Sápmi |

Ellos Deatnu lágida doarjjakonseartta – Paleface, Wimme ja eará násttit jođus Ohcejohkii

Ohcejogas lágidit doarjjakonseartta 25.7. Konseartta ulbmilin lea doarjut Ellos Deatnu -joavkku doaimmaid.

Moratorio
Govva: Ellos Deatnu -joavku

Ellos Deatnu -joavku lea fidnen beakkán artisttaid doarjut iežas doaimmaid. Ohcejohkii leat čavgemin earret eará Paleface, Wimme ja Niko Valkeapää. Joavku lágida doarjjakonseartta Ohcejoga Busteldearpmis maŋŋebárgga 25.7. dmu 17.00.

– Váldoulbmilin lea čohkket olbmuid miehtá Deanu čázádagaid ja eará guovlluin maid. Ellos Deatnu lea dušše okta jovkkoš. Mii hálidat ávžžuhit ja movttidahttit olles álbmoga doaibmagoahtit sámiid ja luonddu vuoigatvuođaid bealis. Aiddo dál dárbbašuvvo buohkaid veahkki, cealká Beaska Niillas.

Ellos Deatnu julggaštii ovdal mihcamáraid moratorio Deanu Čearretsullui ja jođihii álbmotčoahkkima Ohcejogas. Joavku ovddida sámiid iešmearrideami Deanu čázádagain ja doalaha moratorio Čearretsullos olles geasi.

– Doarjjakonseartta ruđalaš ulbmilin lea doarjut Ellos Deatnu -joavkku doaimmaid. Sisaboahtu geavahuvvo stuorra čoahkkinlávvui ja uhcit goluide dego borramuššii, boaldinmuoraide ja bensengoluide, lohká Áslat Holmberg Ellos Deatnu -joavkkus.

Okta Suoma beakkáneamos hip hop-artisttain lea boahtimin Ohcejohkii

Dilálašvuođa beakkáneamos artista lea hip hop -artista Karri “Paleface” Miettinen.

– Hálidan doarjut Ellos Deatnu -joavkku ja buot sápmelaččaid. Sin sajádaga ferte ain nannet. Sámiid jietna ferte gullot Suoma ja Norgga servodagain, erenoamážit sin árbevirolaš ealáhusaide guoski mearrádusain, lohká rap-artista ja Suomi100 -fidnu hálddahusa lahttu Paleface.

Doarjjakonseartta eará loaiddasteaddjit leat Ailu Valle, Ammon Johnskareng, Amoc, Ánde Somby, Dutta Per Ándde Juhán, Niillas Holmberg, Sara Marielle Gaup Beaska, Anna Näkkäläjärvi-Länsman ja Ulla Pirttijärvi. Sámi Siida vuovdá káfe ja váffeliid.

Beaiváduvvon 11.7.2017 dmu 15.04: lasihuvvon artistalistái Anna Näkkäläjärvi-Länsman namma

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä