Sápmi |

Ellos Deatnu bivdá ministariid čilget, mo Deanu oamastus sirdásii sápmelaččain stáhtaide

Jos min álbmot lea muhtumin vuolláičállán báhpára, mas daid rivttiid juolludit stáhtii, de mii dáhttut ministariid čájehit dan midjiide, Ellos Deatnu gáibida reivvestis Suoma ja Norgga stáhtaide.

Beaska Niillas ja Áslat Holmberg Ohcejoga álbmotčoahkkimis
Ellos Deatnu -joavkku Beaska Niillas ja Áslat Holmberg. Govva: Ellos Deatnu

Ellos Deatnu -lihkadus bivdá Norgga ja Suoma stáhtaid čilget, goas ja mo sii leat ožžon oamastan- ja hálddašanrievtti Deanu čázádahkii.

Joavku lea sádden áššis otne bearjadaga reivve Norgga ja Suoma ministariidda. Suomas reivve leat ožžon earret eará stáhtaministtar Juha Sipilä, olgoáššiidministtar Timo Soini, eana- ja vuovdedoalloministtar Jari Leppä, vuoigatvuohtaministtar Antti Häkkänen ja sisáššiidministtar Paula Risikko.

"Čielggadeami haga Deatnu gullá báikkálaččaide"

Ellos Deatnu -lihkadus fuopmášahttá reivvestis ministariid das, ahte riikkaidgaskasaš rievtti mielde guovllu sápmelaččat leat guhkesáigge geavaheami vuođul huksen oamastan- ja hálddašanrievtti iežaset guovlluide, maiddái Detnui. Das fuolakeahttá stáhtat leat ráđđádallamiin láhtten dego čázádat gulašii sidjiide, joavku čállá.

– Stáhtat eai leat bastán addit juridihkalaš čielggadeami das, mo luondduriggodagaid oamastan- ja hálddašanrievttit leat sirdásan sápmelaččain ja siiddain stáhtaide.

ellos deatnu moratorio teno tenon sopimus
Govva: Ellos Deatnu
Joavkku mielas stáhtat eai sáhte luohpat masnu, mii ii sidjiide gula – dán dáhpáhusas báikkálaččaid vuoigatvuođain.

– Stáhtain ii leat juridihkalaččat vuoigatvuohta hálddašit Deanu čázádaga iige ođđa soahpamuša sáhte danin atnit lágalažžan. Dál mii bivdit stáhtaid eiseváldiin čilgehusa das, goas ja mo sii leat ožžon oamastan- ja hálddašanrievtti Detnui. Jos sii eai sáhte čilget ášši midjiide, gullá Deatnu báikkálaččaide, čállá Ellos Deatnu.

Moratoriot bissot nu guhká go ođđa soahpamuš boahtá fápmui

Ellos Deatnu -lihkadus vuođđudii geassemánus moratorio Čearretsullui ja gieskat ásahuvvui maiddái nubbi moratorio Allasullui lahka Dálvadasa.

Ellos Deatnu -liikkeen moratorio.
Govva: Ellos Deatnu
Lihkadus oaivvilda, ahte ođđa bivdonjuolggadusat leat dahkkon beroškeahttá báikki olbmuid garra vuostálastimis, ja dat rihkkot sámiid olmmošvuoigatvuođaid iežaset kultuvrii, iešmearrideapmái ja birgejupmái. Ellos Deatnu čállá reivvestis, ahte sii áigot doalahit moratorioid ja geavahit buot vejolaš veahkaválddehis vugiid olahit mihttomeari, sámi iešmearrideami.

– Mii áigut doalahit moratorioid gitta dassážii, go ođđa bivdosoahpamuš ráđđádallojuvvo báikkálaččaid jođihemiin ja dat oažžu lága fámu.

Ellos Deatnu bovde reivvestis Jari Leppä ja Norgga dálkkádat- ja birasministtar Vidar Helgesena guossái Čearretsullui.

Allasuolu
Govva: Ellos Deatnu

Varrasamosat: Sápmi

Váldoođđasat

Varrasamosat

Muualla Yle.fi:ssä