Sápmi |

Ellos Deatnu! ohcá doarjaga maid Badje-Deanus – álbmotgulahallan boahtte vahkus

Mii leat vásihan, ahte stánddaheamet ráđđádallon ođđa Deanu soahpamuš orro veahá háddjen min álbmoga. Dan mii galggašeimmet dakkaviđe njulget ja bissehit, Beaska Niillas lohká.

Beaska Niillas
Min mielas mii leat ollen dakkár dillái, ahte juohke okta, sihke vuollin ja badjin, berre smiehtastit ahte gosa min maŋisboahtiid vuoigatvuođat, ja dan bokte birgejupmi, lea gártamin, loahpaha Beaska Niillas. Govva: Spotlight / Yle

Ellos Deatnu! -joavku ohcá doarjaga maid Badje-Deanus. Joavku lágida álbmotgulahallama Kárášjogas boahtte vuossárgga 17.7. dii.15.00.

– Mii leat vásihan, ahte stánddaheamet ráđđádallon ođđa Deanu soahpamuš orro veahá háddjen min álbmoga. Dan mii galggašeimmet dakkaviđe njulget ja bissehit. Jos galggaš bastit várjalit vuoigatvuođaideamet, de ii dáidde eará ráđđi go čoahkkanit ja bargagoahtit ovttas, lohká Beaska Niillas.

Ulbmilin lea čohkket oainnuid bivddu ja Deanu soahpamuša hárrái sihke badjin, vuollin ja guovttebeale rájá Deanu čázádagas ja láhčit vuolggasaji ovttasbargui, joavku dieđiha.

Moratorio
Govva: Ville-Riiko Fofonoff / Yle
Ellos Deatnu! -joavku lea mihcamáraid rájes doalahan moratoria Čearretsullo guovllus Ohcejogas. Sii gáibidit eanet válddi báikkálaš dássái Deanu bivddu hálddašeamis, eaige dohkket dán geasi fápmui boahtán Deanu guolástannjuolggadusaid.

Geassemánu loahpas Ellos Deanu! doalai álbmotgulahallama Ohcejogas, ja oaččui báikkálaš olbmuid doarjaga doppe. Dál sii háliidit gullat maid Badje-Deanu olbmuid oaiviliid.

– Álbmotgulahallan manai hui bures, go lágideimmet Ohcejogas dá moadde vahku áigi, ja hálidivččiimet čilget maiddái Badje-Deanus iežamet moratoria ja eará doaimmaideamet birra. Min mielas mii leat ollen dakkár dillái, ahte juohke okta, sihke vuollin ja badjin, berre smiehtastit, ahte gosa min maŋisboahttiid vuoigatvuođat, ja dan bokte birgejupmi, lea gártamin, loahpaha Beaska Niillas.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä