmmat, teáhter, dánsun ja filbmadáidda gullet su bargui. Dáidaga bokte Sara čalmmustahttá dávjá politihkalaš hástalusaid ja sámi servodaga kultuvrralaš iešvuođaid.

Sara lea ráhkadan juo vihtta oanehisfilmma, main lea mielde dánsun, musihkka ja koreografiija. Dál son beassá ráhkadit guhkes musikálafilmma ja geavahit iežas ámmátdáiddu.

– Filmmas mii čuovvut ovtta sámi nissona, Kari, gii vuosttilda ruvkedoaimmaid, mat galget boahtit sin orohahkii. Filmma idea lea ain hui álgodásis, nu ahte in sáhte nu olu eanet muitalit juste dál, muitala Sara Dáiddadálu neahttasiiddus.

Sara mielde lea miellagiddevaš ráhkadit filmma ja son liiko muitalit muitalusaid dánsuma, musihka ja neaktima bokte.

Varrasamosat: Sápmi

Váldoođđasat

Varrasamosat

Muualla Yle.fi:ssä