Sápmi |

Ellos duodji -čájáhus ovdanbuktá duoji jotkkolašvuođa – Ealli árbevierru don doloža rájes

Sámi duodji -searvvi ođđa čájáhus ovdanbuktá duoji historjjá ja dálááiggi dujiiguin ja govaiguin.

Jietna: Neeta Jääskö
Jietna
Sohkaršohkka 7.6.2018: Neeta Jääskö Ellos Duodji -čájáhusa birra

“Ellos duodji” čuožžu Sámi duoji ođđa čájáhusa galbbas. Oaidnin láhkái leat govat ja duojit duoji duogážis ja dálá áiggis.

Dárkkuhus lea čájehit duoji máŋggabealátvuođa. Danin čájehanláhkái leatge sihke gárvvis duojit ja maiddái gaskan dágot duojit dahje duodjeávdnasat.

Mannan jagi álgán prošeakta “Duodji ja duddjon ovdal ja dál” mielde ráhkaduvvon čájáhus lea oidnosis sámekulturguovddáš Sajosis. Čájáhus ovdanbuktá sámi duodjeárbevieru historjjá govain ja dujiin.

Ellos Duodji
Ellos duodji -čájáhus Sajosis, Dollagáttis. Govva: Heli Huovinen / Yle

– Jurdda lea čájehit jotkkolašvuođa, mii lea duojis – mii lea leamašan don doloža rájes min ealli árbevierru ja mii oidno ain dáin dálá dujiiguin, mat dáhkkojuvvojit sullii seamma ávdnasiiguin ja teknihkaiguin, mii lea árbejuvvon buolvvas nubbái, muitala Sámi duoji searvvi ságadoalli Neeta Jääskö.

Giitosat duodjáriidda eallinbarggus

Sámi duodji -searvi lea álggahan prošeavtta juo mannan jagi. Sii leat ohcan čájáhusa várás boares govaid duddjomis ja dujiin Musealágádusa čoakkáldagain. Duoji jotkkolašvuohta boahtáge oidnosii namalassii arkiivagovaid ja modeardna dujiid bokte čájáhusas.

Ellos duodji
Mihku-Ilmár muitala čájáhusgussiide fatnasa duddjomis. Govva: Heli Huovinen / Yle

Guovdu čájáhuslanja lea Kaunotar-nammasaš fanas, man lea duddjon Mihku Ilbmár dahjege Ilmari Laiti.

– Ii dasa mannan go várra guokte mánotbaji, muitala Laiti čájáhusgussiide fatnasa duddjomis ja čájeha fatnasa detáljjaid.

Sámi duoji ságadoalli Neeta Jääskö giitá vel mojunjálmmiin vuorrasut duodjáriid, geat leat eallinagi barggustis bargan duoji ovdii ja ožžon áigái dan, ahte duddjon lea seailun geasuheaddjin nuoraidege.

Ellos Duodji -čájáhus Dollagáttis, Sajosis 7.6. - 10.8.2018

Varrasamosat: Sápmi

Váldoođđasat

Varrasamosat

Muualla Yle.fi:ssä