Sápmi |

Ellos Deatnu ceggegoahtán birasdáidaga čalmmustahttin dihte Deanu dili – "Eat leat dušše muhtin mearrádusain sihkastemis eret"

Ellos Deatnu oaidná, ahte Deanu bivdogielddus lea vuot okta sisabahkkejeaddji vuohki hálddašit guovllu ja guovllu olbmuid, ja danin leat mearridan almmustahttit birasdáidaga guđa sierra báikái.

Čearretsuolu Ellos Deatnu
Ellos Deatnu -lihkadus lea ceggen birasdáidaga Čearretsullui. Govva: Hans Pieski

1 000 jagi dás maŋos dás ovddos. Ná čuožžu Ellos Deatnu -lihkadusa birasdáiddagis.

Ellos Deatnu -lihkadus lea ceggegoahtán birasdáidaga Deanu gárgguide ja guoros buođđosajiide, go oaidná ahte Deanu bivdogielddus lea vuot okta sisabahkkejeaddji vuohki hálddašit guovllu ja guovllu olbmuid. Birasdáidaga ulbmilin lea ságastahttit ja čalmmustahttit Deanu dili.

– Mii cegget galbbaid, main čužžot oalle mearkkašahtti sánit ja dajahusat. Daid oktavuođas beassat suokkardallat dan dili mii lea ja mii sáhtášii leat dat geaidnu ovddos guvlui, muitala Áslat Holmberg Ellos Deatnu -lihkadusas.

Birasdáidaga lávdin válljejuvvon guoros buođđosajiin ja gárgguin lea maid symbolalaš mearkkašupmi.

– Mii eat leat dušše muhtin mearrádusain sihkastemis eret. Sámit ain gávdnojit dáppe, vaikko eai leatge nu olu Deanu alde. Danin orui vuogas, vaikko buođđosajiide mat livčče muđui guorusin, cegget galbba ja dan bokte boktit ságastallama. Dan bokte váldit saji oinnolaččat deanus ja loktet daid áššiid almmolašvuhtii, muitala Holmberg.

Nrk Sámi doaimmaheaddji Marianne Boine jearahalai Áslat Holmberg Buorre Iđit Sápmi -sáddagis disdaga 20.7. Jietna: Yle Areena

Holmberg: Bivdogielddus ii leat dohkálaš proseassa ektui

Ellos Deatnu čállá dieđáhusastis, ahte nugo jagi 2017 Deanu soahpamuš, ii bivdogielddusge leat ráđđádallon báikkálaččaid miehtamiin.

Holmberg oaivvilda, ahte Deanus livččii aivve eará dilli, juos bivdogielddus livččii ráđđádallon Sámiid gaskka.

– Muhto nu ii leat dilli, dat lea stáhtaid dásis boahtán dušše mearrádus. Dallehan dat lea sisabahkkejeaddji vuohki ja rihkku min rievtti iešmearrideapmái dan áššis. Danin ii leat dohkálaš nie proseassa ektui diet bivdogielddus, čilge Áslat Holmberg.

Čearretsuolu Ellos Deatnu
Birasdáidagiin háliidit olahit vuosttažettiin Deanu čázádaga álbmoga ja čájehit, ahte lihkadus lea ain gozuid alde ja bargame áššiid ovdii. Seammás ulbmil lea čájehit dan maiddái olggos guvlui, dadjá Áslat Holmberg. Govva: Hans Pieski

"Geasage ii leat dehálut dat Deatnu ja luossa, go midjiide"

Lihkadus oaidná, ahte sápmelaččat, guovllu vuoigatvuođaoamasteaddjit, leat guovllu rivttes hálddašeaddjit. Lihkadus čállá ahte sápmelaččaid árbevirolaš máhttu ii leat doarvái vuhtiiváldon bivddu hálddašeamis.

– Mii leat duháhiid jagiid dás ovdal fuolahan, áimmahuššan, dikšon ja ovttaseallán Deanuin. Mis lea máhttu ja diehtu hálddašit iežamet guovlluid ja áigut das ávvira atnit čuovvovaš duhát jagi dás duohkoge, čuoččuhit Ellos Deanu dieđáhusas.

– Ja geasage ii leat dehálut dat Deatnu ja luossa, go midjiide, loahpaha Áslat Holmberg.

Varrasamosat: Sápmi

Váldoođđasat

Varrasamosat

Muualla Yle.fi:ssä